JOHANNE 19

₁Ea e-ba moo Pilato a nkang Jesu, a mo shapa. ₂Bahlabani ba lōha mofapahlooho ka meutloa, ba mo roesa oona, ba mo apesa kobo e perese, ₃ba nt'o tla ho eena, ba re: “Ahe, khosi ea Bajuda!” 'me ba mo jabela.

₄Pilato a tsoela kantle hape, 'me a re ho Bajuda: “Bonang, ke mo tlisa ho lōna kantle, le tle le tsebe hore ha ke fumane molato ho eena.” ₅Eaba Jesu o tsoela kantle, a roetse mofapahlooho oa meutloa, a apere kobo e perese. Pilato a re ho bona: “Motho oa lōna ke eo!”

₆Eitse ha baprista ba baholo le mapolesa ba 'mona, ba hōoa, ba re: “Mo thakhise! Mo thakhise!”

Pilato a re ho bona: “Mo nkeng e le lōna, le mo thakhise, hobane 'na ha ke fumane molato ho eena!”

₇Bajuda ba mo araba, ba re: “Re na le molao, 'me ho ea ka molao eka khona a shoe, kahobane o ikentse Mora oa Molimo.”

₈Eare ha Pilato a utloa polelo eo, a tšoha haholo. ₉A kena ka tlung ea bobusisi hape, a re ho Jesu: “U tsoa kae?” Empa Jesu a se ke a mo araba. ₁₀Pilato a re ho eena: “U hana ho bua le 'na? Ha u tsebe hore ke na le matla a ho u lōkōlla, le matla a ho u thakhisa?”

₁₁Jesu a araba, a re: “U ka be u se na matla a letho holim'a ka, ha u ne u sa a neoa a e-tsoa holimo; ka baka leo, ea u neileng 'na o na le sebe se fetang.”

₁₂Ho tloha moo Pilato a batla ho mo lōkōlla, empa Bajuda ba hōoa, ba re: “Ha u lōkōlla motho enoa, ha u motsoalle oa Sesare; e mong le e mong ea iketsang khosi o hanyetsa Sesare.”

₁₃Ha Pilato a utloa mantsoe ana, a ntšetsa Jesu kantle, a lula setulong sa boahlōli sebakeng se bitsoang Matlapeng, ka Seheberu ke Gabata. ₁₄E ne e le letsatsi la tlhekelo ea Paseka, e ka ba har'a mpa ea motšeare.

A re ho Bajuda: “Ke eo khosi ea lōna!”

₁₅Bao ba hōoa, ba re: “'Molaee! 'Molaee! Mo thakhise!”

Pilato a re ho bona: “Ke thakhise khosi ea lōna?”

Baprista ba baholo ba araba, ba re: “Ha re na khosi haese Sesare.”

₁₆Ea e-ba moo a ba neelang eena hore a thakhisoe.

Eaba ba nka Jesu. ₁₇A tsamaea a jere sefapano, a ea sebakeng se bitsoang Lehata. Ka Seheberu se bitsoa Gologotha. ₁₈Ba mo thakhisa teng hammoho le ba bang ba babeli, e mong ka lehlakoreng lena, e mong ka ho lane, Jesu a le hare.

₁₉Pilato a ngola le lengolo, a le maneha holim'a sefapano. Ho ne ho ngotsoe, ho thoe: JESU OA NASARETHA, KHOSI EA BAJUDA. ₂₀Bajuda ba bangata ba bala lengolo leo, hobane sebaka seo Jesu a neng a thakhiselitsoe ho sona se ne se le haufi le motse, 'me le ne le ngotsoe ka Seheberu, le ka Selatine, le ka Segerike. ₂₁Joale baprista ba baholo ba Bajuda ba re ho Pilato: “Se ngole ‘Khosi ea Bajuda’, empa ngola hore: ‘O itse ke 'na khosi ea Bajuda’.”

