Thuto ea Johanne Mokolobetsi
1Qaleho ea molaetsa o molemo oa Jesu Kreste, Mora oa Molimo. 2Ho ngotsoe bukeng ea moporofeta Esaea, ho thoe:
“Ke rōmela leqōsa la ka ke leo,
le tla u etella pele,
le u lōkisetse tsela.
3Lentsoe la ea hōoang feelleng,
le re:
‘Lokisang 'mila oa Morena,
le otlolle litsela tsa hae!’ ”
4Ha fihla Johanne a kolobeletsa feelleng, a phatlalatsa tsa kolobetso ea pako e isang tšoarelong ea libe. 5Ba naha eohle ea Judea le baahi bohle ba Jerusalema ba ea ho eena, 'me a ba kolobeletsa nōkeng ea Jorodane ba ntse ba ipolela libe tsa bona.
6Johanne o ne a apara seaparo sa boea ba kamele, a itlamme ka leqhama la letlalo thekeng, a e-ja litsie le mahe a linotši tsa naha. 7A phatlalatsa, a re: “Kamora' ka ho tla e mong ea matla ho mpheta, eo ke sa tšoanelang le ho inama ke lokolla maqhoele a meqathatso ea hae. 8Ke le kolobelitse ka metsi, empa eena o tla le kolobetsa ka Moea o Halalelang.”
Jesu oa kolobetsoa
9Mehleng eona eo Jesu a fihla, a e-tsoa Nasaretha e Galelea, 'me a kolobeletsoa nōkeng ea Jorodane ke Johanne. 10Hang-hang ha a e-tsoa metsing, a bona maholimo a buleha, le Moea o theohela holim'a hae e ka leeba, 11'me lentsoe le tsoang maholimong la re: “U Mora oa ka eo ke mo ratang, ea nkhahlang.”
Jesu oa lekoa
12Eaba Moea o mo khannela feelleng, 13'me a hlola feelleng matsatsi a mashome a mane a le har'a libatana, a ntse a lekoa ke Satane, 'me mangeloi a mo sebeletsa.
Jesu o qala tšebetso ea hae Galelea
14Eare hoba Johanne a tšoaroe, Jesu a fihla Galelea, a phatlalatsa molaetsa o molemo oa Molimo, 15a re: “Nako e fihlile, 'Muso oa Molimo o atametse; bakang, 'me le lumele molaetsa o molemo.”
Jesu o bitsa batšoasi ba bane ba litlhapi
16Eare ha a sika le letša la Galelea, a bona Simone le Andrease, ngoan'abo Simone, ba akhela letlōoa la bona leoatleng, hobane e ne e le batšoasi ba litlhapi. 17Jesu a re ho bona: “Ntšaleng morao, 'me ke tla le etsa batšoasi ba batho.” 18Hang-hang ba tlohela matlōoa a bona, ba mo latela.
19Eare hoba a tsamaee sebakana, a bona Jakobo, mora oa Sebedea, le Johanne ngoan'abo, le bona ba le ka sekepeng ba ntse ba lōkisa matlōoa. 20Eaba oa ba bitsa; ba tlohela ntat'a bona Sebedea le bahiruoa ka sekepeng, ba mo sala morao.
Motho ea nang le moea o litšila
21Ba fihla Kaperenauma. Ka Sabatha Jesu a kena ka tlung ea thapelo, a ruta. 22Batho ba hlolloa ke thuto ea hae, hobane o ne a ba ruta joaloka ea nang le matla, e seng joaloka Litsebi tsa Molao.
23Nakong eo, ka tlung ea bona ea thapelo, ho ne ho le teng motho ea nang le moea o litšila, 'me a bokolla, 24a re: “U re kene ka'ng, Jesu oa Nasaretha? Na u tlil'o re timetsa? Kea tseba hore na u mang: U Ea Halalelang oa Molimo!”
25Jesu a o khalemela, a re: “Thōla! Tsoa ho eena!” 26Eare hoba moea o litšila o mo ilibanye habohlōkō, o bokolle haholo, oa tsoa ho eena.
27Batho bohle ba hlolloa, hoo ba ileng ba botsana, ba re: “Hoo ke eng? Ke thuto e ncha e nang le matla! O laela le meea e litšila, 'me ea mo mamela!” 28Hang-hang botumo ba hae ba phatlalla hohle naheng ea Galelea.
Jesu o folisa batho ba bangata
29Eaba ba tsoa ka tlung ea thapelo, ba kena ka tlung ea bo-Simone le Andrease ba e-na le Jakobo le Johanne. 30Mohoehali oa Simone o ne a le liphateng, a tšoeroe ke feberu, 'me ba tsebisa Jesu. 31Jesu a ea ho eena, a mo tšoara ka letsoho, a mo emisa, eaba feberu ea mo tlohela, 'me a ba sebeletsa.
32Mantsiboea, ha letsatsi le se le liketse, ha tlisoa ho eena bohle ba kulang, le ba nang le bademona, 33'me motse oohle oa bōkana monyako. 34A folisa ba bangata ba neng ba jeoa ke mafu a mefuta-futa, a leleka bademona ba bangata, empa a se ke a lumella bademona ho bua, hobane ba ne ba tseba hore na ke mang.
Jesu oa ruta
35Eare e sa le ka malungoalungoana, Jesu a tsoha, a tsoa, a ea nahathothe, a rapella teng. 36Simone le ba neng ba e-na le eena ba 'matla; 37ba mo fumana, 'me ba re ho eena: “Bohle ba ntse ba u batla.”
38A re ho bona: “A re eeng nq'e 'ngoe metseng e ka mathōko, e le hore le teng ke tle ke rute, hobane ke seo ke se tletseng.” 39A potoloha le Galelea eohle, a ntse a ruta matlung a bona a thapelo, a leleka bademona.
Jesu o folisa molepera
40Molepera a tla ho eena, a khumama, a mo rapela, a re ho eena: “Ha u rata, u ka ntlhoekisa.”
41Jesu a mo utloela bohlōkō, a otlolla letsoho, a mo ama, a re ho eena: “Kea rata; hloeka!” 42Hang-hang lepera la mo tlohela, 'me a hloeka.
43Jesu a mo laea ka thata, a nt'o re a tlohe hang-hang, 44'me a re ho eena: “Hlokomela, u se re letho ho motho; u mpe u e'o itlhahisa ho moprista, u ntše nyehelo e laetsoeng ke Moshe hobane u hloekile, e be bopaki ho bona.”
45Empa eena, hoba a tsoe moo, a tsamaea a bolelisa, 'me a hasanya taba eo, hoo Jesu a bileng a sitoa ho kena motseng a bonoa, a hlola nahathothe, 'me batho ba tla ho eena ba e-tsoa kahohle.
