JEREMIA 51

“Ke tla tsosa moea o timetsang,

moea oa khalefo,

ke o tsosetse Babilona

le baahi ba eona.

₂Ke tla rōmela balichaba

naheng ea Babilona,

ho ea e hlōkōla

ba e siea e le feela:

Mohl'a tsatsi la koluoa ea Babilona,

ba tla e futuhela

ba e hlahile kahohle.

₃Oa seqha o tla hloka nako

ea ho fula ka seqha,

a hloke le nako

ea ho apara tsa ntoa.

Le se qenehele bacha ba Babilona,

mabōtho 'ohle a Babilona

le a timetse!

₄Baahi ba Babilona ba tla bolaoa,

tōpō tsa bona e be mofela

har'a literata!

₅Baiseraele le Bajuda

ha baa furalloa ke Molimo,

Molimo oa bona,

Moren'a mabōtho,

le hoja naha ea bona e tletse melato,

melato e sitetsoeng

Ea Halalelang oa Iseraele.

₆“Bohle balehang

naheng ea Babilona!

Se timetsoeng

ka baka la bokhopo ba eona!

Nako ena ke ea hore

Morena a iphetetse,

a putse Babilona

ka mokhoa o phethehileng.

₇Babilona e n'e le mokhako

oa khauta tsohong la Morena,

mokhako o il'a tahisa

lefatše lohle.

Lichaba li ile tsa noa veine,

veine ea Babilona,

joale chaba tseo

li fetohile mahlanya!

₈Babilona e oele hang-hang

ea bjaramana!

Llelang Babilona ke hona!

E feng setlolo

sa ho thoba maqeba a eona

haeba le re ho etsa joalo

ho tla e phekola.

₉“ ‘Re ka be re ile ra e phekola,

empa Babilona

ha e ka ke ea phekoleha;

a re e tloheleng ke hona he,

motho ka mong

a khutlele naheng ea habo,

hobane kotlo tsa Babilona

ke mohlomelo,

li fihla maholimong,

li lopalletse holimo

ho ea fihla marung!’

₁₀“ ‘Morena o re lokolotse

molatong oa rōna,

tloong, re e'o phatlalatsa tsena Sione,

re bolele mesebetsi ea Morena,

Molimo oa rōna.’

₁₁“Chorisang metsu,

le nke lithèbè tsa lōna,

Morena o phephelitse

khosi tsa Bamede li halefile,

sepheo sa hae

ke ho timetsa Babilona.

Bona ke bona boiphetetso,

boiphetetso ba Morena,

ke ho phetetsa le Tempele ea hae.

₁₂Phahamisang mokhèlè

holim'a marako a Babilona!

Matlafatsang balebeli ba motse!

Beang liboholi, le bee le balalli,

hobane Morena o tla phetha

morero oa hae,

morero oo a soketseng

baahi ba Babilona ka oona.

₁₃Uena ea ahileng

pel'a linōka tse kholo,

uena ea nang le matlotlo

a le mangata,

pheletso ea hao kajeno e s'e fihlile,

nako ea bophelo ba hao e s'e felile.

₁₄Morena oa mabōtho o se a ikanne:

Ke tla tlatsa batho

har'a naha ea hao,

bongata ba bona

bo lekane le ba litsie;

ba tla u hlabela mekhosi

ea ho u hlōla.”

₁₅“Ka matla a hae

Morena o hlolile lefatše,

ka bohlale ba hae

a tsitsisa methèo ea lona,

ka kutloisiso ea hae

a ala le maholimo.

₁₆Ha a thoathoaretsa

metsi a leholimo aa qhoebeshana,

o nyolla moholi

pheletsong tsa lefatše.

Ha pula e e-na

o tsekemisa lehalima,

a bulele meea

moo a nts'a e koaletse teng.

₁₇“Batho bohle ke lithoto,

le tsebo ha ba na eona,

malala 'ohle a khauta

a hlabisoa lihlong,

a hlabisoa lihlong ke melingoana,

melingoana ena ea 'ona

ke ea leshano,

melingoana ena ea 'ona

ha e phefumolohe.

₁₈Ke ntho tsa mafeela,

ke ntho tsa ho nyelisoa,

e tla timela

mohl'a tsatsi la kotlo ea eona.

