Jesu o iponahatsa ho barutuoa ba supileng
1Kamora' litaba tsena Jesu a iponahatsa hape ho barutuoa a le lebōpong la letša la Tiberiase. A iponahatsa ka mokhoa ona: 2Simone Petrose, le Thomase ea bitsoang Lefahla, le Nathanaele oa Kana e Galelea, le bara ba Sebedea, le barutuoa ba bang ba babeli, ba ne ba le hammoho. 3Simone Petrose a re ho bona: “Ke sa il'o tšoasa litlhapi.”
Ba re ho eena: “Le rōna re ea le uena.” Ba tloha, ba kena ka sekepeng, empa bosiung boo ba se ke ba tšoasa letho.
4Kameso, Jesu a ema lebōpong, feela barutuoa ba sa tsebe hore ke Jesu.
5Jesu a re ho bona: “Bana ba ka, na le na le tlhapi?”
Ba mo araba, ba re: “Che.”
6A re ho bona: “Akhelang letlōoa lehlakoreng le letōna la sekepe, 'me le tla tšoasa.” Eaba baa le akhela, 'me ba sitoa ho le hula ka baka la bongata ba litlhapi.
7Joale morutuoa eo Jesu a mo ratang a re ho Petrose: “Ke Morena!” Simone Petrose, ha a utloa hore ke Morena, a apara, hobane o ne a hlobotse, 'me a itihela letšeng. 8Barutuoa ba bang ba tla ka sekepe, ba hula letlōoa la litlhapi, hobane ba ne ba se hōle le lebōpo, ba ne ba ka ba limethara tse lekholo. 9Joale ha ba e-tsoa ka sekepeng ba fihla lebōpong, ba bona mollo oa mashala, le tlhapi e besitsoeng holim'a oona, le bohobe.
10Jesu a re ho bona: “Tlisang tse ling tsa litlhapi tseo le tsoa li tšoasa.”
11Simone Petrose a hloèlla ka sekepeng, a hulela lebōpong letlōoa le tletseng litlhapi tse kholo, tse lekholo le mashome a mahlano a metso e meraro, empa leha li ne li le ngata hakaalo, letlōoa ha lea ka la taboha. 12Jesu a re ho bona: “Tloong le je!” Ka ho tseba hore ke Morena, ha se ke ha e-ba le ea mong oa barutuoa ea betang pelo ho 'motsa, ho re: “U mang?” 13Jesu a tla, a nka bohobe, a ba nea bona; le ka tlhapi a etsa joalo. 14E ne e se e le khetlo la boraro Jesu a iponahatsa ho barutuoa, hoba a tsohe bafung.
Jesu le Petrose
15Joale ha ba se ba jele, Jesu a re ho Simone Petrose: “Simone, mor'a Johanne, na u nthata ho feta baa na?”
A re ho eena: “E, Morena, ua tseba hore kea u rata.”
Jesu a re ho eena: “Alosa likonyana tsa ka!”
16A boela a re ho eena khetlo la bobeli: “Simone, mor'a Johanne, na ua nthata na?”
A re ho eena: “E, Morena, ua tseba hore kea u rata.”
A re ho eena: “Lisa linku tsa ka!”
17A re ho eena khetlo la boraro: “Simone, mor'a Johanne, na ua nthata na?”
Petrose a soaba hobane a itse ho eena khetlo la boraro: “Na ua nthata na,” 'me a re ho eena: “Morena, u tseba tsohle, ua tseba hore kea u rata.”
Jesu a re ho eena: “Alosa linku tsa ka! 18Kannete-nete, kea u bolella, ha u ne u sa le mocha u ne u ikapesa, u tsamaea moo u ratang teng, empa ha u se u tsofetse, u tla otlolla matsoho a hao, 'me e mong o tla u apesa, a u ise moo u sa rateng teng.” 19O ne a bolela hona ho supa hore na o tla tlotlisa Molimo ka lefu le joang. Hoba a rialo, a re ho eena: “Ntatele!”
Jesu le morutuoa ea ratoang
20Petrose ha a reteleha, a bona morutuoa eo Jesu a mo ratang a ba latetse. Ke eena ea neng a itšetlehile sefubeng sa Jesu ha ba le lijong tsa mantsiboea, ea neng a re: “Morena, ea u èkang ke mang?” 21Petrose ha a bona eo, a re ho Jesu: “Morena, eo o tla fella kae?”
22Jesu a re ho eena: “Ha ke rata hore a phele ho fihlela ke khutla, u tšoenngoa ke'ng? Uena, ntatele!” 23Joale taba ena ea hore morutuoa eo ha a na ho shoa, ea anela har'a balumeli. Empa Jesu o ne a sa ka a re ho eena ha a na ho shoa, a mpa a itse: “Ha ke rata hore a phele ho fihlela ke khutla, u tšoenngoa ke'ng?”
24Ke eena morutuoa enoa ea pakang litaba tsena, ea li ngotseng, 'me re tseba hore bopaki ba hae ke 'nete.
25Ho sa na le tse ling tse ngata, tseo Jesu a li entseng, tseo ha li ka ngoloa ka bonngoe, ke hopolang hore le lefatše le ke ke la ba le sebaka se lekanang ho bōlōka libuka tse ka ngoloang.
