JOSHUA 24

₁Joshua a memela merabe eohle ea Iseraele, Shekeme. A bitsa baholo ba Baiseraele, le lihlooho tsa bona, le baahlōli ba bona, le balaoli ba bona. Ba itlhahisa kapele ho Morena.

₂Joshua a re ho sechaba sohle: “Morena Molimo oa Iseraele, o bua tjena: ‘Mehleng ea khale-khale, bontat'a lōna, e leng Tera, ntat'a Aborahama le ntat'a Nakore, ba ne ba ahile mose oane ho Nōka, 'me ba sebeletsa melimo e meng. ₃Ka nka ntat'a lōna Aborahama mose oane oa Nōka, ka mo tsamaisa har'a naha eohle ea Kanana. Ka ngatafatsa bana ba hae, ka mo nea Isaka. ₄Isaka ka mo nea Jakobo le Esau; Esau ka mo nea naha e maralla ea Seire hore e be ea hae. Jakobo, eena, le bana ba hae, a theohela Egepeta.

₅“ ‘Hamorao ka rōmela Moshe le Arone, 'me ka otla Egepeta ka lioa tseo ke ileng ka li etsa har'a eona. Hamorao ka le ntša moo. ₆Ka ntša bo-ntat'a lōna Egepeta, 'me ba fihla leoatleng. Baegepeta ba phalalisa bo-ntat'a lōna ka likariki tsa ntoa, le ka lipere ho ea fihla Leoatleng la Lehlaka. ₇Ke ha bontat'a lōna ba ipiletsa ho Morena, 'me eena a hlahisa lefifi pakeng tsa lōna le Baegepeta. A phuthumanya leoatle holim'a Baegepeta, a ba pupetsa ka lona, 'me le bone seo ke se entseng Baegepeta. La phela lehoatateng ka nako e telele.

₈“ ‘Eaba ke le tlisa naheng ea Baamore ba neng ba phela mose oane ho Jorodane. Ba le loantša, empa ka neelana ka bona matsohong a lōna. Naha ea bona ea e-ba ea lōna, 'me ka ba timetsa kapele ho lōna. ₉Joale ha hlaha Balake, mora oa Sipore, khosi ea Moabe, le eena a loantša Baiseraele. A rōmela maqosa ho Bileame, mora oa Beore, hore a le rōhake. ₁₀Empa ka se ke ka rata ho mamela Bileame, ka baka leo, a ba a le hlohonolofatsa. Kahoo ka le lopolla matsohong a hae.

₁₁“ ‘La tšela Jorodane, la fihla Jeriko. Banna ba Jeriko, le Baamore, le Baperise, le Bakanana, le Bahete, le Bagirigashe, le Bahife, le Bajebuse, ba le loantša, empa ka neelana ka bona matsohong a lōna. ₁₂Ka eteletsa bōbi kapele, 'me ba ba leleka kapele ho lōna. Ba leleka le likhosi tse peli tsa Baamore; e seng ka sabole ea hao, kapa ka seqha sa hao. ₁₃Eaba ke le nea naha eo le sa e sebeletsang, le metse eo le sa e hahang, 'me la aha ho eona. La ja le litholoana tsa masimo a morara le tsa masimo a mohloaare, ao le sa kang la a lema.’

₁₄“Ka baka leo he, tšabang Morena, le mo sebeletse ka botšepehi le ka 'nete, le furalle melimo eo bo-ntat'a lōna ba neng ba e sebeletsa ha ba le mose oane ho Nōka, leha ba le Egepeta, 'me lōna le sebeletse Morena. ₁₅Haeba le bona hore ke ntho e mpe ho sebeletsa Morena, ikhetheleng hona kajeno hore na le tla sebeletsa mang: E ka ba melimo eo bo-ntat'a lōna ba neng ba e sebeletsa ha ba le mose oane ho Nōka, kapa melimo ea Baamore, bao le ahileng naheng ea bona. Empa ha e le 'na le ba lelapa la ka re tla sebeletsa Morena.”

