Mahlomola a Jerusalema
1Motse o neng
o liila batho kahohle,
kajeno o bolutu hakaakang!
O n'o le moholo har'a lichaba,
kajeno o fetohile mohlolohali!
E n'e le mofumahali har'a lichaba,
kajeno o fetohile lekhabunyane!
2Jerusalema o lla
sa 'mokotsane bosiu,
keleli li keleketla marameng a hae.
Har'a baratuoa bohle ba hae,
ha ho le ea mong ea mo tšelisang.
Metsoalle ea hae eohle e mo ekile,
metsoalle e fetohile lira tsa hae.
3Ka baka la litlhoriso
le ho sebelisoa ka thata,
Juda e isitsoe bothōpuoeng.
Juda e phela kahar'a balichaba,
e hloka le sebaka sa ho phomola.
Bahlorisi ba eona bohle
ba e tsomelitse,
ba e tsometsa e le makaqabetsing.
4Tsela tsa Sione
li se li le bolutu,
hoba ha ho ea tlang
meketeng e halalelang.
Khoro tsa Sione tsohle
ha li na batho,
baprista ba eona
ba qetoa ke mefehelo,
baroetsana ba eona
ba matšoenyehong.
Sione e tlokotsing
tse bohlōkō haholo.
5Ba loantšang Sione
e s'e le babusi ba eona,
lira tsa eona li lutse ka boiketlo.
Morena o tliselitse
Sione matšoenyeho,
ka baka la libe tsa eona bongata.
Bana ba eona
ba isitsoe bothōpuoeng,
ba thōpiloe
ke ba neng ba ba loantša.
6Botle bohle bo se bo hlakohile,
bo hlakohile ho Morali oa Sione;
mahosana a hae a ka likhama,
a ka likhama
li sitoa ho fumana lekhulo;
li baleha
li se li kenoe ke mokhathala,
li baleha bamanakisi ba tsona.
7Nakong ea matšoenyeho a eona
le ea ho lelera,
Jerusalema e hopola matlotlo,
matlotlo a eona 'ohle,
ao e n'e le a eona
mehleng ea khale-khale.
Ha chaba sa eona
se oela matsohong a lira,
ha hoa ba le ea kileng
a e thusetsa.
Lira tsa eona li ile tsa e sheba,
tsa etsa metlae
ka ho timetsoa ha eona.
8Jerusalema e sitiloe haholo,
ka baka leo, e silafetse,
bohle ba neng ba e hlompha,
baa e nyelisa,
ba e nyelisa hobane ba e bonetse.
E, Jerusalema e qetoa ke mefehelo,
ea reteleha, e ipata sefahleho.
9Tšila tsa Jerusalema
li khomaretse,
li khomaretse aparong tsa eona,
ha ea k'a inahanela
pheletso ea eona.
Ho oa ha eona e bile ho makatsang,
ha hoa ba le ea mong
ea e tšelisang.
“Oho, Morena,
ak'u bone matšoenyeho a ka,
sera ke sena kajeno sea ithorisa!”
10Sera se nanabelitse
letsoho la sona,
sa le nanabetsa,
sa nka maruo 'ohle a eona;
Jerusalema e bone
balichaba ba kena,
ba kena ka Sehalalelong sa eona,
bona bao u neng u laetse,
u itse ba se kene
phuthehong ea hao.
11Chaba sohle sa eona
se qetoa ke mefehelo,
se feheloa
ha se ntse se sikila bohobe,
matlotlo a sona se a ananya lijo,
hore se 'ne se tsebe ho phela.
“Oho, Morena, ak'u talime,
u be u bone;
bona kamoo ke nyelisehang kateng!”
12“Lōna bohle, bo-mofeta-ka-tsela,
na hoo ha ho re letho ho lōna?
Qamakang kahohle le ke le bone:
Na matšoenyeho
a tšoanang le a ka a teng,
matšoenyeho ao
ke otliloeng ka 'ona,
ao Morena a a theoletseng holim'a ka,
mohl'a tsatsi la khalefo
e tlōkōmang ea hae?
13Morena o rōmetse mollo
o theoha holimo,
oa nkena masapong,
oa chachametsa;
maotong a ka o chehile leraba,
a etsa hore ke be ke khutle,
ke khutle ka santhao.
O nkentse hore ke sale ke le inotši,
o ntjesa bolutu kamehla eohle.
14“Libe tsa ka tsohle
Morena oa li tseba,
ka tsoho la hae a li lōha,
tsa etsa thapo,
molaleng oa ka
a li tlama joaloka joko,
boima ba tsona
ba mphokolisa haholo.
Morena o neelane ka 'na
ho lira tsa ka,
a 'nea bao
nke keng ka ba loantša.
15Linatla tsa ka tsohle
tse neng li mpotile,
kaofela ha tsona
Morena o li phetšetse;
o 'memetse lebōtho
ho tla mphutuhela,
le mphutuhele,
chacha ea ka le e pilile.
Morena o tlabiketse moroetsana,
Morali oa Juda,
a mo tlabikela
sa morara setlhōtlelong.
16“Ke ka baka la tsona ke llang,
mahlo a ka a keleketla likeleli,
hobane motšelisi oa ka
o hōle le 'na,
eena ea neng a ka khatholla
moea oa ka.
Bana ba ka ba setse ba itlhōphere,
hobane 'na
ke hlōtsoe ke sera sa ka.”
17Sione e phakalalitse matsoho a eona,
empa ea ka e tšelisang
eena ha a eo.
Malebana le Jakobo,
Morena o entse taelo:
Lira tsa hae
li mo etsetse sakana-la-nkōpe.
Jerusalema e fetohile manyala,
Jerusalema e silafetse.
18“Morena eena o lokile,
hobane ke fetohetse molao oa hae.
Lōna lichaba tsohle, 'mameleng!
Talimang,
le bone matšoenyeho a ka!
Thoetsana ea ka
le tlhankana ea ka,
kaofela ha bona
ba isitsoe bothōpuoeng!
19Ke ipilelitse ho baratuoa ba ka,
empa ke bona ba ileng ba nkèka.
Baprista le baetapele ba ka
ba shoele,
ba shoeletse literateng tsa motse,
ba e-shoa ba ntse ba sikila bohobe,
hore ba tle ba tsebe ho iphelisa.
20Oho, Morena, bona ke tsielehile!
Moea oa ka o ferekane haholo!
Pelo ea ka e tšoenyehile haholo,
hobane ke u fetohetse haholo!
Literateng sabole ea bolaea,
ka matlung ho nkha lefu feela!
21Batho ba utloile mefehelo ea ka,
empa ha ho na motho
ea ntšelisang.
Lira tsa ka tsohle
li utloile tsietsi ea ka,
li nyakalalitsoe
ke ketso ena ea hao.
Potlakisa tsatsi
le boletsoeng ke uena,
lira tsa ka
li tle li tšoane le 'na.
22Bokhopo ba lira tseo
bo pepesehe ho uena,
le tsona kotlo ea tsona
li e fumane,
u li otle
joalokaha le 'na u nkotlile,
u nkotla
ka baka la libe tsa ka tsohle.
Mefehelo ea ka e mengata haholo,
pelo ea ka le eona e nyahame.”
