Gibeone ea thibelloa
1Joale Adoni-Sedeke, khosi ea Jerusalema, a utloa hore Joshua o hapile motse oa Ai, o bile o o ripitlile ho hang; le hore seo a neng a se etse motseng oa Jeriko le ho khosi ea eona, o se entse motseng oa Ai le ho khosi ea eona. A utloa le hore baahi ba Gibeone ba entse khotso le Baiseraele, 'me ba bile ba se ba phela har'a bona. 2A tšoha haholo, hobane Gibeone e ne e le motse o moholo, o kang o mong oa metse ea moreneng, 'me o le moholo ho feta Ai, le banna bohle ba oona e le linatla. 3Eaba Adoni-Sedeke, khosi ea Jerusalema, o rōmela molaetsa ho Hohame, khosi ea Heborone; le ho Pirame, khosi ea Jaremute; le ho Jafia, khosi ea Lakishe; le ho Debiri, khosi ea Egelone, o re: 4“Nyolohelang ho 'na, le tl'o nthusa ke hape Gibeone, hobane baahi ba eona ba se ba entse khotso le Joshua le bana ba Iseraele.”
5Likhosi tsena tse hlano tsa Baamore, e leng khosi ea Jerusalema, le khosi ea Heborone, le khosi ea Jaremute, le khosi ea Lakishe, le khosi ea Egelone, tsa ikopanya, tsa nyoloha le mabōtho a tsona 'ohle, tsa hloma malebana le Gibeone, tsa e futuhela.
6Banna ba Gibeone ba rōmela molaetsa ho Joshua, liahelong tsa hae Gilegale, ba re: “U se ke ua phutha matsoho a hao, ua lahla bahlanka ba hao; nyolohela ho rōna kapele, u tl'o re thusa, 'me u re pholose. Likhosi tsohle tsa Baamore tse phelang naheng e maralla li re likanetse.”
Joshua o hlōla Baamore
7Joshua a nyoloha Gilegale, a e-na le bahlabani bohle, le banna bohle ba bahale. 8Morena a re ho Joshua: “U se ke ua ba tšaba, hobane ke se ke u neile bona. Ha ho monna le ea mong oa bona ea tla ema kapele ho uena.”
9Joshua a tsamaea bosiu bohle ho tloha Gilegale, 'me a ba futuhela ka ho ba tsometsa. 10Morena a ba ferekanya, Baiseraele ba ba rinyetsa Gibeone. Ba ba phalalisa ho ea fihla lekhalong la Bete-Horone, 'me ba ba bolaea ho ea fihla Aseka, le ho ea fihla Makeda. 11Eare ha ba ntse ba baleha Baiseraele, ba le motheong oa Bete-Horone, Morena a ba nesetsa sefako se linaka, se tsoang leholimong, ba ba ba ea fihla Aseka, 'me ba e-shoa. Ba bolailoeng ke sefako ba e-ba bangata ho feta ba bolailoeng ke Baiseraele ka sabole.
12Ka lona letsatsi leo, leo Morena a ileng a neelana ka Baamore ho bana ba Iseraele ka lona, Joshua a bua ho Morena, moo Baiseraele ba ntseng ba bona, a re:
“Uena, letsatsi,
ema themelele! holim'a Gibeone!
Le uena khoeli,
themelele! holim'a Aiealone!”
13Letsatsi la ema themelele! le khoeli ea ema themelele! ho fihlela ha sechaba se qetile ho iphetetsa ho lira tsa sona. Na hoo ha hoa ngoloa bukeng ea Jashare?
Letsatsi la ema themelele! har'a sepakapaka, la nka nako e ka etsang letsatsi lohle le sa potlakele ho likela. 14Pele ho mona, le kamorao ho mona, ha ho e-s'o be le letsatsi le kang lena, leo ka lona Morena a kileng a mamela lentsoe la motho, hobane Morena o ne a loanela Iseraele.
15Joshua a khutlela liahelong tsa hae Gilegale, a e-na le Baiseraele bohle.
Joshua o hapa likhosi tse hlano tsa Baamore
16Likhosi tsena tse hlano tsa baleha, tsa ipata ka lehaheng la Makeda. 17Joshua a tsebisoa, ha thoe: “Likhosi tse hlano li fumanoe li ipatile ka lehaheng la Makeda.”
18Joshua a re: “Phikolosetsang majoe a maholo molomong oa lehaha, le bee balebeli moo, ba li lebele. 19Empa le se ke la lula moo; le phalalise lira tsa lōna, le bolaee ba saletseng morao. Le se ke la ba lumella ho kena metseng ea bona, hobane Morena Molimo oa lōna, o le neetse bona matsohong.”
20Ha Joshua le bana ba Iseraele ba qetile ho ba rinya, ho fihlela ba ba ba timela, haese masalla a bona a ileng a kena metseng e nang le liqhobosheane; 21sechaba sohle sa khutlela liahelong tsa Joshua tse Makeda, ka khotso. Ha ho ea kileng a nyatsa bana ba Iseraele, leha e le ho nyefola e mong oa bona feela.
