Ho nyatsoa baetapele ba Iseraele
1Eaba ke re:
“Lōna baetapele ba Jakobo,
mamelang!
Lōna babusi ba ntlo e Iseraele,
mamelang!
Na toka ha lea tšoanela ho e tseba?
2Le hloile botle, le rata bokhopo,
le thoebōla sechaba sa ka,
le se thoebōla letlalo,
le se tsoebōlōtse linama masapong;
3le buha chaba sa ka letlalo,
le se buhe, le itjelle nama ea sona,
masapo a sona
le a robake likotoana;
le se khabela sa nama e tla halikoa,
sa nama e khabeloang e tla apehoa.”
4Ke moo ba tla ipiletsa ho Morena,
Morena a ke ke a ba araba.
Mohlang oo
o tla ba patela fahleho sa hae,
ka baka la liketso tsa bona,
ketso tsa bona tse khopo.
5Morena o bua tjena:
“Baporofeta bana
chaba sa ka baa se khelosa,
ba re ‘khotso’
ho motho ea ntšang liphōmōso,
ba loane ea khumamela
le ea se nang tsona.”
6Ho baporofeta bana Morena o re:
“Ka baka leo,
bosiu bo tla le aparela,
bo le aparele,
le se ke la bona lipono,
le apareloe ke lefifi,
le bonohe bo fele,
tsatsi le likele,
baporofeta ba phirimeloe,
ho bona motšeare
e ke fifi le letšo-letšo.
7Bo-ralipono lihlong li tla ba hlaba,
linohe le tsona li tlontlolohe;
kaofela ha bona
ba tla ikhurumetsa lifahleho,
hobane Molimo a sa ba arabele.”
8Empa 'na ruri ke na le matla,
Moea oa Morena o kahare ho 'na;
o nthutile toka, oa mpha le sebete
ho bolella Jakobo litlōlo tsa hae,
le ho bolella Iseraele sebe sa hae.
9Lōna baetapele ba ntlo ea Jakobo,
mamelang!
Lōna babusi ba ntlo ea Iseraele,
mamelang!
Tsohle tse lokileng lea li nyelisa,
tsohle tse nepahetseng le li sokamise.
10Ka tšōllo ea mali
Sione le e hahile,
ka bokhopo ba lōna
la haha Jerusalema.
11Baetapele ba eona
ba ahlōlela ba ba neang tjotjo,
baprista ba eona
ba rutela ho neoa moputso,
baporofeta ba eona
ba porofetela chelete;
ho le joalo, ba tšepile Morena,
ba re: “Ha re re Morena
o teng kahar'a rōna?
Ha ho koluoa
e ka b'a re oela holimo!”
12Ka baka la lōna Sione e tla lengoa,
e lengoe joalokaha tšimo e lengoa,
Jerusalema e fetohe, e be masupi,
thaba ea Tempele e ririellane lifate.
