Jesu o hlatsoa maoto a barutuoa ba hae
1E ne e le pele ho mokete oa Paseka. Jesu o ne a tseba hore nako ea hae ea ho tloha lefatšeng lena, a e-ea ho Ntat'ae, e fihlile. O ne a ratile ba hae ba lefatšeng, 'me a 'na a ba rata ho isa qetellong.
2Ha ho jeoa lijo tsa mantsiboea, Diabolosi o ne a se a kentse pelong ea Judase, mor'a Simone Isekariota, maikutlo a hore a èkè Jesu. 3Jesu, ka ho tseba hore Ntat'ae o mo neile tsohle matsohong, le hore o tsoa ho Molimo, 'me o ea ho Molimo, 4a tloha lijong, a hlōbōla seaparo, 'me a nka thaole, a itlama ka eona thekeng. 5A nt'o kha metsi, 'me a qala ho hlatsoa maoto a barutuoa le ho a hlakola ka thaole eo a neng a itlamile ka eona.
6Ha a e-tla ho Simone Petrose, eo a re ho eena: “Morena, na ke uena u ka ntlhatsoang maoto?”
7Jesu a araba, a re ho eena: “Seo ke se etsang ha u se tsebe hajoale, empa u tla se utloisisa hamorao.”
8Petrose a re ho eena: “Ha u ka ke ua ntlhatsoa maoto le khale!”
Jesu a mo araba, a re: “Ha ke sa u hlatsoe, ha u na kabelo ho 'na.”
9Simone Petrose a re ho eena: “Morena, e se be maoto a ka feela, empa le 'ona matsoho le hlooho!”
10Jesu a re ho eena: “Ea totseng o hloekile kahohle, 'me ha a sa hloka ho hlatsuoa haese maoto feela. Lōna le hloekile, empa e seng bohle.” 11O ne a tseba ea tla mo èka, 'me ke ka baka leo a itseng: “Ha lea hloeka bohle.”
12Joale ha a ba hlatsoitse maoto, a apara seaparo sa hae, a boela a lula, a re ho bona: “Na le utloisisa seo ke se entseng ho lōna? 13Le mpitsa ‘Moruti’ le ‘Morena’, 'me le bolela hantle, hobane ke eena. 14Joale he, ha ke le hlatsoitse maoto, 'na ke le Morena le Moruti, le lōna le tšoanetse ho hlatsoana maoto. 15Ke le beetse mohlala, hore le lōna le tle le etse joalokaha ke le entse. 16Kannete-nete, kea le bolella, mohlanka ha a moholo ho mong'a hae, le morōmuoa ha a moholo ho ea mo rōmileng. 17Ha le tseba tsena, le lehlohonolo ha le ka li etsa.
18“Ha ke bue ka lōna bohle; ke tseba bao ke ba khethileng. Empa Mangolo a reng: ‘Eo ke ntšanang se inong le eena, o nthahile ka serethe,’ a tšoanetse ho phethahala.
19“Ke le bolella e sa le joale, pele ho etsahala, hore le tle le lumele ha ho etsahala, hore 'na e ntse e le 'na. 20Kannete-nete, kea le bolella, ea amohelang eo nka mo rōmang, oa nkamohela, 'me ea nkamohelang, o amohela ea nthōmileng.”
Jesu o bolela tsa ho èkoa ha hae
21Eare hoba Jesu a bolele tsena, a ferekana moeeng, a bua phatlalatsa, a re: “Kannete-nete, kea le bolella hore e mong oa lōna o tla nkèka.”
22Barutuoa ba talimana, ba tsielehile hore na o bua ka mang. 23E mong oa barutuoa ba hae, eo Jesu a neng a mo rata, o ne a itšetlehile sefubeng sa Jesu. 24Joale Simone Petrose a mo qhoaea, hore a botse na o bua ka mang.
25Eo ea itšetlehileng sefubeng sa Jesu a re ho eena: “Morena, motho eo ke mang?”
26Jesu a araba, a re: “Ke eo ke tla qopetsa sengoathoana, ke mo nee sona.” Ha a qopelitse sengoathoana, a se nka, a se nea Judase, mor'a Simone Isekariota. 27Hoba Judase a je sengoathoana, Satane a kena ka ho eena.
Eaba Jesu o re ho eena: “Seo u se etsang, se etse kapele.” 28Empa ha hoa ba le ea mong oa ba neng ba le lijong, ea ileng a tseba hore na o 'moleletse joalo ka baka la'ng, 29hobane ba bang ba ne ba hopola hore, kaha Judase a ne a tšoere mokotlana oa chelete, Jesu o re ho eena: “Reka tseo re li hlokang bakeng sa mokete,” kapa a fe mafutsana ho hong. 30Joale ha a se a amohetse sengoathoana, a tsoa hang-hang. E ne e le bosiu.
Taelo e ncha
31Ha Judase a se a tsoile, Jesu a re: “Joale Mor'a Motho o tlotlisitsoe, 'me Molimo o tlotlisitsoe ka eena. 32Ha Molimo a tlotlisitsoe ka eena, Molimo le eena o tla tlotlisa Mor'a Motho, 'me o tla mo tlotlisa kapele-pele.
33“Bana ba ka, ke sa tla ba le lōna ka nakoana; le tla mpatla, 'me joalokaha ke ile ka bolella Bajuda, ka re: ‘Moo ke eang teng, le ke ke la tla,’ le ho lōna ke rialo joale.
34“Ke le nea taelo e ncha, ea hore le ratane; joalokaha ke le ratile, le lōna le ratane. 35Bohle ba tla tseba ka hona hore le barutuoa ba ka, ha le ratana.”
Tatōlo ea Petrose ea boleloa
36Simone Petrose a re ho eena: “Morena, u ea kae?”
Jesu a araba, a re: “Moo ke eang teng u ke ke ua ntatela hajoale, feela u tla ntatela hamorao.”
37Petrose a re ho eena: “Morena, ke ka baka la'ng nke keng ka u latela hajoale? Ke tla u tella bophelo ba ka!”
38Jesu a araba, a re: “Na u tla ntella bophelo ba hao na? Kannete-nete, kea u bolella: Mokōkō o e-s'o lle, u tla be u se u ntatōtse hararo.”
