JOELE 2

₁Letsang lenaka le le Sione,

le hlabe mokhosi

thabeng ea ka e halalelang!

Baahi bohle ba naha ba thōthōmele,

hobane letsatsi la Morena

le atametse,

tsatsi la Morena le se le le haufi.

₂Ke tsatsi la lefifi la bo-nka-ntjana,

tsatsi le phetheselang maru,

maru a matšo-matšo!

Lebōtho le leholo, le matla, lea tla,

le tla hlaha sa mafube lithabeng;

le kaalo ka lona

ha le e-s'o ka le bonoa,

e bile le kaalo ha le sa tla bonoa.

₃Kapele ho lona hlaha ea chesetsa,

kamorao ho lona ho tuka malakabe.

Kapele ho lona

naha e ka tšimo ea Edene,

kamorao ho lona

naha e sala e le nanaola;

lea fiela, ha le siee le letho.

₄Ho ropoha ha lona

ho tšoana le ha lipere,

le matha sa lipere,

sa pere tsa ntoa li khèma;

₅le laqōma

holim'a litlhōrō tsa lithaba,

lerata la lona e ka la kariki tsa ntoa,

e ka la mollo o qhōma

o chesa matlakala,

e ka la liqhobane

li eme thekōng ea ntoa.

₆Ha chaba li le bona

e ba lia tlalloa,

fahleho tsohle li pulufale.

₇Le khoroha joaloka bahale,

le hloa marako sa bahlabani.

Le tsamaea le tobile pele feela,

thekō ea lona e entse lekaka.

₈Ha le tsamaya

ha le theselane ka litsoe,

mohlabani ka mong

o tsamaea a tobile pele feela.

Lea fohla,

le itukubetse har'a marumo,

ha ho letho le ka le emang kapele.

₉Le feresa motse,

le mathe holim'a marako,

le hloelle le kaholim'a matlo,

le kene ka lifesetere se ka masholu.

₁₀Ha bōtho lena le khoroha,

fatše lea reketla,

maholimo le 'ona a tsukutlehe;

letsatsi le khoeli lia fifala,

linaleli le khaotse ho phatsima.

₁₁Morena o kharuma

a eteletse mabōtho a hae pele,

hoba mabōtho a hae

e hlile ke boieane;

ke linatla, a phetha taelo ea hae.

letsatsi la Morena le leholo,

le leholo le bile lea tšabeha!

E be ke mang ea ka le mamellang?

₁₂“Hona joale,” ho rialo Morena,

“khutlelang ho 'na

ka pelo tsa lōna tsohle,

ka ho itima lijo,

ka meokho le ka lillo.”

₁₃Pelo tsa lōna li ke li soabe,

ho e-na le ho hahōla

liaparo tsa lōna.

Khutlelang ho Morena,

Morena Molimo oa lōna,

hobane o mosa, o mohau,

o lieha ho halefa,

o tletse lerato,

o hauhela ba etsang bokhopo.

₁₄Mohlomong Morena

a ka 'n'a hauha,

a boela a le hlohonolofatsa,

a le fa lijo le lino

tsa ho nyehella Morena,

Morena Molimo oa lōna.

₁₅Letsang lenaka le le Sione,

le khethe letsatsi la ho itima lijo,

le meme phutheho e halalelang.

₁₆Bokellang sechaba se khōbōkane,

le meme phutheho e halalelang;

phuthang maqheku le phuthe bana,

le phuthe le masea a anyesang.

Monyali a tsoe

ka kamoreng ea hae,

monyaluoa a tsoe

ka leqatheng la hae.

₁₇Pakeng tsa lethule,

lethule la Tempele le aletare,

baprista, bahlanka ba Morena,

ba lle, ba re:

“Hauhela chaba sa hao, Morena;

chaba sa hao se se fetohe sekhobo,

sa fetoha sesomo har'a balichaba,

esere balichaba ba se soma, ba re:

‘O kae Molimo eo oa bona?’ ”

₁₈Morena a boulela naha ea hae,

sechaba sa hae a se hauhela.

₁₉Morena a araba chaba sa hae,

a re: “Bonang,

ke tla le fa chai e ngata,

le chaee koro le veine le ole,

le je, le be le li shebe feela,

balichaba ba se hlole

ba le etsa sesomo.

₂₀“Ke tla leleka lebōtho

le tsoang lebōea,

ke le lelekele naheng e ommeng,

naha ea matsoatlare,

sehlooho sa lona se lebe

oatleng le ka bochabela,

serao se lebe

oatleng le ka bophirima.

Litōpō tsa lona li tla nkha,

li nkhe li re phu!

Seputa sa tsona se etse sehou,

hobane lebōtho leo

le entse tse kholo.”

₂₁Uena lefatše,

se ke ua tšaba letho;

thaba, 'me u nyakalle,

hobane Morena o entse tse kholo.

₂₂Lōna libatana tsa naha,

se tšoheng letho,

hobane makhulo a lefeella

a ba matalana;

fate se beha litholoana tsa sona:

Fate sa feiee le sa morara

li beha haholo.

₂₃Lōna bana ba Sione, thabang,

le thabele Morena Molimo oa lōna;

o le neselitse lipula

hobane a lokile,

a le nesetsa pula tsa litloèbèlèlè,

pula tsa selemo le tsa hoetla

joaloka pele.

₂₄Liotlo tsa lōna li tla tlala mabele,

merifi e khaphatsehe veine le ole.

₂₅“Ke tla le buseletsa,

ke le buseletse se senyehileng,

se jeloeng ke litsie

ka lilemo tse ngata;

sa jeoa ke mekhahlelo ea litsie,

ea se ja, ea se kōkōna sohle;

lebōthohali leo

ke le neeletseng ka lona.

₂₆Lōna le tla ja

le be le li shebe feela,

le nt'o boka

Morena Molimo oa lōna,

eena ea le etselitseng tse kholo.

Chaba sa ka se ke ke

sa hlola se tlontlōlōha!

₂₇Le tla tseba

hore ke na le Baiseraele,

le hore 'na Morena

ke Molimo oa lōna,

ebile ha ho molimo e mong;

chaba sa ka se ke ke

sa hlola se tlontlōlōha!”

₂₈“Etlare hoba tsena li phethahale,

ke theolele Moea oa ka

holim'a batho bohle;

bara le barali ba lōna

ba tla porofeta,

banna-baholo ba lōna

ba tla lora litoro,

bahlankana ba lōna

ba tla bona lipono.

₂₉Le holim'a bahlanka ba ka

le makhabunyane a ka

ke tla theolela Moea oa ka

matsatsing ao.

₃₀Ke tla etsa limakatso

holimo, leholimong,

le mehlolo fatše, lefatšeng:

mali, le mollo, le mouoane oa mosi.

₃₁Letsatsi le tla fifala,

khoeli e tla ba khubelu joaloka mali,

pele letsatsi le leholo la Morena,

le khethehileng, le fihla.

₃₂Mang le mang ea tla rapela Morena

o tla pholosoa,

hobane Thabeng ea Sione,

motseng oa Jerusalema,

pholoho e tla ba teng,

joalokaha Morena a boletse,

bakeng sa masalla

ao Morena a a bitsang.”