₁₉Molimo oa Jakobo

ha a tšoane le melingoana,

hobane eena ke 'mōpi

oa tsohle-tsohle,

o khethile Iseraele

hore e be chaba sa hae:

Morena oa mabōtho

ke lona lebitso la hae.”

₂₀“U tšukulu ea ka,

hlomo sa ka sa ntoa,

hobane ka uena

ke tla qhemetsaka lichaba,

ka uena mebuso eohle ke e felise.

₂₁Ka uena ke tla qhemetsa

pere le mopalami,

ka uena ka qhemetse kariki ea ntoa,

ke e qhemetse le moqhobi oa eona.

₂₂Ka uena ke tla qhemetsa

monna le mosali,

ka uena ke qhemetse

maqheku le licharōla,

ka uena ke qhemetse

banana le bashanyana.

₂₃Ka uena ke tla qhemetsa

molisa le mohlape oa hae,

ka uena ke qhemetse

molemi le lipholo tsa hae,

ka uena ke qhemetse

babusi le babusisi.

₂₅“Uena thaba e timetsang

kea u loantša,

uena ea timetsang lefatše lohle,”

“Ke tla u nanabela ka letsoho la ka,

ke u thètè, u oele,

ke u lihele ka lilomong,

ke u tšoantše le thaba e le lehōkō.

₂₆Lejoe la mantlha

le ke ke la nkuoa ho uena,

kapa lona lejoe la ho etsa mothèo,

hobane u tla fetoha nanaola

kamehla eohle,”

₂₇“Phahamisang mokhēlē

le har'a naha!

Letsang lenaka har'a lichaba!

Hlophisang lichaba

li futuhele Babilona,

le meme mebuso ena e e futuhele:

Ararate le Mini le Ashekenase.

Khethang molaoli ea tla e futuhela,

le rōmele lipere

tse kang boieane ba litsie.

₂₈Hlophisang lichaba

li futuhele Babilona,

likhosi tsa Bamede le li meme,

le meme babusi

le bahlanka ba tsona,

le linaha tsohle tseo ba li busang.

₂₉Lefatše lea reketla, lea meneka,

Morena o tsitsisitse

morero oa hae oa Babilona,

morero oa hore naha ea Babilona

a e falatse,

a e falatse ho se be

ea ka phelang ho eona.

₃₀Bahlabani ba Babilona

ba khaolitse ho loana,

ba haneletse

ka liqhobosheaneng tsa bona!

Sebete sa bona se se felile,

ba se ba itšoanela le basali feela.

Liahelo tsa Babilona

li chesitsoe ka mollo,

mekoallo ea likhoro tsa eona

e robiloe.

₃₁Barōmuoa ba rōngoa

ba sa tsoa rōngoa,

maqosa le 'ona a salana morao,

ho isetsa khosi ea Babilona litaba:

Motse oohle oa eona o s'o hapiloe!

₃₂Maliboho a linōka a hapiloe,

liqhobosheane li tuka malakabe,

bahlabani bona ba kenoe ke tšabo!”

“Moroetsana Babilona,

o tšoana le seotlo,

ka nako eo ho pōloang ka eona,

nako ea hore a kotuloe e haufi.”

₃₄“Nebukadenesare,

khosi ea Babilona, o 'metsitse,

tsohle tsa ka o ikhapetse tsona,

a ntšiea ke ka nkho e lephaka.

O 'metsitse joaloka kholumolumo,

a sasamatsa mpa ea hae

ka limonate tsa ka,

a mpusulosa, a ba e nteleka.

₃₅Baahi ba Sione ba bue, ba re:

‘Botubo boo re tubiloeng ka bona,

ho hlōkōfatsoa ha 'mele ea rōna,

tsena li ke li oele Babilona holimo!’

Baahi ba Jerusalema bona ba re:

‘Bakalatiea ba ke ba otloe,

ba otleloe mali

ao ba a tšolotseng.’ ”

“Bona, ke tla u buella

ke be ke u phetetse,

mehloli ea metsi a Babilona

ke tla e pshesa,

liliba tsa eona li khaotse ho kopotsa.

₃₇Babilona e tla ba qubu ea masupi,

e fetohe lehae la liphokojoe;

e tla fetoha sesomo, e nyelisehe,

e be baka seo

ho se nang baahi ho sona.

₃₈“Baahi ba Babilona

ba puruma sa litaoana,

ba rora sa malinyane a tauhali.

