'MIKIEA 5

₁Uena Jerusalema,

khōbōkanya bahlabani ba hao,

hobane re etselitsoe thibella;

'musi oa Iseraele ba tla mo otla,

ba mo otle ka thupa lerameng.

₂“Ha e le uena

Betlelehema Eferata,

leha u le monyenyane

har'a melōko ea Juda,

ho uena

ho tla tsoa 'musi oa Iseraele,

eo lelōko la hae

le qalehileng khale,

la qaleha mehleng ea baholo-holo.”

₃Kahoo Morena

o tla furalla Baiseraele,

a ba furalle

ho fihlela mosali a beleha;

ke moo Baiseraele ba tla khutla,

ho khutle

Baiseraele ba phonyohileng,

ba khutle,

ba ikopanye le bana babo bona.

₄O tla ema,

a alose mohlape oa hae,

a o alose

ka matla a tsoang ho Morena,

ka bitso le tlōtlehang

la Morena Molimo oa hae.

Ba tla phela ba sireletsehile,

hobane boholo ba hae bo tla nama,

bo namele pheletsong tsa lefatše.

₅Eena e tla ba khotso ea bona.

Ha Asiria e futuha,

e futuhela naha ea rōna,

qhobosheane tsa rōna e li ripitla,

re tla e neella ka balaoli ba supile,

le ka mahosana a robeli a sechaba.

₆Ba tla busa naha ea Asiria ka sabole,

le naha ea Nimerode

ka sabole e motsutsoe;

'musi ea tsoang Betlelehema

o tla re namolela,

a re namolele matleng a Asiria

ha e futuhela naha ea rōna,

e hoanka kahar'a meeli ea rōna.

₇Masalla a Jakobo a tla ba teng,

a be teng har'a lichaba tse ngata,

a be joaloka phōka

e tsoang ho Morena,

a be joaloka melupe

e kolobisang joang,

melupe e sa ke be

e laeloe ke motho,

kapa e emele

ho phetha thato ea motho.

₈Masalla a Jakobo a tla ba teng,

a be teng har'a lichaba,

a be teng har'a merabe e mengata,

a be joaloka tau

har'a libatana tsa meru,

a be joaloka taoana

har'a mehlape ea linku,

taoana e fetang e harōla, e tsekolla,

empa ho se ea ka pholosoang,

ea ka pholosoang tleneng tsa eona.

₉Tsoho la hao

le tla phahamela holimo,

le phahamele

holim'a ba u loantšang,

lira tsa hao tsohle

li tla timetsoa.

₁₀“Mohl'a tsatsi leo,”

ho rialo Morena,

“ke tla bolaea lipere tsa lōna,

ke robe likariki tsa lōna tsa ntoa.

₁₁Ke tla heletsa

metse ea naha ea lōna,

ke qhaqhe

qhobosheane tsohle tsa lōna.

₁₂Boloi ba lōna ke tla bo felisa,

le ho laola ha le sa tla laola.

₁₃Melingoana ea lōna

ke tla e pshatlaka,

le litšiea tsa lōna tse halalelang;

ha le sa tla hlola

le obamela mesebetsi ea lōna,

e leng mesebetsi ea matsoho a lōna.

₁₄Tšiea tsa lōna tsa Ashera

ke tla li kōqōla,

le metse ea lōna ke e heletse.

₁₅Ka bohale le ka khalefo

ke tla iphetetsa,

lichaba tse sa 'mameleng ke li otle.”