LUKA 19

₁Jesu a fihla a phunyeletsa motse oa Jeriko. ₂Ho ne ho e-na le monna ea bitsoang Sakiea, eo e neng e le hlooho ea balekhetho, e bile e le morui. ₃A rata ho bona hore na Jesu ke mang, empa a sitoa ka baka la letšoele, hobane o ne a le mokhutšoanyane. ₄A mathela pele, a hloella safateng sa feiee e hlaha, hore a tle a 'mone, kaha a ne a tla feta ka tsela eo.

₅Ha Jesu a fihla sebakeng seo, a lelalla sefateng, a re ho eena: “Sakiea, phakisa u theohe, hobane eka khona ke hlole tlung ea hao kajeno.” ₆A phakisa a theoha, 'me a mo amohela ka thabo.

₇Eare ha ba bona hoo, ba korotla bohle, ba re: “O fapohetse ha monna oa moetsalibe.”

₈Sakiea a ema, a re ho Morena: “Bona, Morena, maruo a ka ke a arolela mafutsana ka lehare, 'me eo ke mo amohileng ho hong ka mano ke 'museletsa hona hane.”

₉Eaba Jesu o re: “Kajeno lelapa lena le fumane pholoho, kaha le eena e le mora oa Aborahama, ₁₀hobane Mor'a Motho o tlile ho batla le ho pholosa ba lahlehileng.”

₁₁Eare ba sa mametse tsena, Jesu a eketsa a bolela setšoantšo, hobane a ne a atametse Jerusalema, 'me ba ne ba hopola hore 'Muso oa Molimo o se o tla hlaha kapele-pele. ₁₂Eaba o re: “Monna e mong oa lelōko la borena o ne a ee lefatšeng le hōle ho ea neoa borena, a nt'o khutla. ₁₃Hoba a bitse ba leshome ba bahlanka ba hae, a nea e mong le e mong oa bona mina, a nt'o re ho bona: ‘Hoèbang ka tsona, ho fihlela ke khutla.’

₁₄“Empa kaha baahi ba naha ea hae ba ne ba mo hloile, ba mo salisa barōmuoa morao, ba re: ‘Ha re rate ha eo a rena holim'a rōna.’

₁₅“Eitse ha a khutla, e se e le khosi, a laela hore bahlanka bane bao a ba neileng chelete ba bitsetsoe ho eena, hore a tle a tsebe hore na ba fumane phaello e kae ka ho hoèba.

₁₆“Ha tla oa pele, a re: ‘Morena, mina ea hao e tsoetse limina tse leshome.’

₁₇“A re ho eena: ‘U entse hantle, mohlanka ea khabane, hobane u ile ua tšepahala nthong e nyenyane, busa metse e leshome.’

₁₈“Ha tla oa bobeli, a re: ‘Morena, mina ea hao e tsoetse limina tse hlano.’

₁₉“Ho eo a re: ‘Uena okamela metse e mehlano.’

₂₀“Empa e mong a tla, a re: ‘Morena, bona, mina ea hao, eo ke neng ke e phuthetse leseleng, ke e patile, ke ena. ₂₁Ke u tšabile, hobane u motho ea thata: u nka seo u sa kang ua se bea, 'me u kotula seo u sa kang ua se jala.’

₂₂“A re ho eena: ‘Ke tla u ahlōla ka tsa molomo oa hao, mohlanka tooe ea khopo! U tsebile hore ke motho ea thata, ea nkang seo ke sa kang ka se bea, ea kotulang seo ke sa kang ka se jala! ₂₃Ke hobane'ng ha u sa ka ua bea chelete ea ka bankeng? Ha ke khutla nkabe ke ile ka e ntša hammoho le phaello!’

₂₄“A nt'o re ho ba emeng haufi: ‘Mo amoheng mina eo, le e nee ea nang le limina tse leshome!’

₂₅“Ba re ho eena: ‘Morena, o sa a e-na le limina tse leshome!’

₂₆“Kea le bolella hore ho tla neoa e mong le e mong ea nang le letho, empa ea se nang letho, le seo a nang le sona o tla se amohuoa. ₂₇Empa lira tsena tsa ka, tse sa kang tsa rata ha ke rena holim'a tsona, li tliseng koano, le li bolaele kapel'a ka.”

₂₈Hoba a bolele tsena, a ba etella pele, a nyolohela Jerusalema. ₂₉Eitse ha a atamela Bethefage le Bethania, pel'a thaba e bitsoang Thaba ea Mehloaare, a rōma ba babeli ba barutuoa, ₃₀a re: “E-eang motseng o kapele ho lōna, oo etlare ha le kena ho oona le fumane petsana e hōlehiloeng, e e-s'ong ho palangoe ke motho; le e lokolle, le e tlise mona. ₃₁Ha motho a ka le botsa, a re: ‘Le e lokollela'ng?’ le tla araba tjena: ‘Morena oa e hloka.’ ”

₃₂Joale ba rōmiloeng ba ea, ba fumana ho le joalokaha a ba boleletse. ₃₃Ha ba ntse ba lokolla petsana, beng ba eona ba re ho bona: “Le lokollela'ng petsana eo?”

₃₄Ba re: “Morena oa e hloka.”

₃₅Ba tlisa petsana ho Jesu, ba ala liaparo tsa bona holim'a eona, ba mo palamisa eona. ₃₆Ha a ntse a tsoela pele, batho ba ala liaparo tsa bona ka tseleng.

₃₇Ha a atamela, a le mothèong oa Thaba ea Mehloaare, bongata bohle ba barutuoa ba qala ho rorisa Molimo ka mantsoe a phahameng bo thabile, ka baka la liketso tsohle tse matla tseo bo li boneng, ₃₈ba re:

₃₉Eaba ba bang ba Bafarisi ba har'a letšoele, ba re ho eena: “Moruti, khalemela barutuoa ba hao.”

₄₀A araba, a re: “Kea le bolella, haeba barutuoa bana ba ka khutsa, majoe a tla hōoa.”

₄₁Ha a ntse a atamela, a bona motse, a o llela, ₄₂a re: “Hojane le uena u tsebile ka letsatsi lena tse hlahisang khotso! Empa joale li siretse mahlo a hao. ₄₃U tla fihleloa ke matsatsi, ao ka 'ona lira tsa hao li tla u etsetsa thibella, li u teele hare, li u patise kahohle, ₄₄li u ripitle, uena le bana ba hao ba ho uena, 'me li ke ke tsa siea lejoe holim'a lejoe le leng, hobane u sa ka ua tseba nako eo Molimo a u etetseng ka eona ho u pholosa.”

₄₅Jesu a kena ka Tempeleng, a qala ho leleka ba rekisang, ₄₆a re ho bona: “Ho ngotsoe, ho thoe:

₄₇O ne a ruta ka Tempeleng ka tsatsi le leng le le leng. Baprista ba baholo, le Litsebi tsa Molao, le baetapele ba sechaba ba ne ba batla ho mo timetsa, ₄₈empa ba ne ba sa fumane seo ba ka sa etsang, hobane batho bohle ba ne ba mo khomaretse, ba mo mamela.