Sebe sa Akane
1Bana ba Iseraele ba tlōla molao ka ho nka lintho tse rōhakehileng. Akane, mora oa Karimi, mora oa Sabedi, mora oa Sera, oa morabe oa Juda, a nka lintho tse rōhakehileng, 'me khalefo ea Morena ea tlōkōmela bana ba Iseraele.
2Ha Joshua a le Jeriko a rōma banna Ai, e pel'a Bete-Afene, ka bochabela ho Bethele. A bua ho bona, a re: “Tsamaeang le e'o hloela naha.” Banna bao ba nyolohela teng, ba hloela Ai.
3Ha ba khutlela ho Joshua, ba re ho eena: “U se ke ua rōmela bahlabani bohle. Rōmela bahlabani ba ka bang kete tse peli kapa ba ka bang kete tse tharo ho futuhela Ai. U se ke ua khathatsa bahlabani bohle ho ea moo, hobane baahi ba Ai ba 'maloana.” 4Eaba bahlabani ba ka bang kete tse tharo ba nyolohela teng, empa ba baleha banna ba Ai. 5Banna ba Ai ba bolaea banna ba Iseraele ba ka bang mashome a mararo a metso e tšeletseng. Ba ba phalalisa ho tloha khorong ea motse ho ea fihla Shebarime, ba ba bolaela motheong. Baiseraele ba nyahama lipelo, tsa ba joaloka metsi.
6Joshua le baholo ba Iseraele ba hahōla liaparo tsa bona, ba itihela fatše ka lifahleho, kapele ho areka ea Morena, ho fihlela ka phirimana. Ba itšèla ka lerōle lihloohong. 7Joshua a re: “Oho, Morena Molimo, ke ka baka la'ng u tšelisitseng sechaba see nōka ea Jorodane, ho tla neelana ka rōna matsohong a Baamore, hore ba re timetse? Hoja ebe re ile ra khotsofalla ho aha mose oane ho Jorodane! 8Kea u rapela Morena, ke tla re'ng ha e le moo Baiseraele ba balehile lira tsa bona? 9Ha Bakanana, le baahi bohle ba naha ena ba utloa, ba tla re likanela, ba re felise lefatšeng. Lebitso lee la hao le leholo, u tla le etsetsa eng?”
10Morena a re ho Joshua: “Ema! Ke hobane'ng ha u itihela fatše ka sefahleho? 11Baiseraele ba entse sebe, ba bile ba robile selekane sa ka, seo ke ba laetseng sona. Ba nkile le lintho tse rōhakehileng; ba li utsoitse, ba li patile, ba li kentse har'a thepa ea bona. 12Ka baka leo, bana ba Iseraele ba ke ke ba tseba ho thulana le lira tsa bona; ba tla baleha lira tsa bona, hobane ba rōhakiloe. Ha ke sa tla hlola ke e-ba le lōna, haese feela ha le ka timetsa ntho eo e rōhakehileng har'a lōna.
13“Ema, u hloekise sechaba, 'me u re ho sona: ‘Itlhoekisetseng letsatsi la hosasane, hobane Morena Molimo oa Iseraele, o bua tjena: Thōhako e teng har'a lōna, lōna Baiseraele! Ha le na ho tseba ho thulana le lira tsa lōna, ho fihlela le tlosa ntho eno e rōhakehileng har'a lōna.
14“ ‘Ka baka leo, hosasane le tla tlisoa mona ka merabe ea lōna. Morabe oo Morena a tla o khetha, o tla atamela ka malapa a oona; lelapa leo Morena a tla le khetha le tla atamela ka lihlooho tsa matlo a lona, 'me ntlo eo Morena a tla e khetha, banna ba eona ba tla atamela ka bomong. 15Monna ea tla khethoa, e leng ea nang le ntho e rōhakehileng, o tla chesoa ka mollo, eena le tsohle tseo a nang le tsona, hobane o robile selekane sa Morena, le hobane o entse ketso e lihlong sechabeng sa Iseraele.’ ”
Akane oa ahlōloa
16Joshua a tsoha ka malungoalungoana, a atametsa Baiseraele ka merabe ea bona, 'me morabe oa Juda oa khethoa. 17Malapa a Juda a atametsoa, eaba o khetha lelapa la Sera. Banna ba lelapa la Sera ba atametsoa ka bomong, eaba ho khethoa Sabedi. 18Joale banna ba ntlo ea Sabedi ba atametsoa ka bomong, 'me ha khethoa Akane, mora oa Karimi, mora oa Sabedi, mora oa Sera, oa morabe oa Juda.
19Eaba Joshua o re ho Akane: “Ngoan'aka, kea u rapela: Tlotlisa Morena Molimo oa Iseraele, u ipolele ho eena. Kea u rapela: Mpolelle seo u se entseng. U se ke ua mpatela letho.”
20Akane a araba Joshua, a re: “Ruri ke sitetsoe Morena Molimo oa Iseraele, 'me ke entse tjena le tjena. 21E ile eare ha ke bona seaparo se setle-setle har'a khapo e tsoang Shinare, le silefera e ka etsang boima ba likilo tse peli, le setene sa khauta se ka etsang boima ba halofo ea kilo, ka li tsoela pelo, eaba kea li nka. Ke li epetse fatše, bohareng ba tente ea ka. Silefera e alelitse katlase ho tsona.”
22Joshua a rōma maqosa, a mathela ka tenteng. Maqosa ao a fumana li epetsoe ka tenteng ea hae, silefera e li alelitse. 23Maqosa a ntša lintho tsena ka tenteng, a li tlisa ho Joshua, le ho bana ba Iseraele bohle, a li bea fatše kapele ho Morena.
24Joale bo-Joshua le Baiseraele bohle ba nka Akane, mora oa Sera, le silefera, le seaparo, le setene sa khauta, le bara ba hae, le barali ba hae, le likhomo tsa hae, le litonki tsa hae, le linku tsa hae, le tente ea hae, le tsohle tseo a neng a e-na le tsona; ba li isa ka khohlong ea Akore. 25Joshua a re: “Ke ka baka la'ng u re tšoentseng tjee? Le uena, kajeno lena, Morena o tla u tšoenya.”
Eaba Baiseraele bohle ba mo tlepetsa ka majoe; ba tlepetsa le ba lelapa la hae ka majoe, ba ba chesa ka mollo. 26Ba khōbella majoe holim'a hae, 'me le kajeno-ea-bokajeno a ntse a le teng. Khalefo e tlōkōmang ea Morena ea kokobela. Ke ka baka leo le kajeno-ea-bokajeno sebaka seo se ntseng se bitsoa ka lebitso la Khohlo ea Akore.
