1Eare ha Jesu a qetile ho laela barutuoa ba hae ba leshome le metso e 'meli, a tloha moo ho ea ruta le ho phatlalatsa molaetsa o molemo metseng ea habo bona.
Barōmuoa ba Johanne Mokolobetsi
2Johanne ha a le litlamong a utloa tsa mesebetsi ea Kreste. A rōma barutuoa ba hae 3ho 'motsa: “Na ke uena ea tlang, kapa re lebelle e mong?”
4Jesu a ba araba, a re: “E-eang, le phetele Johanne tseo le li utloang le tseo le li bonang: 5Lifofu lia bona, liritsa lia tsamaea, balepera baa hloekisoa, bo-tsebututu baa utloa, bafu baa tsoha, 'me mafutsana a bolelloa molaetsa o molemo. 6Ho lehlohonolo ea sa khoptjoeng ka baka la ka!”
7Hoba barōmuoa bao ba tsamaee, Jesu a qala ho bua le matšoele ka Johanne, a re: “Le ne le il'o bona eng feelleng? Lehlaka le tsukutloang ke moea? 8Hantle-ntle le ne le il'o bona eng? Motho ea liaparo tse mabokoboko? Ba liaparo li mabokoboko ba matlung a mahosi. 9Ehlile le ne le il'o bona eng? Le il'o bona moporofeta? E, kea le bolella, e moholo le ho feta moporofeta. 10Ke eo ho ngotsoeng ka eena, ha thoe:
“ ‘Ke rōmela leqosa la ka ke leo,
le tla u etella pele,
le u lōkisetse tsela.’
11“Ruri kea le bolella, har'a ba tsoetsoeng ke basali ha ho e-s'o hlahe ea fetang Johanne Mokolobetsi ka boholo, empa e monyenyane 'Musong oa maholimo o mo feta ka boholo. 12Ho tloha mehleng ea Johanne Mokolobetsi ho fihlela joale, 'Muso oa maholimo o 'nile oa futuheloa ka matla, 'me ba likhōka baa o hapa. 13Baporofeta bohle hammoho le Molao ba 'nile ba porofeta ho fihlela ho Johanne, 14'me ha le ka kholoa taba eo, Johanne ke eena Elia ea neng a tšoanetse ho tla. 15Ea nang le litsebe a utloe!
16“Joale molōko oo ke tla o tšoantša le eng? O tšoana le bana ba lutseng mabaleng a metse, ba hōoeletsana, 17ba re:
“ ‘Re le letselitse liletsa,
empa ha lea ka la etsa motjeko!
Re le binetse koli-ea-malla,
empa ha lea ka la lla!’
18“Etsoe Johanne o ile a tla a sa je, a sa noe, eaba ho thoe: ‘O na le modemona.’ 19Mor'a Motho eena o tlile a e-ja, a e-noa, eaba ho thoe: ‘Motho enoa ke monyollo le senoi sa veine, ke motsoalle oa balekhetho le baetsalibe.’ Empa bohlale bo netefatsoa ke mesebetsi ea bona.”
Bomalimabe ba metse e sa bakeng
20Eaba o qala ho nyatsa metse eo a neng a entse bongata ba liketso tsa hae tse hlollang ho eona, kahobane ha ea ka ea baka. 21A re: “U malimabe, uena Korasine! U malimabe, uena Bethesaida! hobane hoja liketso tse hlollang tse entsoeng kahar'a lōna li ne li entsoe Tire le Sidone, batho ba teng ba ka be ba bakile khale, ba apere tse mahoashe, ba itšetse ka molora. 22Empa kea le bolella, ka letsatsi la kahlōlo litaba tsa Tire le Sidone li tla mamelleha ho feta tsa lōna. 23Na le uena Kaperenauma,
“ebe u tla phahamisetsoa leholimong?
U tla theohela tlase lebitleng!
“Hoja liketso tse hlollang tse entsoeng kahare ho uena li ne li entsoe kahar'a Sodoma, motse oo o ka be o sa le teng le kajeno-ea-bokajeno. 24Empa kea le bolella, ka letsatsi la kahlōlo litaba tsa naha ea Sodoma li tla mamelleha ho feta tsa hao.”
Tloong ho 'na, le phomole
25Ka nako eo, Jesu a tsoela pele, a re: “Kea u boka, Ntate, Morena oa leholimo le oa lefatše, hobane litaba tsena u li patetse ba bohlale le ba seli, 'me u li senoletse ba joaloka bana. 26E, Ntate, hobane u khahliloe joalo.
27“Tsohle ke li neetsoe ke Ntate, 'me ha ho ea tsebang Mora haese Ntate, hape ha ho ea tsebang Ntate haese Mora, le eo Mora a ratang ho mo senolela eena.
28“Tloong ho 'na, lōna bohle ba khathetseng, ba imetsoeng, 'me ke tla le khatholla. 29Itjariseng joko ea ka, le ithute ka 'na, kahobane ke mosa, ke na le pelo e ikokobelitseng, 'me le tla fumana phomolo. 30Joko ea ka e bonolo, 'me thōtō ea ka e bobebe.”