₁₆Sechaba sa araba, sa re: “Le khale! ha re ka ke ra furalla Morena, ra sebeletsa melimo esele, ₁₇hobane Morena Molimo oa rōna, ke eena ea re nyolotseng le bo-ntat'a rōna Egepeta, moo re neng re le makhoba teng. Ke eena ea entseng lipontšo tse kholo, a re baballa tseleng eohle eo re e tsamaileng, le har'a lichaba tsohle tseo re fetileng har'a tsona. ₁₈Morena ke eena ea ileng a falatsa lichaba tsohle tse neng li le kapele ho rōna, le Baamore ba neng ba ahile naheng ena. Ka baka leo, le rōna re tla sebeletsa Morena, hobane ke eena Molimo oa rōna.”

₁₉Joshua a re ho sechaba: “Le ke ke la sebeletsa Morena, hobane ke Molimo ea halalelang, ke Molimo ea boulelang. A ke ke a le tšoarela litšito tsa lōna, kapa libe tsa lōna. ₂₀Haeba le ka furalla Morena, la sebeletsa melimo esele, o tla le fetohele, a le etse hampe, a le timetse, le hoja a kile a le etsa hantle.”

₂₁Sechaba sa re ho Joshua: “Che, re tla sebeletsa Morena.”

₂₂Joshua a boela a re ho sechaba: “Lōna, ka bolōna, lea ipakela hore le ikhethetse ho sebeletsa Morena!”

Sa re: “E, re lipaki!”

₂₃Joshua a re: “Ha ho le joalo, furallang melimo esele, e teng har'a lōna, 'me le lebise lipelo tsa lōna ho Morena Molimo oa Iseraele.”

₂₄Sechaba sa re ho Joshua: “Re tla sebeletsa Morena Molimo oa rōna, 'me re tla mamela lentsoe la hae.”

₂₅Ka lona letsatsi leo Joshua a etsa selekane le sechaba, a se beela molao le taelo a le Shekeme. ₂₆Joshua a ngola mantsoe ana Bukeng ea Molao oa Molimo. A nka lejoe le leholo, a le hloma moo, tlas'a sefate sa eike, se neng se le haufi le Sehalalelo sa Morena.

₂₇Eaba Joshua o re ho sechaba sohle: “Bonang, lejoe lena e tla ba paki e tla re tsoa, hobane le utloile lipolelo tsohle tsa Morena, tseo a li buileng ho rōna. Ka baka leo, ke paki e tla le tsoa, haeba le ka latola Molimo oa lōna.” ₂₈Eaba Joshua o qhala sechaba, 'me motho ka mong a khutlela ha hae.

₂₉Kamora' tsena Joshua, mora oa Nune, mohlanka oa Morena, a shoa a le lilemo tse lekholo le leshome. ₃₀Ba mo epela naheng eo a e jeleng lefa, Timina-Sera, e naheng e maralla ea Efraime, ka leboea ho thaba ea Gaashe.

₃₁Baiseraele ba sebeletsa Morena ka matsatsi 'ohle a bophelo ba Joshua, le ka matsatsi 'ohle a ho phela ha baholo ba ileng ba 'na ba phela kamora' lefu la Joshua, ba neng ba tseba mesebetsi eohle ea Morena, eo a neng a e etselitse Baiseraele.

₃₂Masapo a Josefa, ao bana ba Iseraele ba neng ba ile ba nyoloha le 'ona Egepeta, ba a epela Shekeme, seratsoaneng seo Jakobo a neng a ile a se reka ho bana ba Hamore, ntat'a Shekeme, ka lichelete tse lekholo tsa silefera, 'me ea e-ba lefa la bana ba Josefa.

₃₃Le Eleasare, mora oa Arone, a shoa. Ba mo epela Gibea, motseng oa mora oa hae Finease, oo a neng a o neoe, o naheng e maralla ea Efraime.