JOBO 22

₂“Na motho

a ka etsetsa Molimo tse molemo,

joalokaha mohlalefi

a iketsetsa tse molemo?

₃Na ke thabo ho Ea Matla 'ohle

haeba u lokile?

Kapa ua mo entša

ha tsela tsa hao li hloka koli?

₄“Na o tla u khalemella

ho mo tšaba ha hao,

ka baka la hona a u etsetse qōso?

₅Bokhopo ba hao bo boholo haholo,

libe tsa hao li hloka moeli!

₆U nkile peeletso ho ngoan'eno

a se na molato,

ba hlobotseng bona

ua ba hlokisa le nketlana.

₇Ba nyoriloeng

ha ua k'a ba nyorolla ka metsi,

ba lapileng

ha ua k'a ba ngoathela letho,

₈le hoja u n'u le matla,

fatše u le ruile,

batho ba u tlōtla,

u phela ho lona.

₉Bahlolohali ba tlohile ho uena

ba itlhōphere,

ha e le khutsana tsona

ua li robokela.

₁₀Ke kahoo maraba

a u pota-potileng kahohle,

tšabo e tsometsang

e u hlokisang boiketlo,

₁₁fifi le u aparetseng,

u sitoang ho bona,

phororo tsa metsi

li phuthumanang holim'a hao.

₁₂“Molimo ea maholimong

a holimo-limo,

o talimela linaleli tlase,

o li talimela tlase

le hoja li le holimo!

₁₃Empa uena u re:

‘Molimo o tseba eng?

A ka ahlōla joang

har'a fifi le lekaalo-kaalo?

₁₄O har'a lesira la maru,

a ke ke a tseba ho bona,

ha a nts'a ralotsa

hōpong la leholimo.’

₁₅“Na u tla hanella tseleng ea khale,

tseleng e kutliloeng ke ba khopo?

₁₆Ba tlositsoe

nako ea bona e e-s'o fihle,

methèo ea bona

ea hōhōloa ke likhōhōla;

₁₇bona ba itseng ho Molimo:

‘Re hlokomōlōhe!

Ea Matla 'ohle a ka re etsa'ng?’

₁₈Empa ke ka eena

matlo a bona a tletseng menono,

kahoo 'na ke hōle le keletso

tsa ba khopo.

₁₉“Ba lokileng

ha ba bona baa nyakalla,

ba se nang molato

baa soma, ba re:

₂₀‘Lira tsa rōna

li timelelitsoe ruri,

tlotlo la tsona

la chesoa ke malakabe.’

₂₁“Boelana le Molimo,

u tl'o be le khotso,

ka ho etsa joalo

u tla tleloa ke tse molemo.

₂₂Amohela thuto

e tsoang molomong oa hae,

polelo tsa hae

u li bōlōke ka pelong ea hao.

₂₃Ha u ka khutlela ho Ea Matla 'ohle,

eena o tla u hlohonolofatsa,

ha u felisa bokhopo

kahar'a leaho la hao.

₂₄Ha u lahla khauta ea hao,

u e lahlela har'a lerōle,

le khauta e tsoang Ofire,

u e lahlela likhohlong har'a mafika,

₂₅Ea Matla 'ohle

e tla ba eena khauta ea hao,

e be silefera ea hao e hloekisitsoeng.

₂₆Ea Matla 'ohle u tla mo thabela,

fahleho sa hao se talime ho Molimo.

₂₇U tla rapela Molimo,

ebe oa u utloa,

kano tsa hao

u tsebe ho li phetha.

₂₈Merero eohle ea hao e tla atleha,

seli le khantšetse tsela tsa hao;

₂₉hoba Molimo o kokobetsa baikakasi,

baikokobetsi bona a ba pholose.

₃₀Le ea molato

Molimo oa mo pholosa:

U tla pholosoa

ka ho hloeka ha matsoho a hao.”