Bagibeone ba thétsa Joshua
1Ha likhosi tsohle tse kamose oane ho Jorodane, le tse maralleng, le tse liphuleng, le tse lebōpong lohle la Leoatle le Leholo, kapele ho Lebanone, e leng tsa Bahete, le tsa Baamore, le tsa Bakanana, le tsa Baperise, le tsa Bahife, le tsa Bajebuse, li utloa litaba tsena, 2tsa ba ntsoeleng, tsa ikopanya 'moho ho loantša Joshua le Baiseraele.
3Empa ha baahi ba Gibeone ba utloa seo Joshua a se entseng Jeriko, le Ai, 4ba lōha mano. Ba tsamaea ba ikhakantse joalokaha eka ke barōmuoa, ba bofa mekotla e tsofetseng litonking tsa bona, le makuka a tsofetseng a veine, a seng a ile a phatloha, a ba a rōkoa. 5Ba roala meqathatso e tsofetseng, e seng e rōkiloe. Liaparo tsa bona e ne e le tse namphaneng; ba nkile mofao oa bohobe bo likokotoana, bo hlobo.
6Ba fihla ho Joshua, liahelong tsa hae, Gilegale, ba re ho eena le ho banna ba Iseraele: “Re tsoa naheng e hōle, 'me re kōpa hore u etse selekane le rōna.”
7Banna ba Baiseraele ba re ho Bahife bana: “Mohlomong le ntse le phela haufi le rōna. Joale re ka etsa selekane le lōna joang?”
8Ba araba Joshua, ba re: “Re bahlanka ba hao.”
Joshua a ba botsa hape, a re: “Le bo-mang? Hona le tsoa kae?”
9Ba mo araba, ba re: “Bahlanka ba hao ba tsoa naheng e hōle, ka baka la lebitso la Morena Molimo oa lōna, hobane re utloile botumo ba hae, le tsohle tseo a li entseng Egepeta. 10Re utloile le seo a se entseng ho likhosi tse peli tsa Baamore, tse neng li le kamose oane ho Jorodane, e leng Sihone, khosi ea Heshebone, le Oge, khosi ea Bashane, ea neng a ahile Ashetarote. 11Joale baholo ba sechaba sa rōna, le baahi bohle ba naha ea rōna, ba re: ‘Nkang mofao, le tsamaee, le e'o ba khahlanyetsa, le re ho bona: Re bahlanka ba lōna, 'me re le kōpa ho etsa selekane le rōna.’ 12Bohobe bona ba rōna bo ne bo sa chesa ha re bo nka malapeng a rōna, re etsa mofao, mohl'a letsatsi leo ka lona re neng re kena leetong la ho tla ho uena, empa joale ak'u bone: Bo se bo le likokotoana, bo le hlobo. 13Makuka ana a veine a ne a le macha ha re a tlatsa, empa joale ak'u bone: A se a phatlohile. Liaparo tsena tsa rōna, le meqathatso ena ea rōna, li se li tsofetse ka baka la ho tsamaea leeto le lelelele hakana.”
14Banna ba Baiseraele ba ngoatha mofao oa baeti, empa ba se ke ba batla keletso ea Morena. 15Joshua a etsa khotso le bona, a ba a etsa selekane le bona sa hore a ke ke a ba bolaea. Mahosana le 'ona a ba hlapanyetsa.
16Kamora' matsatsi a mararo ba entse selekane le bona, Baiseraele ba utloela hore sechaba sena se haufi le bona, se ahelane le bona. 17Bana ba Iseraele ba tsoela pele leetong, 'me ka letsatsi la boraro ba fihla metseng ea sechaba sena. Metse ea sona e ne e le Gibeone, le Kefira, le Beerote, le Kiriate-Jearime. 18Empa bana ba Iseraele ba se ke ba ba bolaea, hobane mahosana a sechaba a ne a hlapanyelitse Bagibeone ka Morena Molimo oa Iseraele. Sechaba sohle sa korotlela mahosana.
19Mahosana 'ohle a re ho sechaba sohle: “Kaha re ba hlapanyelitse ka Morena Molimo oa Iseraele, re ke ke ra ba ntša kotsi. 20Re tla ba etsa tjena: Re tla ba tlohela ba phele, esere ra itlisetsa khalefo, ka baka la kano eo re neng re ba hlapanyetse eona.” 21Mahosana a boela a re ho sechaba: “A re ba tloheleng ba phele, e le hore e tle e be bona ba roallelang sechaba sena sohle patsi, ba se khellang metsi.” Sechaba sa etsa joalokaha mahosana a boletse.
22Joshua a bitsa Bagibeone, a bua le bona, a re: “Ke hobane'ng le ileng la re thetsa, la re le tsoa hōle, empa le ntse le ahelane le rōna? 23Ka baka lena he, le rōhakehile, 'me ha le ka ke la phetsa ho ba makhoba a roallelang ntlo ea Molimo oa ka patsi, a e khellang metsi.”
24Ba araba Joshua, ba re: “Bahlanka ba hao ba ile ba bolelloa kamoo Morena Molimo oa lōna, a ileng a laela Moshe, mohlanka oa hae, hore a le nee naha ena eohle, 'me le bolaee baahi ba eona ba kapele ho lōna. Ka baka leo, re ile ra tšaba hore le tla re bolaea, 'me ke ka hona re entseng hona. 25Bona mona, re matsohong a hao, seo u bonang hore se lokile, uena u re etse sona.”
26Joshua a etsa joalo, a ba lopolla matsohong a bana ba Iseraele, 'me ba se ke ba ba bolaea. 27Empa ho tloha ka lona letsatsi leo, Joshua a ba etsa makhoba a roallelang sechaba patsi, a se khellang metsi, le a roallelang aletare ea Morena patsi, le a e khellang metsi sebakeng seo Morena a tla se khetha, ho fihlela kajeno-ea-bokajeno.
