Jesu o fepa ba kete tse hlano
1Kamorao ho tsena Jesu a tšela letša la Galelea, ke ho re la Tiberiase. 2Letšoelehali la mo latela, hobane le bone mehlolo eo a e entseng ho ba kulang. 3Jesu a nyolohela thabeng, 'me a lula moo le barutuoa ba hae. 4Paseka, mokete oa Bajuda, e ne e le haufi.
5Joale ha Jesu a phahamisa mahlo, 'me a bona hore letšoelehali le tla ho eena, a re ho Filipi: “Re ka reka bohobe kae, hore batho baa ba je?” 6A bua hona ka ho mo nonya maikutlo, hobane o ne a tseba seo a tla se etsa.
7Filipi a mo araba, a re: “Bohobe ba lidenare tse makholo a mabeli bo ke ke ba lekana hore e mong le e mong a fumane sengoathoana.”
8E mong oa barutuoa ba hae, Andrease, ngoan'abo Simone Petrose, a re ho eena: 9“Moshanyana o teng mona, ea nang le linkhoa tse hlano tsa harese le litlhapi tse peli, empa hoo e ka ba eng ho batho ba bangata hakaale?”
10Jesu a re: “Lulisang batho fatše.” Joang bo ne bo le bongata sebakeng seo. Banna ba lula fatše, palo ea bona e ka ba kete tse hlano. 11Eaba Jesu o nka linkhoa tseo, 'me hoba a lebohe Molimo, a li abela ba lutseng fatše, le litlhapi joalo, kamoo ba lakatsang kateng.
12Ha ba se ba khōtše, a re ho barutuoa ba hae: “Bōkellang makumane a setseng, hore ho se ke ha senyeha letho.” 13Ba a bōkella, 'me ba tlatsa lirōtō tse leshome le metso e 'meli ka makumane a setseng, a linkhoa tse hlano tsa harese, tseo ba li jeleng.
14Joale ha batho ba bona mohlolo oo a o entseng, ba re: “Kannete enoa ke eena moporofeta ea lōkelang ho tla lefatšeng.” 15Empa Jesu ha a lemōha hore ba se ba tla tla ho mo nka, ba mo qobelle ho ba khosi, a boela a ea thabeng a 'notši.
Jesu o tsamaea holim'a metsi
16Mantsiboea, barutuoa ba hae ba theohela letšeng, 17'me ba kena ka sekepeng, ba tšelela Kaperenauma, mose ho letša. Ho ne ho se ho le lefifi, empa Jesu a e-s'o fihle ho bona; 18letša le ne le tsulubutlana kaha ho ne ho foka moea o matla. 19Ha ba se ba sokile sebaka se ka bang likilomethara tse 'ne kapa tse hlano, ba bona Jesu a tsamaea holim'a letša, a atamela sekepe, 'me ba tšoha. 20Empa a re ho bona: “Ke 'na; se tšabeng!” 21Ba mo kenya sekepeng ka thabo, 'me hang-hang sekepe sa fihla lebōpong leo ba eang ho lona.
Jesu ke bohobe ba bophelo
22Ka la hosasane letšoele le emeng mose ho letša la lemōha hore ha ho sekepe moo, haese se le seng, le hore Jesu ha aa ka a kena le barutuoa ba hae ka sekepeng seo, empa barutuoa ba hae ba tlohile ba 'notši. 23Ha fihla likepe tse ling tse tsoang Tiberiase, haufi le sebaka seo ba neng ba jelle bohobe ho sona, hoba Morena a etse thapelo ea teboho. 24Joale ha letšoele le bona hore Jesu le barutuoa ba hae ha ba eo moo, la kena ka likepeng tseo, la ea Kaperenauma, le ntse le batla Jesu.
25Ha batho bao ba mo fumana mose ho letša, ba re ho eena: “Rabbi, u tlile neng moo?”
26Jesu a ba araba, a re: “Kannete-nete, kea le bolella, le mpatla e seng hobane le bone mehlolo, empa e le hobane le jele bohobe, 'me la khōra. 27Le se ke la sebeletsa lijo tse senyehang, empa le sebeletse lijo tse hlolang ho isa bophelong bo sa feleng, tseo Mor'a Motho a tla le nea tsona, hobane Molimo Ntate o mo neile matla.”
28Ba re ho eena: “Re ka etsa eng hore re tle re sebetse mesebetsi ea Molimo?”
29Jesu a araba, a re ho bona: “Mosebetsi oa Molimo ke hore le lumele ho eo a mo rōmileng.”
30Joale ba re ho eena: “U etsa mohlolo ofe, hore re bone, 'me re lumele ho uena? U sebetsa eng? 31Bo-ntat'a rōna ba jele manna feelleng, joalokaha ho ngotsoe, ho thoe: ‘O ba fepile ka bohobe bo tsoang leholimong.’ ”
32Jesu a re ho bona: “Kannete-nete, kea le bolella, hase Moshe ea le neileng bohobe bo tsoang leholimong, empa ke Ntate ea le neang bohobe ba 'nete bo tsoang leholimong, 33hobane bohobe ba Molimo ke ea theohang leholimong, ea fang lefatše bophelo.”
34Ba re ho eena: “Morena, re fe bohobe bona kamehla.”
