Lentsoe la fetoha motho
1Tšimolohong Lentsoe le ne le le teng. Lentsoe le ne le le ho Molimo, 'me Lentsoe e ne e le Molimo. 2Le ne le le ho Molimo tšimolohong.
3Lintho tsohle li bile teng ka lona, 'me ha ho letho le bileng teng haese ka lona. 4Bophelo bo ne bo le ka ho lona, 'me bophelo e ne e le leseli la batho; 5leseli le khanya lefifing, empa lefifi ha lea ka la le hlōla.
6Monna o ne a le teng, ea rōmiloeng ke Molimo, lebitso la hae e le Johanne. 7Monna enoa a tlela ho paka tsa leseli, e le hore bohle ba lumele ka eena. 8Eena e ne e se leseli leo, empa o ne a tlile hore a pake tsa leseli. 9Leseli la 'nete le bonesetsang motho e mong le e mong, le ne le e-tla lefatšeng.
10Lentsoe le ne le le lefatšeng, 'me lefatše le bile teng ka lona, empa lefatše ha lea ka la le tseba. 11Le ne le tlile hahabo lona, empa ba habo lona ha baa ka ba le amohela. 12Empa bohle ba le amohetseng, e leng ba lumelang ho lona, le ba neile tokelo ea ho fetoha bana ba Molimo, 13ba sa kang ba tsoaloa ka mali, kapa ka thato ea nama, kapa ka thato ea monna, empa ba tsoetsoe ke Molimo.
14Lentsoe ea e-ba motho, la aha har'a rōna, 'me ra bona tlōtla ea lona, e tletseng mohau le 'nete, tlōtla e kang eo Mora ea tsoetsoeng a 'notši a e fumaneng ho Ntate.
15Johanne o mo pakile, 'me a hōoa, a re: “Enoa ke eena, eo ke neng ke 'molela, ha ke re: ‘Ea tlang kamorao ho 'na o mpheta ka boholo, hobane o bile teng pele ho 'na.’ ” 16Mohaung oa hae o khaphatsehang, rōna bohle re amohetse mohau holim'a mohau, 17hobane Molao o neiloe batho ka Moshe, empa mohau le 'nete li bile teng ka Jesu Kreste. 18Ha ho ea kileng a bona Molimo le ka mohla; Mora ea tsoetsoeng a 'notši, eo e leng Molimo, ea leng sefubeng sa Ntate, ke eena ea re tsebisitseng Molimo.
Bopaki ba Johanne Mokolobetsi
19Bopaki ba Johanne ke bona, mohla Bajuda ba rōmileng baprista le Balevi ho eena ba e-tsoa Jerusalema, hore ba 'motse: “U mang?” 20A bolela, a sa latōle, a re: “'Na ha ke Kreste.”
21Ba 'motsa, ba re: “Ha ho le joalo u mang? Na u Elia?”
A re: “Ha ke eena.”
“Na u Moporofeta?”
A araba, a re: “Che.”
22Joale ba re ho eena: “U mang he? Re tšoanetse ho ea nea ba re rōmileng karabo. U re'ng ha u ipolela?”
23A re:
“'Na ke lentsoe
la ea hōoang feelleng, le reng:
‘Otlollang 'mila oa Morena!’
“joalokaha moporofeta Esaea a ne a bolele.”
24Ba neng ba rōmiloe e ne e le ba Bafarisi. 25Ba 'motsa, ba re: “Ha u se Kreste, u se Elia, u se Moporofeta, ke'ng ha u kolobetsa?”
26Johanne a ba araba, a re: “'Na ke kolobetsa ka metsi; har'a lōna ho eme eo le sa mo tsebeng, 27ea tlang kamorao ho 'na, eo 'na ke sa lōkelang ho lōkōlla leqhoele la moqathatso oa hae.”
28Tsena li ile tsa etsahala Bethania, mose ho Jorodane, moo Johanne a neng a kolobeletsa teng.
Konyana ea Molimo
29Ka la hosasane Johanne a bona Jesu a e-tla ho eena, 'me a re: “Bonang Konyana ea Molimo e tlosang sebe sa lefatše! 30Enoa ke eena eo ke neng ke bua ka eena, ha ke re: ‘Kamorao ho 'na ho tla monna ea mphetang ka boholo, hobane o bile teng pele ho 'na.’ 31Ha kea ka ka mo tseba, empa ke tlile ke kolobetsa ka metsi hore a senoleloe Iseraele.”
32Johanne a paka, a re: “Ke bone Moea o theoha leholimong o ka leeba, 'me o lula holim'a hae. 33Ha kea ka ka mo tseba, empa ea nthōmileng ho kolobetsa ka metsi, o itse ho 'na: ‘Eo u bonang Moea o theohela, 'me o lula holim'a hae, ke eena ea kolobetsang ka Moea o Halalelang.’ 34Ke bone, 'me kea paka hore ke eena Mora oa Molimo.”
Barutuoa ba pele
35Ka la hosasane hape, Johanne o ne a eme le barutuoa ba hae ba babeli. 36Eare ha a bona Jesu a feta, a re: “Bonang Konyana ea Molimo!”
37Barutuoa ba hae ba babeli ba utloa ha a bua, 'me ba latela Jesu. 38Jesu ha a reteleha, 'me a ba bona ba mo latetse, a re ho bona: “Le batla'ng?”
Ba re ho eena: “Rabbi,” ke ho re: Moruti: “u lula kae?”
39A re ho bona: “Tloong, le bone.”
Ba ea, ba bona moo a lulang teng, 'me ba hlola le eena letsatsi leo; e ne e ka ba hora ea bone mantsiboea.
40Andrease, ngoan'abo Simone Petrose, e ne e le e mong oa ba babeli ba utloileng Johanne, ba latetseng Jesu. 41Andrease a qala ka ho batla ngoan'abo, Simone, a re ho eena: “Re fumane Mesia,” ke ho re: Kreste.
42A mo isa ho Jesu. Jesu a mo talima, a re: “U Simone, mor'a Johanne; u tla bitsoa Kefase,” ke ho re: Petrose.
Jesu o bitsa Filipi le Nathanaele
43Ka la hosasane Jesu a rera ho ea Galelea, 'me a fumana Filipi. A re ho eena: “Ntatele!”
44Filipi e ne e le oa Bethesaida, e leng motse oa habo Andrease le Petrose. 45Filipi a fumana Nathanaele, 'me a re ho eena: “Re fumane eo Moshe a ngotseng ka eena Molaong, le baporofeta ba ngotseng ka eena, e leng Jesu, mor'a Josefa oa Nasaretha.”
46Nathanaele a re ho eena: “Na ho na le ho molemo ho ka tsoang Nasaretha?”
Filipi a re ho eena: “Tloo, u bone.”
47Jesu a bona Nathanaele a e-tla ho eena, a bua ka eena: “Bonang Moiseraele oa 'nete, eo ho se nang mano ho eena!”
48Nathanaele a 'motsa, a re: “U ntsebella kae?”
Jesu a mo araba, a re: “Ke u bone pele Filipi a u bitsa u le katlas'a sefate sa feiee.”
49Nathanaele a mo araba, a re: “Rabbi, u Mora oa Molimo, u Khosi ea Iseraele.”
50Jesu a mo araba, a re: “Na u lumela kahobane ke u boleletse hore ke u bone tlas'a sefate sa feiee? U tla bona tse kholo ho feta tsena.” 51A re ho eena: “Kannete-nete, kea le bolella, le tla bona leholimo le bulehile, 'me mangeloi a Molimo a nyoloha, a theohela holim'a Mor'a Motho.”
