Sebe sa Nadabe le Abihu
1Nadabe le Abihu, bara ba Arone, e mong le e mong a nka sekubetso sa hae, a kenya mollo ka ho sona, a tšèla mokubetso holim'a mollo, a nyehella Morena ka mollo o sa halaleleng, oo Morena a neng a sa mo laela oona. 2Eaba mollo o tsoa ho Morena, oa ba chesa, 'me ba shoela kapele ho Morena. 3Moshe a re ho Arone: “Sena ke seo Morena a neng a se bolela, ha a re: ‘Ke tla bonahatsa ho halalela ha ka ho ba leng haufinyane le 'na, 'me ke tla tlotlisoa kapele ho sechaba sohle.’ ” Arone a khutsa.
4Moshe a bitsa Mishaele le Elesafane, e leng bara ba Usiele, rangoan'a Arone, 'me a re ho bona: “Atamelang, le tlose litōpō tsa bana bana babo lōna mona, kapele ho Sehalalelo, le li ntšetse kantle ho liahelo.” 5Eaba baa tla, ba li nkela kantle ho liahelo, li ntse li apere liaparo tsa tsona, joalokaha Moshe a ne a laetse.
Meputso le mesebetsi ea baprista
6Moshe a re ho Arone, le ho bara ba hae Eleasare le Itamare: “Le se ke la hlantholla moriri oa lōna, kapa la hahōla liaparo tsa lōna, esere la shoa, 'me Morena a halefela phutheho eohle. Empa bana babo lōna, le ba ntlo eohle ea Iseraele, bona ba ka llela ho chesoa hona ho entsoeng ke mollo o hotelitsoeng ke Morena. 7Le se ke la tsoa monyakong oa Tente ea Morena, esere la shoa, hobane ole ea Morena e tlotsang e holim'a lihlooho tsa lōna.” Ba etsa kamoo Moshe a boletseng kateng.
8Morena a bua ho Arone, a re: 9“Ha le kena ka Tenteng ea Morena, uena, le bara ba hao, le se ke la noa veine kapa joala, esere la shoa. Ona e tla ba molao oa mehla eohle melōkong ea lōna. 10Ke ho re le tle le tsebe ho khetholla tse halalelang ho tse sa halaleleng, le tse hloekileng ho tse sa hloekang; 11hape le rute bana ba Iseraele melao eohle eo Morena a ba boleletseng eona ka molomo oa Moshe.”
12Moshe a re ho Arone, le ho Eleasare, le ho Itamare, bara ba Arone ba neng ba ntse ba phela: “Nkang nyehelo ea phofo e setseng nyehelong ea secheso sa Morena, le e je e sa lomosoa, le le pel'a aletare, hobane nyehelo eo e halalela ka ho fetisisa. 13Le e jelle sebakeng se halalelang, hobane ke seabo seo u se filoeng, se filoeng le bara ba hao, se tsoang nyehelong ea secheso ea Morena, kamoo ke laetsoeng kateng.
14“Sefuba sa nyehelo e akhōtsoang, le serope sa nyehelo e phahamisetsoang holimo, le li jelle sebakeng se hloekileng. Li jeoe ke uena, le bara ba hao, le barali ba hao, hobane ke seabo seo u se filoeng, se filoeng le bara ba hao, se tsoang mahlabelong a nyehelo ea teboho ea bana ba Iseraele. 15Ba tlise serope sa nyehelo e phahamisetsoang holimo, le sefuba sa nyehelo e akhōtsoang, 'moho le nyehelo ea secheso sa mafura, ho tla li akhōtsa e le nyehelo e akhōtsoang kapele ho Morena. Tsena e tla ba tsa hao, le tsa bara ba hao, e be seabo sa hao sa mehla eohle, joalokaha Morena a laetse.”
16Joale Moshe a batla pōli ea nyehelo e tlosang sebe, 'me a fumana e chesitsoe. A halefela Eleasare le Itamare, bara ba Arone ba neng ba ntse ba phela, a re: 17“Ke ka baka la'ng ha nyehelo e tlosang sebe le sa ka la e jella Sehalalelong, kaha e halalela ka ho fetisisa? Le e filoe hore e hlakole sebe sa phutheho, ka ho etsetsa phutheho eo tefelo ea sebe kapele ho Morena. 18Bonang, mali a pōli eo ha aa ka a tlisoa ka Sehalalelong! Le ne le tšoanela ebe le e jeletse Sehalalelong, joalokaha ke le laetse.”
19Arone a re ho Moshe: “Bona, kajeno ba nyeheletse Morena ka nyehelo ea bona e tlosang sebe, le ka nyehelo ea bona ea secheso, 'me tsena ke tse etsahetseng ho 'na. Haeba nka ja nyehelo e tlosang sebe kajeno, na hoo ho tla thabisa Morena?” 20Ha Moshe a utloa hoo, a khotsofala.
