Jeremia o ruta ka Tempeleng
1Lena ke lentsoe le ileng la fihla ho Jeremia, le e-tsoa ho Morena, le re: 2“Ema monyako oa Tempele ea Morena, u phatlatlatse lentsoe lena u le hona teng, u re: ‘Mamelang lentsoe la Morena, lōna bohle ba morabe oa Juda, ba kenang ka monyako ona ho tla khumamela Morena. 3Morena oa mabōtho, Molimo oa Iseraele, o bua tjena: Lokisang metsamao ea lōna le liketso tsa lōna, 'me ke tla etsa hore le ahe sebakeng sena. 4Le se ke la tšepa lipolelo tsa leshano, tse reng: “Ena ke Tempele ea Morena, Tempele ea Morena, Tempele ea Morena!”
5“ ‘Haeba le ka lokisa metsamao ea lōna le liketso tsa lōna hantle; haeba le ka sebeletsana ka toka; 6haeba le sa hatelle molichaba, khutsana le mohlolohali, 'me le sa tšolle mali a se nang molato sebakeng sena; kapa le sa khumamele melimo esele, e leng ntho e kotsi ho lōna; 7ke tla etsa hore le ahe sebakeng sena, naheng eo ke neng ke e nee baholo-holo ba lōna, hore e be ea bona kamehla eohle.
8“ ‘Bonang mona, le tšepa lipolelo tsa leshano, tse ke keng tsa le tsoela molemo. 9Na le tla utsoa, le bolaee, le fèbè, le hlapanye ka leshano, le chesetse Baale mokubetso, le khumamele melimo esele, eo le sa e tsebeng; 10ebe lea tla, le fihla le ema kapele ho 'na ka Tempeleng ee e bitsoang ka lebitso la ka, le re: “Re namoletsoe!” Le namoletsoe ho etsa manyala aa 'ohle? 11Na Tempele ee e bitsoang ka lebitso la ka, ho lōna e fetohile lehaha la linokoane? Empa hona ke ho bone! ho rialo Morena.
12“ ‘Hona joale e-eang sebakeng sa ka se Shilo, moo ke neng ke qale ho etsetsa Lebitso la ka Leaho teng, le bone seo ke neng ke se etse sebakeng seo ka baka la bokhopo ba sechaba sa ka sa Iseraele. 13Tsena tsohle le li entse, ho rialo Morena. Ke buile ho lōna ka makhetlo-khetlo, empa ha lea ka la 'mamela. Leha ke le bitsa ha lea ka la nkarabela. 14Ka baka leo, seo ke ileng ka se etsa Shilo, ke tla se etsa Tempeleng ena e bitsoang ka lebitso la ka, eo le e tšepang, le sebakeng sena seo ke neng ke se nee lōna le baholo-holo ba lōna. 15Ke tla le leleka pel'a mahlo a ka, joalokaha ke ile ka leleka bana babo lōna, e leng litlōhōlō tsohle tsa Efraime.’ ”
Sechaba ha se hlomphe
16“Ka baka leo, uena Jeremia, u se ke ua rapella sechaba sena; u se ke ua ipiletsa ho 'na ka lebitso la sona, kapa ua se rapella. U se ke ua se etsetsa thapeli, hobane ha ke na ho u mamela. 17Na ha u bone seo sechaba see se se etsang metseng ea Juda le literateng tsa Jerusalema? 18Bana ba roalla patsi, bo-ntat'a bona ba besa mollo, basali ba luba hlama, ba etsetsa mofumahali oa leholimo maqebekoane. Ba etsetsa melimo e meng linyehelo tsa lino, hore ba mphephetse ke tle ke utloe bohlōkō. 19Empa na ba utloisa 'na bohlōkō? ho rialo Morena. Na hase bona ba ikutloisang bohlōkō, ba tla hlajoa ke lihlong?
20“Ka baka lena, Morena Molimo o bua tjena: ‘Ke tla theolela bohale ba ka le khalefo ea ka holim'a sebaka sena, holim'a batho le liphoofolo, holim'a lifate tsa naha le holim'a tse behoang ke naha. Khalefo ea ka e tla tuka, 'me e ke ke ea tingoa.’
21“Morena oa mabōtho, Molimo oa Iseraele, o bua tjena: ‘Kopanyang linyehelo tsa lōna tsa secheso le mahlabelo a lōna, ebe le ja nama eo! 22Mohl'a letsatsi leo ke neng ke ntše baholo-holo ba lōna naheng ea Egepeta ka lona, ha kea ka ka bua le bona, kapa ka ba etsetsa taelo, malebana le linyehelo tsa secheso le mahlabelo. 23Empa ke ne ke ba nee molao ona, ka re: Ntlhompheng, ke tla ba Molimo oa lōna, 'me lōna le be sechaba sa ka. Tsamaeang ka litsela tseo ke le laetseng ho tsamaea ka tsona, le tle le phele hamonate. 24Empa ha baa ka ba mamela, leha e le ho sekèha tsebe tsa bona feela; ba 'nile ba latela mehopolo ea bona le litakatso tsa lipelo tsa bona tse manganga, tse khopo, ba khutlela morao, ba se ke ba ea pele. 25Ho tloha mohla baholo-holo ba lōna ba tsoang naheng ea Egepeta ho fihlela kajeno, ka makhetlo-khetlo, le ka matsatsi 'ohle, ke 'nile ka le rōmela bahlanka ba ka, e leng baporofeta bohle. 26Empa ha baa ka ba mamela, leha e le ho sekèha tsèbè tsa bona feela. Ba ile ba satalatsa melala, ba etsa tse khopo ho feta tse neng li etsoe ke baholo-holo ba bona.’
27“Ka baka lena, u tla ba bolella lipolelo tsena tsohle, empa ha ba ka ke ba u mamela; ha u ba bitsa ha ba na ho arabela. 28Empa uena u tl'u re ho bona: ‘Sechaba sena ke se sa hlompheng lentsoe la Morena Molimo oa sona, se sa utloeng ha se khalemeloa, 'nete e felile, 'me ha e sa le eo melomong ea sona.’ ”
Liketso tse khopo ka Khohlong ea Hinome
29“ ‘Uena Jerusalema,
beola moriri oa hao, u o lahle,
bina koli-ea-malla holim'a maralla,
hobane Morena,
ka baka la khalefo ea hae,
o lahlile, a furalla
molōko o mo halefisitseng.
30“ ‘Bana ba Juda ba entse bokhopo mahlong a ka, ho rialo Morena. Ka Tempeleng e bitsoang ka lebitso la ka ba kentse manyala a bona, hore ba e silafatse. 31Ka Khohlong ea Mora oa Hinome ba hahile aletare e bitsoang Tofete, moo ba chesetsang bara ba bona le barali ba bona teng ka mollo, e leng seo ke sa kang ka ba laela sona, le ho se nahana ke e-s'o se nahane. 32Ka baka leo bonang, ho rialo Morena, matsatsi aa tla, ao mohla a fihlang, Tofete e ke keng ea hlola e sa bitsoa Tofete kapa Khohlo ea Mora oa Hinome, empa e tla bitsoa Khohlo ea Polaelo, hobane ho tla epeloa bafu ho eona ho fihlela sebaka seo se tlala. 33Litōpō tsa sechaba sena li tla jeoa ke matlaka le libatana tsa naha, 'me ha ho ea tla li leleka. 34Metseng ea Juda le literateng tsa Jerusalema ke tla felisa mehoo ea thabo le ea nyakallo, ke felise lentsoe la monyali le lentsoe la monyaluoa, hobane naha e tla fetoha lehoatata.’ ”
