JEREMIA 5

₁“Nyolosang, le theose literata,

terata tsa Jerusalema;

le qamake kahohle le hlokomele,

le batlisise le mabaleng a motse;

ha le ka fumana motho

leha a le mong,

motho ea etsang toka,

ea batlang 'nete,

motse oa Jerusalema

ke tla o tšoarela.

₂Leha ba hlapanya, ba re:

‘Ka Morena ea phelang,’

'nete ke hore

ba hlapanya ka thetso.”

₃Morena, ha ke re uena

u batla 'nete?

U ba otlile,

ha baa utloa bohlōkō;

u ba khahlōtse,

ha baa boela tseleng,

ba thatafalitse

fahleho tsa bona sa lejoe,

ba hanne ho bakela libe tsa bona.

₄Eaba 'na ke re:

“Bana ke bathoana

ba hlokang tsebo,

bao tsela ea Molimo

ba sa e tsebeng,

ba sa tsebeng taelo

tsa Molimo oa bona.

₅Ke tla ea ho ba baholo,

ke buisane le bona;

tsela ea Morena bona baa e tseba,

ba tseba le taelo

tsa Molimo oa bona.”

Empa kaofela ha bona

joko ba e robile,

marapo le 'ona ba a khaotse.

₆Kahoo tau tsa meru

li tla ba bolaea,

phiri tsa lehoatata li ba harolake,

mangau a solle har'a metse ea bona.

Bohle ba tsoelang kantle

ba tla tsekolloa,

hobane libe tsa bona li ngata-ngata,

bokoenehi ba bona bo feta tekanyo.

₇“Nka u tšoarela tsee

ka baka la'ng?

Bana ba hao ba mphuraletse,

ba hlapanya ka melimo

eo e seng melimo.

Hoba ke ba fepe,

ba je sa mpana-phatloha,

ba ile ba ikabela ho etsa bofèbè,

ba hlolokana matlung a liotsoa.

₈Ba ka poho tsa lipere

tse fepehileng,

tse batlang ho thōkōla,

monna ka mong

o lakatsa mosali oa e mong.

₉Na ha ke lokele

ho ba otlela tsee?”

“Na chaba se tjee ha se lokeloe

ke boiphetetso ba ka?

₁₀“Kenang har'a merara ea sona

le e robake,

feela le se ke la e roba

kaofela ha eona;

makala a eona le a khaole,

hobane makala ao

hase makal'a Morena.

₁₁Ba ntlo ea Iseraele

le ba ntlo ea Juda,

ba ntlhoketse botšepehi haholo,”

“Ha a ka ke a re etsa letho;

bobe bo ke ke ba re oela holimo,

ntoa le tlala ha re sa tla li bona!

₁₃Baporofeta bona ke moea feela,

ha ba na molaetsa

o tsoang ho Morena;

a ba ke ba timele ke hona!”

“Kaha sechaba

se buile mantsoe ana,

bona, polelo tsa ka

tse tsoang molomong oa hao,

ke tla li etsa mollo,

chaba sena e be patsi

e chesoang ke oona.

₁₅Uena ntlo ea Iseraele,”

“ke tlisa chaba se tsoang hōle

ho u futuhela,

chaba sa khale, sa boholo-holo,

chaba seo puo ea sona

u sa e tsebeng,

chaba seo leme la sona

u sa le tsebeng.

₁₆Lihlajoa tsa sona

li ka bitla le ahlameng,

kaofela ke chaba sa linatla,

natla tsa bahlabani.

₁₇Se tla ja lijalo le lijo tsa hao,

se je bara le barali ba hao;

se je mehlape ea likhutšoane

le ea likhomo,

se je morara le feiee ea hao.

Metse e hahetsoeng marako,

eo u e tšepang,

e tla timetsoa ka sabole,

e timetsoe ke sera seo.

₂₀“Bolelang tsena

ho ba ntlo ea Jakobo,

le li phatlalletse

ba ntlo ea Juda, le re:

₂₁Mamelang tsena,

lōna chaba se sethoto,

lōna chaba se se nang kutloisiso,

chaba se nang le mahlo

empa se sa bone,

chaba se nang le litsèbè

empa se sa utloe:

₂₂Na ha le ntšabe?”

“Ha le thōthōmele ke'ng

ha le le kapele ho 'na?

'Na ea etselitseng leoatle moeli,

ka o etsa ka lehlabathe,

moeli o sa tloheng,

oo le ke keng la o tlōla?

Maqhubu a ka tsulubutlana,

a ke ke be a o tlosa!

A ka hoasa a ratile,

a ke ke be a o tlōla!

₂₃Empa chaba sena se manganga,

se fetohaka feela;

se se se khelohile,

'me joale se iketse.

₂₄Ha se sa bua le ka lipelo, sa re:

‘A re tšabeng Morena,

Molimo oa rōna,

ea re nesetsang lipula tsa hoetla,

le mafafatsane a selemo

ka nako ea teng;

ea sa keng a lebala

ho re tlisetsa

linako tse sa fetoheng,

nako tsa ho kotula.’

₂₅Litšito tsa lōna

li thibetse tsena,

libe tsa lōna

tsa le amoha melemo ena.

₂₆“Batho ba khopo ba teng

chabeng sa ka,

ba lallang sa batšosi ba linonyana,

sa ba chehang lifi

hore ba khate batho.

₂₇Joalokaha serobe

se ee se tlale linonyana,

matlo a bona le 'ona

a tletse thetso,

kahoo baa matlafala,

leruo la bona le ate.

₂₈Baa rōtōlōha,

ba be moropotsana,

ketso tse khopo tsa bona

ke tse se nang moeli;

ha ba ahlōle linyeoe ka toka,

ha ba buelle likhutsana linyeoeng,

ha ba loanele tokelo tsa mafutsana.

₂₉Na ha ke lokele

ho ba otlela tsee?”

“Na chaba se tjee ha se lokeloe

ke boiphetetso ba ka?

₃₀“Ntho e tšabehang,

e nyonyehang haholo,

e etsahetse kahar'a naha ena:

₃₁Baporofeta ba porofeta leshano,

baprista ba khema le baporofeta,

chaba sa ka se rata

ha taba li eme joalo.

Le tla etsa'ng

ha tsee li fihla qetellong?”