MEETLO 11

₁Morena a bua ho Moshe le ho Arone, a re ho bona: ₂“Buang le bana ba Iseraele, le re: ‘Tsena ke liphoofolo tseo le ka li jang har'a liphoofolo tsohle tse teng lefatšeng. ₃Liphoofolo tsohle tse nang le likhōlana, tse thuisang, le ka li ja.

₄“ ‘Leha ho le joalo, le se ke la ja tsena tse latelang, tse thuisang feela, kapa tse nang le likhōlana feela: kamele ea thuisa, empa ha e na likhōlana; ka baka leo, ho lōna ha ea hloeka. ₅Pela ea thuisa, empa ha e na likhōlana, ka baka lena ho lōna ha ea hloeka. ₆'Mutlanyana oa thuisa, empa ha o na likhōlana; ka baka leo, ho lōna ha oa hloeka. ₇Kolobe e na le likhōlana, empa ha e thuise; ka baka leo, ho lōna ha ea hloeka. ₈Le se ke la ja nama ea tsona, le se ke la ama le lififi tsa tsona; ho lōna ha lia hloeka.

₉“ ‘Har'a liphoofolo tse phelang ka metsing, le ka ja tse latelang: tsohle tse ka maoatleng kapa ka metsing a linōka, tse nang le mapheo le mahehebu, le ka li ja. ₁₀Empa har'a libōpua tsohle tse hōlōbang, kapa tse sesang ka metsing, e ka ba tse ka maoatleng kapa ka linōkeng, tsohle tse se nang mapheo kapa mahehebu, ho lōna ke manyala. ₁₁E tla ba manyala ho lōna, 'me nama ea tsona le se ke la e ja; ho lōna le lififi tsa tsona e be manyala. ₁₂Tsohle tse ka metsing, empa li se na mapheo le mahehebu, ho lōna ke manyala.

₁₃“ ‘Har'a linonyana le tla ila tsena; ha le na ho li ja, hobane ke manyala: ntsu, le seoli, le letlaka; ₁₄'mankholi, le liphakoe ka mefuta ea tsona; ₁₅mefuta ea makhoaba; ₁₆mpshe, le khōhō-ea-lira, le leholosiane, le mefuta ea liphakoe; ₁₇sephōōkoana, le seinoli, le morubisi; ₁₈makhohlo, le letata, le lenong; ₁₉mokotatsie, le likokolofitoe ka mefuta ea tsona, le mohololi, le 'mankhane.

₂₀“ ‘Likokoanyana tsohle tse fofang, tse tsamaeang ka maoto a mane, ho lōna ke manyala. ₂₁Leha ho le joalo, har'a likokoanyana tsohle tse nang le mapheo, tse tsamaeang ka maoto a mane, le ka ja tse nang le monoto oa ho qōthōma holim'a lefatše. ₂₂Tsena le ka li ja: litsie ka mefuta ea tsona, le bookholane ka mefuta ea bona, le matjeketjane ka mefuta ea 'ona, le marutle ka mefuta ea 'ona. ₂₃Empa likokoanyana tsohle tse nang le maoto a mane ho lōna ke manyala.

₂₄“ ‘Tsena li tla le silafatsa, 'me mang kapa mang ea amang lififi tsa tsona o tla silafala ho fihlela ka phirimana. ₂₅Mang kapa mang ea nkang lififi tsa tsona o tla hlatsoa liaparo tsa hae, empa o tla sala a silafetse ho fihlela ka phirimana.

₂₆“ ‘Liphoofolo tsohle tse se nang likhōlana, kapa tse sa thuiseng, ha lia hloeka ho lōna, 'me ea li amang e tla ba o silafetse. ₂₇Har'a liphoofolo tsohle tse maoto a mane, tse hatang ka marō ho lōna ha lia hloeka, 'me ea li amang o tla sala a silafetse ho fihlela ka phirimana. ₂₈Ea nkang lififi tsa tsona o tla hlatsoa liaparo tsa hae, empa o tla sala a silafetse ho fihlela ka phirimana.

