Pholiso ea sefofu sa tsoalo
1Ha Jesu a feta, a bona monna ea tsoetsoeng e le sefofu. 2Barutuoa ba hae ba 'motsa, ba re: “Rabbi, ea entseng sebe ke mang? Ke eena, kapa batsoali ba hae, ha e le moo a tsoetsoe a foufetse?”
3Jesu a araba, a re: “Hase eena ea entseng sebe leha e le batsoali ba hae, empa e le hore mesebetsi ea Molimo e bonahale ho eena. 4Eka khona re etse mesebetsi ea ea nthōmileng e sa ntsane e le motšeare; bosiu boa tla, boo ka bona ho seng ea ka sebetsang. 5Ha ke ntse ke le lefatšeng, ke leseli la lefatše.”
6Ha a buile tsena, a tšoèla fatše, a luba seretse ka mathe, a tlotsa mahlo a sefofu ka sona, 7'me a re ho sona: “E-ea u iphotle letšeng la Silōoame” ke ho re: Morōmuoa. Sa ea, sa iphotla, sa khutla se bona.
8Joale ba ahisaneng le sona le ba se boneng pele e le mokōpi, ba re: “Na hase eena ea neng a lula fatše a kōpa?”
9Ba bang ba re: “Ke eena.”
Ba bang ba re: “Che, o mpa a tšoana le eena.”
Eena a re: “Ke 'na.”
10Joale ba re ho eena: “Mahlo a hao a tutubolohile joang?”
11Eena a araba, a re: “Motho ea bitsoang Jesu o ile a luba seretse, a tlotsa mahlo a ka, a re ho 'na: ‘E-ea Silōoame, u iphotle;’ ka ea, ka iphotla, ka bona.”
12Ba re ho eena: “O kae?”
A re: “Ha ke tsebe.”
Bafarisi ba batlisisa tsa pholiso
13Ba isa ea neng a foufetse ho Bafarisi. 14Letsatsi leo Jesu a neng a lube seretse ka lona, a tutubolla mahlo a hae, e ne e le la Sabatha. 15Bafarisi ba 'motsa hape hore na o foufolohile joang. A re ho bona: “O ile a tlotsa mahlo a ka ka seretse; ka ea iphotla, 'me ka bona.”
16Ba bang ho Bafarisi ba re: “Motho eo ha a tsoe ho Molimo, hobane ha a bōlōke Sabatha.”
Ba bang ba re: “Motho oa moetsalibe a ka tseba joang ho etsa mehlolo e joalo?” Karohano ea e-ba teng har'a bona.
17Ba re hape ho sefofu: “Uena u re'ng ka eena, ha e le moo a u tutubolotse mahlo?”
Sa re: “Ke moporofeta.”
18Bajuda ha baa ka ba lumela hore o ne a foufetse, 'me joale o foufolohile, ho fihlela ba bitsa batsoali ba ea ileng a foufoloha. 19Ba ba botsa, ba re: “Na eo ke mora oa lōna, eo le reng o tsoetsoe a foufetse? O bona joang joale?”
20Batsoali ba hae ba ba araba, ba re: “Rea tseba hore enoa ke mora oa rōna, le hore o tsoetsoe a foufetse, 21empa ha re tsebe hore na o bona joang joale, le hore na ea mo tutubolotseng mahlo ke mang, ha re tsebe; 'motseng, o se a le moholo, o tla ipuella.” 22Batsoali ba hae ba ile ba bolela tsena ka ho tšaba Bajuda, hobane Bajuda ba ne ba se ba lumellane hore, ha motho a ka bolela hore ke Kreste, o tla khaoloa phuthehong. 23Ka lebaka lena, batsoali ba hae ba re: “O se a le moholo, 'motseng.”
24Motho ea neng a foufetse a bitsoa ke Bafarisi khetlo la bobeli; ba re ho eena: “Bua 'nete ea Molimo; rea tseba hore motho eno ke moetsalibe.”
25A araba, a re: “Ha ke tsebe hore ke moetsalibe; ke tseba ntho e le 'ngoe, e leng hore ke ne ke foufetse, joale kea bona.”
26Eaba ba re ho eena: “O ile a etsa'ng ho uena? O ile a u tutubolla mahlo joang?”
27A ba araba, a re: “Ke se ke le boleletse, 'me ha lea ka la mamela; le rata ho utloa hape ka baka la'ng? Na le lōna le rata ho fetoha barutuoa ba hae?”
28Ba mo hlapaola, ba re: “Ke uena morutuoa oa hae, rōna re barutuoa ba Moshe; 29rea tseba hore Molimo o ile a bua le Moshe, empa enoa ha re tsebe hore na o tsoa kae.”
30Motho eo a ba araba, a re: “Ke taba e makatsang ha le sa tsebe hore na o tsoa kae, empa a ntutubolotse mahlo. 31Rea tseba hore Molimo ha a utloe baetsalibe, empa ha motho a tšaba Molimo, a etsa thato ea hae, Molimo oa mo utloa. 32Ha ho e-s'o ka ho utloahala le ka mohla hore motho o kile a tutubolla mahlo a ea tsoetsoeng e le sefofu. 33Ha motho enoa a ne a sa tsoe ho Molimo, o ne a ke ke a etsa letho.”
34Ba araba, ba re ho eena: “U tsoetsoe u le moetsalibe ka ho tlala, empa joale ua re ruta?”
Eaba baa mo tebela.
Bofufu ba moea
35Jesu a utloa hore ba mo tebetse. Ha a mo fumana, a re ho eena: “Na u lumela ho Mor'a Motho?”
36Eena a 'motsa, a re: “Ekaba ke mang, Morena, ke tle ke lumele ho eena?”
37Jesu a re ho eena: “U 'mone, ebile ke eena ea buang le uena.”
38A re: “Kea lumela, Morena,” 'me a mo khumamela.
39Eaba Jesu o re: “Ke tletse kahlōlo lefatšeng lena, hore ba sa boneng ba bone, 'me ba bonang ba foufale.”
40Bafarisi ba nang le eena ba utloa tsena, 'me ba re ho eena: “Na le rōna re foufetse?”
41Jesu a re ho bona: “Ha le ne le foufetse, le ka be le se na sebe, empa joale le re: ‘Rea bona;’ ka hona sebe sa lōna ha se hlakoloe.”