22Joale Joshua a re: “Tlosang majoe molomong oa lehaha, le ntše likhosi tseo tse hlano ka lehaheng, le li tlise ho 'na.” 23Ba etsa joalo. Ba ntša likhosi tseo tse hlano ka lehaheng, ba li tlisa ho eena, e le khosi ea Jerusalema, le khosi ea Heborone, le khosi ea Jaremute, le khosi ea Lakishe, le khosi ea Egelone. 24Eare ha ba tlisa likhosi tsena ho Joshua, Joshua a bitsa banna bohle ba Baiseraele, a re ho baokameli ba bahlabani ba neng ba ile le eena: “Tloong, le tl'o hata likhosi tsena melaleng.” Ba tla, ba hata likhosi tseo melaleng.
25Joshua a re ho bona: “Le se ke la tšaba kapa la tsieleha. Le be matla, le be sebete haholo, hobane lira tsa lōna tsohle, tseo le li loantšang, Morena o tla li etsa tjena.” 26Kamora' tsena Joshua a otla likhosi tseo, a li bolaea, a li leketlisa lifateng tse hlano. Litōpō tsa tsona tsa leketla lifateng moo ho fihlela mantsiboea.
27Ha letsatsi le likela, Joshua a laela, hore ba theole litōpō tseo lifateng. Ba li akhela ka lehaheng leo likhosi li neng li ipatile ka ho lona. Ba bea majoe a matonana molomong oa lehaha leo, 'me majoe ao a ntse a le teng le kajeno-ea-bokajeno.
Joshua o hapa metse e meng ea Baamore
28Ka lona letsatsi leo Joshua a hapa motse oa Makeda, 'me a bolaea khosi ea oona ka sabole, a timetsa ho hang bohle ba neng ba phela motseng oo, a se ke a siea le ea mong. A etsa khosi ea Makeda joalokaha a ile a etsa khosi ea Jeriko.
29Joshua, a e-na le Baiseraele bohle, a tloha Makeda, a ea Lebena, 'me a futuhela motse oa Lebena. 30Le oona motse ona Morena a neelana ka oona matsohong a bana ba Iseraele. A neelana le ka khosi ea oona. Joshua a bolaea khosi eo, le batho bohle ba phelang motseng oo, ka sabole, 'me a se ke a siea le ea mong. Khosi ea teng a e etsa joalokaha a ile a etsa khosi ea Jeriko.
31Joshua, a e-na le Baiseraele bohle, a tloha Lebena, a ea Lakishe, a etsetsa motse oo thibella, a o futuhela. 32Morena a neelana ka motse oo oa Lakishe matsohong a bana ba Iseraele. Ka letsatsi la bobeli a o hapa, a bolaea batho bohle, ba neng ba phela motseng oo, ka sabole, ho latela sohle seo a ileng a se etsa motseng oa Lebena. 33Joale Horame, khosi ea Gesere, a phalla ho tla thusa motse oa Lakishe. Joshua a 'molaea le sechaba sa hae, a se ke a siea le ea mong.
34Joshua, a e-na le Baiseraele bohle, a tloha Lakishe, a ea Egelone, a etsetsa motse oo thibella, a o futuhela. 35Ka lona letsatsi leo ba o hapa, ba bolaea batho bohle ba neng ba phela ho oona, ka sabole. Batho bohle ba neng ba phela motseng oo a ba timetsa ho hang ka lona letsatsi leo, ho latela sohle seo a ileng a se etsa motseng oa Lakishe.
36Joshua, a e-na le Baiseraele bohle, a tloha Egelone, a ea Heborone, 'me ba futuhela motse oo. 37Ba o hapa, ba bolaea batho ba neng ba phela ho oona, ka sabole, ba ba bolaea le khosi ea teng. Ba hapa le metsana eohle ea teng, ba bolaea batho bohle ba neng ba phela ho eona. A se ke a siea le ea mong, ho latela sohle seo a ileng a se etsa motseng oa Egelone. A o timetsa ho hang le batho ba neng ba phela ho oona.
38Joshua a khutlela Debiri, a e-na le Baiseraele bohle, a futuhela motse oo. 39Ba o hapa, ba hapa le khosi ea oona, le metsana eohle ea teng, ba bolaea batho ba teng ka sabole, 'me ba timetsa ho hang bohle ba neng ba phela teng. A se ke a siea le ea mong. Joalokaha a ne a ile a etsa motseng oa Heborone, le motseng oa Debiri, le ho khosi ea teng, a etsa joalo le motseng oa Lebena, le ho khosi ea teng.
40Ka mokhoa o joalo, a bolaea baahi ba naha eo eohle e maralla, le e ka boroa, le e liphuleng, le e matsoapong, le likhosi tsohle tsa eona; a se ke a siea le ea mong. Tsohle tse phelang a li timetsa ho hang, joalokaha Morena Molimo oa Iseraele, a ne a laetse. 41Joshua a bolaea tsohle ho tloha Kadeshe-Barenea ho ea fihla Gasa, le naheng eohle ea Goshene, le ho ea fihla Gibeone. 42Likhosi tsena tsohle, le linaha tsa tsona, Joshua a li hapa ka nako e le 'ngoe, hobane Morena Molimo oa Iseraele, o ne a loanela Baiseraele.
43Joale Joshua, a e-na le Baiseraele bohle, a khutlela liahelong tsa hae Gilegale.
