Morena o qōsa Baiseraele
1Mamelang seo Morena a se bolelang:
“Emang le behe nyeoe ea lōna,
le e behe kapele ho lithaba,
maralla a ke a utloe
boipiletso ba lōna.
2Lōna lithaba,
mamelang qōso ea Morena;
lōna methèo ea lefatše,
sekehang tsèbè.
Lōna methèo e tiileng
sekehang tsèbè.
Morena o qōsa sechaba sa hae,
Morena o tsekisana le Baiseraele.
3“Lōna chaba sa ka
ebe ke le ents'eng?
Ke le imelitse ka'ng?
Nkarabeng hle!
4Ke ile ka le ntša naheng ea Egepeta,
ka le lopolla naheng ea bokhoba.
Ka rōmela Moshe ho le etella pele,
ka mo rōmela
a e-na le Arone le Meriama.
5Lōna chaba sa ka,
hopolang morero oa Balake,
morero oa Balake, khosi ea Moabe,
le hopole le karabo ea Bileame,
mora oa Beore.
Hopolang le lona leeto la lōna
la ho tloha Shitime ho ea Gilegale,
le tle le tsebe
ketso tse pholosang tsa Morena.”
Seo Morena a se batlang
6Ke tla tla ke nkile eng
ha ke e-ea ho Morena?
Ke tla obama joang
kapele ho Ea Holimo-limo?
Na ke tla fihla
ke nkile nyehelo ea secheso,
ke nkile nyehelo
ea manamane a selemo?
7Na Morena o tla khahloa
ke kete tsa lipheleu,
a khahloe
ke nyehelo ea ole e ngata-ngata?
Na ke tla nyehela
ka ngoan'aka oa matsibolo,
ke nyehele ka eena
ka baka la tšito tsa ka,
ke nyehele
ka ngoan'aka oa matsoathaka,
ke nyehele
ka eena ka baka la sebe sa ka?
8Uena motho,
u boleletsoe se molemo;
ebe Morena
o lebeletse eng ho uena?
Ke ho etsa tse lokileng,
le ho ba le lerato,
le ho ikokobeletsa Molimo oa hao.
Molato oa Baiseraele le kotlo ea bona
9Ea bohlale
o tšaba lebitso la Morena.
Morena o ipiletsa ho motse, o re:
“Lōna chaba se phuthehileng,
se phuthehetseng mona, mamelang!
10Na nka iphapanyetsa
matlotlo a bolotsana,
le likala tse qhekanyetsang,
tse rōhakehileng?
11“Na ke tla lokolla
ea nang le sekala se qhekanyetsang?
Ke lopolle
ea nang le sekala sa bolotsana,
eo boima ba mokotla oa hae
bo sa nepahalang?
12“Barui ba lōna ke banna ba sehlōhō;
chaba sa lōna ke batho ba leshano,
maleme a bona
ke maleme a thetsang.
13Kahoo ke se ke qalile ho le otla,
ke le timetsa
ka baka la libe tsa lōna.
14Le tla ja, empa le ke ke la khōra!
Le tla sala le ntse le lapile joalo.
Le tla ba le mahlaba a pelehi,
empa bana bona
le ke ke la ba beleha;
esita leha le ka beleha bana,
bana bao
ke tla ba bolaea ka sabole.
15“Le tla jala,
empa le ke se kotule letho;
le tla tlhōtla tholoana tsa mohloaare,
empa le ke se itlotse ka ole ea tsona;
le tla tlhōtla tholoana tsa morara,
empa le ke se noe veine ea tsona.
16Litaelo tsa Omeri le li phethile,
le mesebetsi eohle ea ntlo ea Akabe,
likeletso tsa bona le ile la li latela;
ka baka leo, ke tla le timetsa,
chaba sa lōna ke se fetole sesomo,
sekhobo sa balichaba
le se jare joalo.”
