Selelekela
1Erekaha ba bangata ba lekile ho ngola litaba tse etsahetseng har'a rōna, 2joalokaha re li neelelitsoe ke ba li boneng ka mahlo ho tloha qalong, 'me ba fetoha basebeletsi ba lentsoe, 3le 'na, hoba ke fuputse litaba tseo ka hloko ho tloha tšimolohong, ke fumane ho le molemo ho u ngolla tsona ka tlhatlhamano, Theofile ea khabane, 4hore u tsebe bonnete ba litaba tseo u li rutiloeng.
Tsebiso ea tsoalo ea Johanne Mokolobetsi
5Mehleng ea Heroda, khosi ea Judea, ho ne ho e-na le moprista e mong ea bitsoang Sakariea, oa sehlopha sa Abiea, mohats'a hae e le e mong oa barali ba Arone, lebitso la hae e le Elisabetha. 6Bobeli ba bona ba ne ba lokile pel'a Molimo, ba tsamaea melaong le litaelong tsohle tsa Morena, ho se moo ba ka nyatsuoang teng. 7Feela ba ne ba se na ngoana, hobane Elisabetha e ne e le nyōpa, 'me bobeli ba bona ba ne ba se ba hōlile.
8Eare ha Sakariea a ntse a sebetsa tsa boprista pel'a Molimo ka nako e beetsoeng sehlopha sa hae, 9ho ea ka moetlo oa boprista, a khethoa ka lōtho hore a kene ka Tempeleng ea Morena ho kubetsa, 10'me bongata bohle ba batho bo ne bo rapela kantle ka nako ea ha ho kubetsoa.
11Joale lengeloi la Morena la iponahatsa ho eena le eme lehlakoreng le letona la aletare ea mokubetso. 12Ha Sakariea a le bona, a tšoha, a tšoaroa ke tšabo. 13Empa lengeloi la re ho eena: “Se tšabe, Sakariea, hobane thapelo ea hao e utloiloe, mohats'a hao Elisabetha o tla u tsoalla mora, 'me u tla mo rea lebitso la Johanne. 14E tla ba thabo le nyakallo ho uena, 'me ba bangata ba tla thabela tsoalo ea hae, 15hobane o tla ba moholo pel'a Morena; ha a ka ke a noa veine leha e le seno se tahang, 'me o tla tlala Moea o Halalelang a sa le pōpelong ea 'm'ae. 16O tla sokollela ba bangata ba bana ba Iseraele ho Morena Molimo oa bona. 17O tla etella Morena pele ka moea le ka matla a kang a Elia, ho boelanya lipelo tsa bo-ntata le bana ba bona, le ba sa utloeng, maikutlong a ba lokileng, ho lokisetsa Morena sechaba se mo lokelang.”
18Sakariea a re ho lengeloi: “Ke tla tseba taba eo ka'ng, kaha ke hōlile, le mohats'a ka a tsofetse?”
19Lengeloi la mo araba, la re: “Ke 'na Gabariele, ea emang kapele ho Molimo, 'me ke rōmiloe ho bua le uena, le ho u bolella molaetsa ona o molemo. 20Bona, u tla ba semumu, u sitoe ho bua ho fihlela letsatsi leo litaba tsena li tla etsahala ka lona, hobane ha ua ka ua lumela lipolelo tsa ka, tse tla phethahala ka nako ea tsona.”
21Batho ba ne ba emetse Sakariea, 'me ba makaletse ho lieha ha hae ka Tempeleng. 22Eare ha a e-tsoa, a se a sitoa ho bua le bona, eaba ba elelloa hore o bone pono ka Tempeleng; eena a ba lekanyetsa, 'me a sala e le semumu.
23Eare ha matsatsi a tšebeletso ea hae a felile, a boela ha hae. 24Kamora' matsatsi ao Elisabetha, mohats'a hae, a emola, a ipata ka likhoeli tse hlano, a re: 25“Morena o entse joalo ho 'na mohla a khahliloeng ho tlosa sekhobo sa ka har'a batho.”
Tsebiso ea tsoalo ea Jesu
26Ka khoeli ea botšelela, lengeloi Gabariele la rōngoa ke Molimo motseng oa Galelea o bitsoang Nasaretha, 27ho moroetsana ea lebelelitsoeng ke monna ea bitsoang Josefa, oa ntlo ea Davida; lebitso la moroetsana e le Maria. 28Hoba le kene, la re ho eena: “Itumele, mohauheloa, Morena o na le uena!”
29A khathatseha ke polelo eo, 'me a ipotsa hore na tumeliso eo ke ea mofuta ofe. 30Lengeloi la re ho eena: “Se tšabe, Maria, hobane u fumane mohau ho Molimo. 31Bona, u tla emola, u belehe mora, 'me u tla mo rea lebitso la Jesu. 32O tla ba moholo, 'me o tla bitsoa Mora oa Ea Holimo-limo; Morena Molimo o tla mo fa terone ea ntat'ae Davida. 33O tla rena holim'a ntlo ea Jakobo ka ho sa feleng, 'me borena ba hae bo ke ke ba e-ba le bofelo.”
34Maria a re ho lengeloi: “Hoo ho ka etsahala joang, athe ke sa le moroetsana?”
35Lengeloi la mo araba, la re: “Moea o Halalelang o tla theohela ho uena, matla a Ea Holimo-limo a be holim'a hao; ka baka leo, eo u tla mo tsoala o tla bitsoa Ea Halalelang, Mora oa Molimo. 36Bona, mong ka uena, Elisabetha, le eena o emotse mora botsofaling ba hae, 'me khoeli ena ke ea botšelela ho ea neng a bitsoa nyōpa, 37hobane ha ho letho leha le le leng le ka sitang Molimo.”