35Jesu a re ho bona: “Ke 'na bohobe ba bophelo; ea tlang ho 'na ha a ka ke a lapa le ka mohla, 'me ea lumelang ho 'na ha a ka ke a nyoroa le ka mohla. 36Empa ke le boleletse hore leha le mpone, ha le lumele. 37Bohle bao Ntate a 'neang bona ba tla tla ho 'na, 'me ea tlang ho 'na ha nka ke ka mo lahlela kantle, 38hobane ke theohile leholimong, e seng ho tla etsa thato ea ka, empa ho tla etsa thato ea ea nthōmileng. 39Thato ea ea nthōmileng ke hore ho bohle bao a 'neileng bona, ho se ke ha lahleha le ea mong oa bona, empa ke ba tsose ka letsatsi la ho qetela. 40Thato ea Ntate ke hore e mong le e mong ea bonang Mora, a lumela ho eena, a be le bophelo bo sa feleng, 'me ke tla mo tsosa ka letsatsi la ho qetela.”
41Joale Bajuda ba luma-luma ka eena, kahobane a itse: “Ke 'na bohobe bo theohileng leholimong,” 42'me ba re: “Na Jesu eo hase mor'a Josefa, eo re tsebang ntat'ae le 'm'ae? Joale o bolela joang, ha a re: ‘Ke theohile leholimong’?”
43Jesu a ba araba, a re: “Se luma-lumeng. 44Ha ho ea ka tlang ho 'na, haese ha Ntate ea nthōmileng a ka mo hohela, 'me 'na ke tla mo tsosa ka letsatsi la ho qetela. 45Ho ngotsoe ho Baporofeta, ho thoe: ‘Bohle ba tla rutoa ke Molimo.’ E mong le e mong ea utloileng le ho ithuta ho Ntate o tla ho 'na. 46E seng hore motho o teng ea boneng Ntate, haese ea tsoang ho Molimo; eena o bone Ntate. 47Kannete-nete, kea le bolella, ea lumelang o na le bophelo bo sa feleng. 48Ke 'na bohobe ba bophelo. 49Bo-ntat'a lōna ba ile ba e-ja manna feelleng, empa ba e-shoa. 50Bona ke bohobe bo theohang leholimong, hore motho a bo je, 'me a se ke a shoa. 51Ke 'na bohobe bo phelang, bo theohileng leholimong; ha motho a ka ja bohobe bona o tla phela ka ho sa feleng, 'me bohobe boo ke tla fana ka bona ka baka la bophelo ba lefatše, ke nama ea ka.”
52Bajuda ba qabana, ba re: “Eo a ka re nea nama ea hae joang, ra e ja?”
53Jesu a re ho bona: “Kannete-nete, kea le bolella, ha le sa je nama ea Mor'a Motho, le sa noe mali a hae, ha le na bophelo ka ho lōna. 54Ea jang nama ea ka, a e-noa mali a ka, o na le bophelo bo sa feleng, 'me ke tla mo tsosa ka letsatsi la ho qetela. 55Nama ea ka ke sejo sa 'nete, le mali a ka ke seno sa 'nete. 56Ea jang nama ea ka, a e-noa mali a ka, o lula ka ho 'na, le 'na ka ho eena. 57Joalokaha Ntate ea phelang a nthōmile, 'me ke phela ka Ntate, le ea ntjang o tla phela ka 'na. 58Bona ke bohobe bo theohileng leholimong, e seng bo joaloka boo bo-ntat'a rōna ba bo jeleng, 'me ba e-shoa; ea jang bohobe bona o tla phela ka ho sa feleng.” 59A bolela litaba tsena a ntse a ruta ka tlung ea thapelo, Kaperenauma.
Mantsoe a bophelo bo sa feleng
60Eare ha ba bangata ba barutuoa ba hae ba utloa, ba re: “Polelo ena e thata; ke mang ea ka e mamellang?”
61Empa Jesu, ka ho tseba hore barutuoa ba hae ba luma-luma ka taba ena, a re ho bona: “Na hoo hoa le khōpisa? 62Joale ho tla ba joang ha le bona Mor'a Motho a nyolohela moo a neng a le teng pele? 63Moea ke oona o phelisang, nama ha e thuse letho; lipolelo tseo ke li buileng ho lōna ke moea, 'me ke bophelo. 64Empa ba bang ba teng ho lōna ba sa lumeleng.” Jesu o ne a tsebile ho tloha qalong hore na ba sa lumeleng ke bo-mang, le hore na ea tla mo èka ke mang. 65A re: “Ka baka leo, ke le boleletse hore ha ho ea ka tlang ho 'na ha a sa ho neoa ke Ntate.”
66Ho tloha nakong eo ba bangata ba barutuoa ba hae ba ikhula, 'me ba se ke ba hlola ba tsamaea le eena.
67Eaba Jesu o re ho ba leshome le metso e 'meli: “Na le lōna le rata ho ikela na?”
68Simone Petrose a mo araba, a re: “Morena, re tla ea ho mang? U na le mantsoe a bophelo bo sa feleng; 69rōna re lumetse, 'me re tsebile hore u Ea Halalelang oa Molimo.”
70Jesu a ba araba, a re: “Na lōna ba leshome le metso e 'meli ha kea le khetha na? Athe e mong ho lōna ke Diabolosi!” 71O ne a bolela Judase, mor'a Simone Isekariota, hobane o ne a se a tla mo èka, leha e ne e le e mong oa ba leshome le metso e 'meli.