₃₉Etlare ba sa halakehetse lijo,

ke ba etsetse mokete oa semetletsa,

ke ba noese hore ba be ba tahoe,

ba robale, ba roballe ruri,

ba khalehe, ba se hlole ba tsoha,”

₄₀“Ke tla ba khannela tlhabong

sa likonyana,

ke ba khanne sa liphooko le lipōli.”

₄₁“Motse oa Babilona ba o hapile!

Motse oo fatše lohle

le neng le itlotla ka oona,

o fetohile sesomo har'a lichaba!

₄₂Leoatle le phuthumanehetse

holim'a Babilona,

maqhubu a lona a befileng

a e koahetse.

₄₃Metse ea Babilona e ripitliloe,

naha e fetohile sekaka le lehoatata,

naha e se nang baahi le batsamai.

₄₄Ke tla otla Bele,

molingoana oa Babilona,

tseo a li metsitseng

ke mo hlatsise tsona.

Chaba ha li sa tla hlola

li mathela ho eena,

marako a Babilona a tla heleha.

₄₅“Lōna chaba sa ka,

tsoang motseng oo,

motho ka mong a ke a ipholose,

a balehe khalefo ea Morena,

khalefo e tlōkōmang.

₄₆Pelo tsa lōna

li se ke tsa nyahama,

taba tsa bo-fuufu

li se ke tsa le tšosa,

taba tsa bo-fuufu

tse tletseng har'a naha.

Joalokaha lilemo li hlahlamana,

tsa bo-fuufu le tsona lia hlahlamana;

naha e ferekantsoe ke moferefere,

babusi le bona baa suthisana.

₄₇Ka baka leo, nako e tla fihla,

nako ea hore ke otle

melingoana ea Babilona;

naha eohle ea Babilona e tla ripitloa,

babolauoa ba eona

ba rapalle kahohle ho eona.

₄₈Leholimo le lefatše

le tsohle tse ho lona,

li tla bina,

li thabele ho hlōloa ha Babilona,

hobane batupi ba tla e futuhela,

ba e futuhele ba e-tsoa Lebōea,”

₄₉“Ka baka la Baiseraele

bao e ba bolaileng,

Babilona le eona e tla hlōloa,

joaloka babolauoa ba lefatše lohle,

ba bolailoeng ka baka la Babilona,”

₅₀“Lōna ba phonyohileng sabole,

tsamaeang, le se ke la lika-lika!

Hopolang Morena

le le naheng e hōle,

le nahane le eona Jerusalema.”

₅₁“Re lihlong,

hoba re utloile tse re nyatsang,

fahleho tsa rōna

li aparetsoe ke masoabi;

hoba balichaba ba kene

libakeng tse halalelang,

ba kene ka Sehalalelong

sa Tempele ea Morena.”

₅₂“Ka baka leo, bonang,

matsatsi aa tla,”

“ao ka 'ona ke tla otla

melingoana ea bona,

har'a naha eohle

mahlatsipa a tla lumaela.

₅₃Leha Babilona

e ka nyolohela leholimong,

ea sireletsa marako

a qhobosheane tsa eona,

ke tla e romela batupi

ba e futuhele,”

₅₄“Lillo tsa mahlomola

li hlaba Babilona,

ho utloahala melumo

ea kuluoa e kholo,

koluoa e tsoang

naheng ea Bakalatiea.

₅₅Morena o timetsa Babilona,

o felisa lerata le leholo motseng;

ba e futuhetseng

ba hoasa sa metsi a leoatle,

ho utloahala mokhosi

oa bona oa ntoa.

₅₆Batupi

ba etselitse Babilona lelobelo,

bahlabani ba eona ba ba thōpile,

liqha tsa bona tsohle li robehile,

hobane Morena ke Molimo

ea phetetsang,

o tla ba lefeletsa ka ho tlala.

₅₇Baetapele ba eona le bahlalefi

ke tla ba tahisa,

ke tahise babusi

le balaoli le bahlabani.

Ba tla robala, ba roballe ruri,

ba khalehe, ba se hlole ba tsoha.”

“Rako le leholo la Babilona

le tla heletsoa,

khoro tsa eona tse phahameng

li chesoe ka mollo;

sechaba sena se sebelelitse lelea,

mesebetsi ea sona

e fella malakabeng!”