38Eaba Maria o re: “Ke lekhabunyane la Morena; a ho be joalo ho 'na ho ea ka polelo ea hao!”
Eaba lengeloi le tloha ho eena.
Maria o etela Elisabetha
39Joale matsatsing ao Maria a tloha, a phakisa a ea naheng e maloti, motseng o mong oa Judea. 40A kena ka tlung ea Sakariea, 'me a lumelisa Elisabetha. 41Eitse ha Elisabetha a utloa tumeliso ea Maria, lesea la tlōla ka pōpelong ea Elisabetha, 'me a tlala Moea o Halalelang. 42A bua ka lentsoe le phahameng, a re: “U lehlohonolo har'a basali, ho lehlohonolo le tholoana ea pōpelo ea hao! 43Ho ntlela joang hore ke eteloe ke 'm'a Moren'a ka? 44Bona, ha lentsoe la hao la tumeliso le fihla litsebeng tsa ka, lesea le ile la tlōla ke nyakallo ka pōpelong ea ka. 45Ho lehlohonolo uena ea lumetseng, hobane litaba tseo u li boleletsoeng ke Morena li tla phethahala.”
Thoko ea Maria
46Eaba Maria o re:
47“Pelo ea ka e tlotlisa Morena,
moea oa ka o nyakalletse Molimo,
Mopholosi oa ka,
48hobane o ile a talima
ho eiseha ha lekhabunyane la hae.
Bonang, ho tloha joale
melōko eohle e tla re
'na ke lehlohonolo,
49hobane Ea Matla
o nketselitse tse kholo,
lebitso la hae lea halalela;
50ka mengoaha le mengoaha
o mohau ho ba mo tšabang.
51O entse tse matla ka tsoho la hae,
a qhalanya baikhōhōmōsi
le mehopolo ea bona;
52a theola babusi literoneng,
a phahamisa ba eisehang,
53a khōrisa ba lapileng ka tse molemo,
a khutlisa ba ruileng
ba se na letho,
54a thusa Iseraele mohlanka oa hae,
a mo hopola ka mohau,
55a hauhela Aborahama
le litlōhōlō tsa hae kamehla eohle,
joalokaha a buile
ho bo-ntat'a rōna.”
56Maria a hlola le Elisabetha khoeli tse ka bang tharo, a nt'o khutlela ha habo.
Tsoalo ea Johanne Mokolobetsi
57Joale nako ea Elisabetha ea ho beleha ea fihla, 'me a tsoala mora. 58Ba ahisaneng le eena le bang ka eena ba utloa hore Morena o mo ekelelitse mohau, 'me ba thaba le eena.
59Ka letsatsi la borobeli, ba tla bōlōtsa ngoana, 'me ba re ba mo reella ntat'ae, Sakariea. 60Empa 'm'ae a araba, a re: “Che, o tla bitsoa Johanne.”
61Ba re ho eena: “Ha ho le ea mong ho bang ka uena ea bitsoang ka lebitso lena.”
62Ba lekanyetsa ntat'ae, ba 'motsa hore na ekaba o rata ha ngoana a bitsoa mang.
63Hoba a kōpe letlapa, a ngola, a re: “Lebitso la hae ke Johanne.” Bohle ba makala. 64Joale hang-hang molomo oa hae oa buleha, leleme la hae la raroloha, 'me a bua, a boka Molimo. 65Tšabo ea oela bohle ba ahisaneng le eena, 'me litaba tseo kaofela tsa buuoa naheng eohle e maloti, ea Judea, 66bohle ba li utloang ba li bōlōka pelong tsa bona, ba re: “Ekaba ngoana eo e tla ba eng?” Letsoho la Morena le ne le fela le e-na le eena.
Boporofeta ba Sakariea
67Ntat'ae Sakariea a tlala Moea o Halalelang, a porofeta, a re:
68“Ho bokoe Morena,
Molimo oa Iseraele,
hobane o etetse sechaba sa hae,
a se lopolla.
69O re hlahiselitse Mopholosi
ea matla tlung ea Davida,
mohlanka oa hae,
70joalokaha a ne a bolele
ka molomo oa baporofeta
ba hae ba halalelang,
ho tloha khale-khale.
71O ne a re o tla re pholosa
lireng tsa rōna,
le matsohong a bohle
ba re hloileng;
72a etsetse bo-ntat'a rōna mohau,
a hopole selekane sa hae
se halalelang,
73e leng kano
eo a neng a e hlapanyetse
ntat'a rōna Aborahama,
ea hore re neoe
74ho mo sebeletsa re se na tšabo,
re namoletsoe matsohong
a lira tsa rōna,
75re halalela, 'me re lokile pel'a hae
ka matsatsi 'ohle
a ho phela ha rōna.
76'Uena, ngoana, u tla bitsoa
moporofeta oa Ea Holimo-limo,
hobane u tla etella Morena pele
ho lokisa litsela tsa hae,
77u tsebise sechaba sa hae
hore se tla pholosoa
kaho tšoareloa libe tsa sona.
78Ka mohau o moholo
oa Molimo oa rōna,
mafube a tsoang holimo
a tla re etela,
79ho bonesetsa ba lutseng lefifing
le moriting oa lefu,
le ho re tsamaisa
tseleng ea khotso.”
80Ngoana a hōla, a matlafala moeeng, 'me a hlola lefeelleng ho fihlela a hlahisoa ho Iseraele.