₂₂Pilato a araba, a re: “Seo ke se ngotseng, ke se ngotse.”

₂₃Hoba bahlabani ba thakhise Jesu, ba nka liaparo tsa hae, ba li arola karolo tse 'ne, mohlabani ka mong a fumana karolo. Ha e le seaparo sa kahare se ne se se na morōko, se lōhiloe hohle ho tloha holimo.

₂₄Joale ba buisana, ba re: “A re se keng ra e tabola, empa a re e laoleng ka lōtho, re tle re tsebe hore na e tla ba ea mang;” e le hore ho tle ho phethahale Mangolo a reng:

₂₅Haufi le sefapano sa Jesu ho ne ho eme 'm'ae, le ngoan'abo 'm'ae, le Maria, mohats'a Keleopase, le Maria oa Magadala. ₂₆Ha Jesu a bona 'm'ae le morutuoa eo a mo ratang, ba eme moo, a re ho 'm'ae: “'Mè, mora oa hao ke eo.” ₂₇A nt'o re ho morutuoa: “'M'ao ke eo.” Ho tloha nakong eo morutuoa a mo nkela ha hae.

₂₈Kamora' tsena Jesu, ka ho tseba hore joale tsohle li phethahetse, a re: “Ke nyoriloe,” e le hore Mangolo a phethahale. ₂₉Ho ne ho e-na le nkho e tletseng asene; ba tlamella semonyametsi se tletseng asene leqaleng, ba se isa molomong oa hae. ₃₀Joale ha Jesu a noele asene, a re: “Ho phethahetse!” A kebisa hlooho, a neela moea.

₃₁Erekaha e ne e le letsatsi la tlhekelo, Bajuda ba kōpa Pilato hore ho rojoe meomo ea ba thakhisitsoeng, 'me ba tlosoe, hore litōpō li se ke tsa sala sefapanong ka Sabatha, hobane letsatsi la Sabatha seo le ne le le leholo. ₃₂Joale bahlabani ba tla; ba roba meomo ea oa pele, le ea e mong oa ba thakhisitsoeng le Jesu, ₃₃empa ha ba e-tla ho Jesu, 'me ba bona hore o se a shoele, ba se ke ba roba meomo ea hae, ₃₄empa e mong oa bahlabani a mo hlaba lehlakoreng ka lerumo la hae, 'me hang-hang ha tsoa mali le metsi. ₃₅Ea boneng o pakile, 'me bopaki ba hae ke ba 'nete, 'me eena eo o tseba hore o bolela 'nete, hore le lōna le lumele. ₃₆Tsena li etsahetse hore ho tle ho phethahale temana ea Mangolo e reng: “Ha ho lesapo la hae le tla rojoa.” ₃₇Temana e 'ngoe hape e re: “Ba tla talima eo ba mo hlabileng.”

₃₈Kamora' tsena, Josefa oa Arimathea, eo e neng e le morutuoa oa Jesu ka lekunutu ka baka la ho tšaba Bajuda, a kōpa Pilato ho mo lumella ho nka setōpō sa Jesu, 'me Pilato a lumela. Joale a tla, a nka setōpō sa hae. ₃₉Le Nikodema, eena ea neng a tle ho Jesu pele, bosiu, a tla a nkile motsoako oa 'mira le makhala o ka bang boima ba likilo tse mashome a mararo. ₄₀Ba nka setōpō sa Jesu, ba se thatella hammoho le linōko ka masela, joalokaha e le moetlo oa Bajuda oa ho èpèla. ₄₁Sebakeng seo a thakhisitsoeng ho sona ho ne ho e-na le serapa, 'me serapeng ho e-na le lebitla le lecha, leo ho neng ho e-s'o ka ho èpèloa motho ka ho lona; ₄₂eaba ba èpèla Jesu teng ka baka la tlhekelo ea Bajuda, hobane lebitla leo le ne le le haufi.