Kōpo ea Sedekiea ho Jeremia
1Khosi Sedekiea, mora oa Josiea, a etsoa khosi ea Juda ke Nebukadenesare, khosi ea Babilona, a mo nea setulo sa Koniea, mora oa Jehoeakime. 2Empa Sedekiea le bahlanka ba hae, le baahi ba naha eo, ha baa ka ba mamela mantsoe a Morena, ao a a buileng ka molomo oa moporofeta Jeremia.
3Khosi Sedekiea a rōma Jukale, mora oa Shelemiea, le moprista Sofonea, mora oa Maasiea, ho moporofeta Jeremia, a re: “Ak'u re rapelle ho Morena Molimo oa rōna hle!”
4Kaha Jeremia a ne a e-s'o koalloe chankaneng, o ne a e-na le hona ho itsamaela har'a sechaba ka bolokolohi. 5Ka nako eo lebōtho la Faro le ne le tsoile Egepeta. Eare ha Bakalatiea, ba neng ba thibeletse Jerusalema, ba utloela taba tseo, ba tloha Jerusalema.
6Lentsoe la Morena la fihla ho moporofeta Jeremia, la re: 7“Morena Molimo oa Iseraele, o bua tjena: Le tle le bolelle khosi ea Juda e le rōmmeng ho 'na, le re: ‘Bona mona, lebōtho la Faro le tlileng ho tla le thusa le tla khutlela Egepeta, naheng ea habo lona. 8Bakalatiea ba tla boela ba e-tla, ba futuhele motse ona, ba o hape, ba o chese ka mollo.’
9“Kahoo Morena o bua tjena: Le se ke la ithetsa ka ho re: ‘Ruri Bakalatiea ba tla re tlohela.’ Ba ke ke ba le tlohela! 10Leha le ne le ka bolaea lebōtho lohle la Bakalatiea le le futuhetseng, 'me ha sala mahlatsipa feela ka litenteng, a ne a tla tsoa ka litenteng tsa 'ona, a chese motse ona ka mollo.”
Jeremia o kenngoa chankaneng
11Ha lebōtho la Bakalatiea le se le tlohile Jerusalema ka lebaka la ho tšaba lebōtho la Faro, 12Jeremia o ile a tloha Jerusalema, a ea naheng ea Benjamine, ho ea fumana lefa la hae har'a sechaba sa habo. 13Eitse ha a fihla Monyako oa Benjamine a fumana molaoli oa balebeli moo, eo lebitso la hae e neng e le Jiriea, mora oa Shelemiea, setlōhōlō sa Hananiea. Eaba Jiriea o tšoara moporofeta Jeremia, o re: “Uena u il'o ineela ho Bakalatiea!”
14Jeremia a re: “U leshano! Ha ke e'o ineela ho Bakalatiea!” Empa Jiriea a se ke a mo mamela, a mo tšoara, a mo isa ho babusi. 15Eaba babusi ba halefela Jeremia haholo, baa mo shapa, ba mo kenya chankaneng, ka tlung ea Jonathane, eo e neng e le mongoli oa puso, e leng ntlo eo ba neng ba e fetotse chankana. 16Jeremia a lahleloa ka chankaneng e lefifi e katlas'a ntlo, 'me a hlola teng nako e telele.
17Eaba khosi Sedekiea o laela hore Jeremia a ntšoe ka chankaneng, a tlisoe tlung ea bokhosi, 'me a 'motsa ka lekunutu, a re: “Na u na le molaetsa o tsoang ho Morena?”
Jeremia a araba, a re: “E, o teng. Morena o itse ho tla neelanoa ka uena matsohong a khosi ea Babilona.”
18Jeremia a tsoela pele, a re ho khosi Sedekiea: “Uena kapa bahlanka ba hao, kapa sechaba see, ke le sitetsoe ka eng ha e le moo le nkentse chankaneng tjee? 19Ba kae joale baporofeta ba hao, ba ileng ba u porofetela, ba re: ‘Khosi ea Babilona ha e ka ke ea u futuhela, kapa ea futuhela naha ena?’ 20Kahoo ak'u mamele, kea u rapela hle, mong'a ka, khosi ea ka, ak'u amohele thapeli ea ka: Se hlole u nkhutlisetsa tlung ea Jonathane, eo e leng mongoli, esere ka ea shoela teng.”
21Eaba khosi Sedekiea o laela hore ba boloke Jeremia lebaleng la chankana, le hore ka tsatsi le leng le le leng a fuoe sengoathoana sa bohobe bo tsoang ho ba phehang bohobe, ho fihlela bohobe bo fela motseng moo. Eaba Jeremia o lula moo lebaleng la chankana.