₂₉“ ‘Har'a liphoofolo tse tsamaeang holim'a lefatše ho lōna tsena ha lia hloeka: sèlè, le toeba, le bo-'mampharoane ka mefuta ea bona; ₃₀'mankhoeshepe, le mokholutsoane le phathakalle, le pōlō, le lempetje. ₃₁Har'a liphoofolo tsohle tse tsamaeang, tsena ho lōna ha lia hloeka. Mang kapa mang ea li amang ha li shoele o tla sala a silafetse ho fihlela ka phirimana. ₃₂Ntho e 'ngoe le e 'ngoe eo li oelang holim'a eona ha li shoele e tla ba e silafetse; e ka ba sejana se entsoeng ka lehong, kapa liaparo, kapa letlalo, kapa mokotla. Ntho e 'ngoe le e 'ngoe e sebelisoang e tla hlatsuoa ka metsi, empa e tla sala e silafetse ho fihlela ka phirimana, 'me kamora' moo e tla hloeka. ₃₃Sejana se seng le se seng sa letsopa, seo e 'ngoe ea tsona e oelang kahar'a sona, tsohle tse ka ho sona li tla silafala, 'me sejana seo eka khona le se pshatle. ₃₄Lijo tsohle tse ka ho sona tse ka jeoang, ha li ka tšèloa ka metsi ao, li tla silafala; le tsohle tse ka nooang, tse ka sejaneng seo, li tla silafala. ₃₅Ntho efe le efe eo ho hong ha lififi tsa tsona ho oelang holim'a eona e tla silafala; haeba e le onto kapa mohaoloana, eka khona li pshatloe. Li silafetse, 'me le ho lōna e tla ba li silafetse. ₃₆Leha ho le joalo, seliba kapa morifi o khakeletsang metsi, tsena ha li na ho silafala, empa ea amang lififi tsena eena oa silafala. ₃₇Haeba ho hong ha sefifi sena ho ka oela holim'a peō ea mofuta ofe kapa ofe, peō eo ha e silafale, ₃₈empa haeba peō eo e kolobile, 'me ho hong ha sefifi ho oela holim'a eona, peō eo ho lōna ha ea hloeka.

₃₉“ ‘Haeba e 'ngoe ea liphoofolo tseo le jang nama ea tsona e ichoella feela, mang kapa mang ea amang sefifi sa eona o tla silafala ho fihlela ka phirimana. ₄₀Mang kapa mang ea jang nama ea phoofolo e shoeleng, o tla hlatsoa liaparo tsa hae, empa o tla sala a silafetse ho fihlela ka phirimana. Ea tlosang sefifi sa eona o tla hlatsoa liaparo tsa hae, empa o tla sala a silafetse ho fihlela ka phirimana.

₄₁“ ‘Tsohle tse hahabang holim'a lefatše ke manyala, 'me li ke ke tsa jeoa. ₄₂Tsohle tse hōlōbang ka mpa, le tsohle tse tsamaeang ka maoto a mane, le tsohle tse nang le maoto a mangata har'a tse hahabang holim'a lefatše, tse joalo le se ke la li ja, hobane ke manyala. ₄₃Le se ke la silafatsa meea ea lōna ka tsohle tse hahabang, 'me le se ke la itšilafatsa ka tsona. ₄₄Ke 'na Morena Molimo oa lōna; ka baka leo, le ikhalaletse, 'me le tla halalela. Kahoo le se ke la itšilafatsa ka eng le eng e hahabang holim'a lefatše. ₄₅Ke 'na Morena ea le nyolotseng naheng ea Egepeta, hore ke be Molimo oa lōna; ka baka leo, le tla halalela, hobane kea halalela.

₄₆“ ‘Ona ke molao oa liphoofolo, le oa linonyana, le oa libōpuoa tsohle tse phelang, tse tsamaeang kahar'a metsi, le oa libōpuoa tsohle tse hahabang holim'a lefatše. ₄₇Le khetholle tse sa hloekang ho tse hloekileng, le liphoofolo tse phelang, tse ka jeoang le tse ke keng tsa jeoa.’ ”