JOBO 21

₂“Ak'u mamele puo ea ka,

u e mamele ka hloko,

ho 'mamela hoo

e be ho nketsetsa matšeliso;

₃bea pelo,

le 'na ke bolele tsa ka,

ha ke qetile

ebe joale ua ntšoma.

₄“Na ebe ke ipelaetsa ho motho?

Ho hloka mamello

ebe ha ke ho lokele?

₅Ntalimeng, le tsoe le makala,

le thibe melomo ka matsoho a lōna.

₆Tsena ha ke li hopola kea nyaroha,

'mele oa ka oohle oa thōthōmela.

₇“Ke hobane'ng

ha ba khopo ba phela,

ba tsofala, ba bile ba matlafala?

₈Ba bona bana ba bona ba hōla,

ba bile ba atleha,

le tlōhōlō tsa bona ba be ba li bone.

₉Malapa a bona a na le khotso,

a hloka tšabo,

kotlo ea Molimo

ha e e-s'o ba oele holimo.

₁₀Poho ea ea khopo ea katika,

ha e ke e lala,

thole tsa hae lia tsoala,

ha li ke li folotsa.

₁₁Bashanyana ba bona ha ba e-tsoa

e ka re mohlape,

bana ba bona baa tlōla,

baa thalaka.

₁₂Ba bina meloli

ka moropa le ka harepa,

ba thabela ho utloa

molumo oa lekolilo.

₁₃Bophelo ba bona

ba bo qeta ba atlehile,

hang-hang ba theohele

Qalong ea Bafu.

₁₄Feela ba re ho Molimo:

‘Re hlokomōlōhe!

Ha re lakatse ho tseba

litsela tsa hao!

₁₅Ea Matla 'ohle

re ka mo sebeletsa ha e le mang?

Ho mo rapela

ebe ho ka re putsa ka eng?’

₁₆Feela katleho ea bona

ha e laoloe ke bona;

'na ke thōko le likeletso,

keletso tsa ba khopo.

₁₇“Le tingoa hakae

lebone la ba khopo?

koluoa eona

e ba oela holimo hakae,

ha Molimo a aba likotlo a halefile?

₁₈Ke hakae ba kang lirite

ha moea o pèpètla,

ba kang 'mōkō

ha sefefo se o fèfèra?

₁₉Molimo o isa kotlo tsa motho

baneng ba hae;

eka a ka be a otla eena mo-li-etsi,

a mo otle le eena a tl'a ikutloele.

₂₀Kotlo eo e mo tlele a e shebile,

khalefo ea Ea Matla 'ohle

a e habōle;

₂₁hoba palo ea khoeli tsa hae

ha e felile,

boiketlo ba lapa la hae

ha a sa bo natsa.

₂₂Ke mang

ea ka rutang Molimo bohlale,

athe Molimo o ahlōla

le ba leholimo?

₂₃“E mong motho o shoa

e le sekoankoetla,

a khotsofetse, a bile a iketlile;

₂₄'mele oa hae o shahlile, o fepehile,

moko o tiile ka masapong a hae;

₂₅e mong o shoa a hlorile moeeng,

le boiketlo a sa k'a b'a bo tseba;

₂₆ba robala ba bapile rōleng la lebitla,

bobeli ba bona ba nyeunye libōkō.

₂₇“Ke tseba ea lōna mehopolo,

le mano ao le ntherelang 'ona

kea a tseba.

₂₈le ntse le re:

‘Lapa la sekoēlē joale le kae?

Malapa a ba khopo 'ona a kae?’

₂₉Ha le e-s'o botse bo-mofeta-ka-tsela?

Polelo tsa bona ha le li natse,

ha ba re:

₃₀‘Ha koluoa e e-tla

ea khopo oa pholosoa,

tsatsi la khalefo

le lona oa le phemisoa?’

₃₁Ea ka mo nyatsang sefahla-mahlo

ke mang?

ketso tsa hae tsona

a ka li ahlōleloa ke mang?

₃₂Empa oa nkoa, a isoe lebitleng,

bitla la hae le lebeloe ka thata.

₃₃Qubu ea mobu e holim'a hae

ha e mo imele,

batho bohle ba koloka kamora' hae,

kapele ho eena

boieane bo mo eteletse pele.

₃₄“Mafeela a lōna

a ka ntšelisa joang?

Karabo tsa lōna

li tletse thetso!”