Jesu oa èkoa, oa tšoaroa
1Hoba Jesu a bolele tsena, a tsoa le barutuoa ba hae, a tšelela mose ho nōkana ea Kederone, moo ho neng ho e-na le serapa teng; a kena ho sona le barutuoa ba hae.
2Le eena Judase ea mo èkang, o ne a tseba sebaka seo, hobane Jesu le barutuoa ba hae ba ne ba phuthehela teng khafetsa. 3Joale Judase a ea teng le lebōtho la bahlabani le balebeli ba neng ba rōmiloe ke baprista ba baholo le Bafarisi, ba tšoere mabone, le lirumōla, le lihlomo.
4Jesu, ka ho tseba tsohle tse mo tlelang, a ea ho bona, 'me a re: “Le batla mang?”
5Ba mo araba, ba re: “Jesu oa Nasaretha.”
A re ho bona: “Ke 'na enoa.” Le eena Judase, ea mo èkang, o ne a eme le bona. 6Joale ha a ba bolella, a re: “Ke 'na enoa,” ba checha ka santhao, 'me ba oela fatše.
7A ba botsa hape, a re: “Le batla mang?”
Ba re: “Jesu oa Nasaretha.”
8Jesu a ba araba, a re: “Ke le boleletse hore ke 'na; haeba le batla 'na he, lesang batho bana ba ikele;” 9e le hore ho tle ho phethahale polelo eo a e boletseng, a re: “Ha hoa lahleha le ea mong oa bao u 'neileng bona.”
10Eaba Simone Petrose, ea neng a e-na le sabole, oa e tsomula, o hlatha mohlanka oa Moprista e Moholo, o mo pōma tsebe ea letsoho le letōna. Lebitso la mohlanka eo e ne e le Malekose.
11Empa Jesu a re ho Petrose: “Busetsa sabole selateng; na ha nka ke ka noa senoelo seo Ntate a 'neileng sona na?”
Jesu pel'a Moprista e Moholo
12Joale lebōtho la bahlabani, le e-na le molaoli oa lona oa ba sekete, le balebeli ba neng ba rōmiloe ke Bajuda, ba tšoara Jesu, ba mo tlama. 13Ba mo isa ho Hannase pele, hobane e ne e le mohoè oa Kaiafa, eo e neng e le Moprista e Moholo ka selemo seo. 14Kaiafa e ne e le eena ea elelitseng Bajuda, a re: Ho molemo ha motho a le mong a ka shoela sechaba.
Petrose o latōla Jesu
15Simone Petrose le morutuoa e mong ba latela Jesu. Morutuoa eo o ne a tsejoa ke Moprista e Moholo, 'me a kena le Jesu lebaleng la ntlo ea Moprista e Moholo. 16Petrose a ema monyako, kantle. Eaba morutuoa e mong eo, ea neng a tsejoa ke Moprista e Moholo, oa tsoa, o bua le mosali ea lebelang monyako, 'me a kenya Petrose.
17Joale lekhabunyane le lebelang monyako la re ho Petrose: “Na uena ha u e mong oa barutuoa ba monna eo?”
A re: “Ha ke eena.”
18Bahlanka le balebeli ba ne ba besitse mollo oa mashala, ba eme, ba ikomosa, hobane ho ne ho bata. Petrose le eena a ema le bona, a ikomosa.
Moprista e Moholo o botsa Jesu
19Joale Moprista e Moholo a botsa Jesu ka tsa barutuoa ba hae le ka tsa thuto ea hae.
20Jesu a mo araba, a re: “Ke buile le lefatše phatlalatsa; ke rutile ka matlung ea thapelo le ka Tempeleng kamehla, moo Bajuda bohle ba phuthehelang teng, 'me ha kea ka ka bua letho lekunutung. 21U mpotsetsa'ng? Botsa ba utloileng seo ke se buileng ho bona; ke bona ba tsebang seo ke se buileng.”
22Eare ha a rialo, e mong oa balebeli ea neng a eme haufi, a jabela Jesu, a re: “Na u hle u arabe Moprista e Moholo joalo?”
23Jesu a mo araba, a re: “Haeba ke buile hampe, bolela bobe boo, empa haeba ke buile hantle, u nkotlela'ng na?” 24Joale Hannase a mo rōmela a tlamiloe ho Kaiafa, Moprista e Moholo.
Petrose o boela a latōla Jesu
25Simone Petrose o ne a eme a ntse a ikomosa. Eaba ba re ho eena: “Na uena ha u e mong oa barutuoa ba hae na?”
Eena a latōla, a re: “Ha ke eena.”
26E mong oa bahlanka ba Moprista e Moholo, ea tsoalanang le eo Petrose a mo khaotseng tsebe, a re: “Na ha kea ka ka u bona u e-na le eena serapeng?” 27Petrose a boela a latōla, 'me hang-hang mokōkō oa lla.
Jesu pel'a Pilato
28Joale Bajuda ba tloha ha Kaiafa, ba isa Jesu tlung ea bobusisi, e sa le kameso. Bona ha baa ka ba kena ka tlung ea bobusisi, hore ba tle ba je Paseka ba sa silafala. 29Ka baka leo, Pilato a tsoela kantle ho bona, 'me a re: “Le qōsa monna eo ka eng?”
30Ba araba, ba re ho eena: “Hojane monna enoa o ne a sa etsa bobe, re ka be re sa mo tlisa ho uena.”
31Pilato a re ho bona: “Mo nkeng e le lōna, le mo ahlōle ka ho ea ka molao oa lōna.”
Bajuda ba re ho eena: “Ha re na tōkelo ea ho bolaea motho.” 32E ne e le hore ho phethahale boporofeta boo Jesu a bo boletseng ha a supa mofuta oa lefu leo a tla le shoa.
33Pilato a boela ka tlung ea bobusisi, a bitsa Jesu, 'me a re ho eena: “Na u khosi ea Bajuda?”
34Jesu a araba, a re: “Na u bolela hoo ka bouena, kapa ba bang ba u boleletse ka 'na?”
35Pilato a araba, a re: “Na ke Mojuda? Sechaba sa heno le baprista ba baholo ba u tlisitse ho 'na; u entse'ng?”
36Jesu a araba, a re: “'Muso oa ka hase oa lefatše lena; ha 'Muso oa ka e ne e le oa lefatše lena, balateli ba ka ba ka be ba loanne, hore ke se ke ka neeloa Bajuda, empa joale 'Muso oa ka hase oa mona.”
37Eaba Pilato o re ho eena: “Ha ho le joalo, na u fela u le khosi?”
Jesu a araba, a re: “Ke uena u reng ke khosi. Seo ke se tsoaletsoeng, le seo ke se tletseng lefatšeng, ke hore ke pake 'nete. Mang le mang eo e leng oa 'nete o utloa lentsoe la ka.”
38Pilato a re ho eena: “'Nete ke'ng?”
Jesu o ahlōleloa lefu
Hoba a rialo, a boela a tsoela ho Bajuda kantle, a ba bolella, a re: “Ha ke fumane molato ho eena. 39Empa le na le tloaelo ea hore ke le lōkōllele motho e mong ka Paseka; na le rata ha ke le lōkōllela khosi ea Bajuda na?”
40Ba hōoa hape, ba re: “E seng enoa, e mpe e be Barabase!” Barabase e ne e le senokoane.
