Jeremia le Barekabe
1Mehleng ea Jehoeakime, mora oa Josiea, khosi ea Juda, lentsoe le tsoang ho Morena le ile la fihla ho Jeremia, la re: 2“Tsamaea u e'o bua le morabe oa Barekabe, ebe u ba tlisa ka Tempeleng ea Morena, u ba kenya ka ho e 'ngoe ea likamore, u ba fa veine hore ba e noe.”
3Eaba ke nka Jaasaneea, mora oa Jeremia, setlōhōlō sa Habasiniea le bana babo, le bara ba hae bohle, le morabe oohle oa Barekabe. 4Ka ba tlisa ka Tempeleng ea Morena, ka ba kenya ka kamoreng ea bara ba Hanane, mora oa Jigedaleea, moporofeta oa Molimo ea neng a le haufi le kamore ea mahosana, e neng e le kaholimo ho kamore ea Maasiea, mora oa Shalōme, eo e neng e le molebeli oa monyako. 5Eaba ke bea kapele ho ba morabe oa Barekabe linkho tse tletseng veine, ka bea le mehope, ka re ho bona: “Noaang veine ke ena.”
6Empa bona ba re: “Re ke ke ra noa veine, hobane ntat'a rōna moholo Jonadabe, mora oa Rekabe, o ne a re laele, a re: ‘Lōna le bana ba lōna le se ke la noa veine le ka mohla! 7Le se ke la haha le matlo, kapa la jala peō, kapa la lema lirapa tsa morara, kapa la ba le e 'ngoe ea lintho tsena, empa ka matsatsi 'ohle a bophelo ba lōna le iphelele litenteng, hore le tle le phele halelele naheng eo le e jakileng.’ 8Kahoo re hlomphile taelo eo ea ntat'a rōna moholo Jonadabe, mora oa Rekabe, linthong tsohle tseo a re laetseng tsona, e leng ho se noe veine ka matsatsi 'ohle a ho phela ha rōna, rōna le basali ba rōna, le bara ba rōna, le barali ba rōna. 9Ha re e-s'o ikhahele matlo ao re phelang ho 'ona; ha re na lirapa tsa morara kapa masimo leha e le eona peō. 10Haesale re iphelela litenteng, re hlompha, 'me re phetha tsohle tseo ntat'a rōna moholo Jonadabe a neng a re laele tsona. 11Empa ea na eare mohla Nebukadenesare, khosi ea Babilona, a futuhelang naha ena, ra re: ‘A re tsamaeeng, re ikeleng Jerusalema, re baleheng mabōtho a Bakalatiea le a Baarame.’ Ke ka lebaka lena re phelang mona Jerusalema.”
12Eaba lentsoe la Morena le fihla ho Jeremia, le re: 13“Morena oa mabōtho, Molimo oa Iseraele, o bua tjena: Tsamaea u e'o botsa banna ba morabe oa Juda, le baahi ba Jerusalema, u re: ‘Na le hana ho amohela litaelo tsa ka le ho mamela mantsoe a ka?’ ho rialo Morena. 14‘Litaelo tsa Jonadabe, mora oa Rekabe, ha a ne a laela bara ba hae hore ba se ke ba noa veine, li phethiloe. Ho fihlela kajeno lena ha ba noe veine, ba hlompha taelo ea ntat'a bona moholo. Le hoja 'na ke buile le lōna ka makhetlo-khetlo, ha lea ka la 'mamela. 15Hape, ka makhetlo-khetlo, ke le rōmetse bahlanka ba ka bohle, e leng baporofeta, ka re ba re ho lōna: “Motho ka mong a ke a khutle tseleng ea hae e khopo, le fetole mekhoa ea lōna, le se ke la latela melimo esele, la e sebeletsa, 'me le tla phela naheng eo ke e neileng lōna le bo-ntat'a lōna.” Empa ha lea ka la sekèha litsèbè tsa lōna, leha e le ho 'mamela. 16Litlōhōlō tsa Jonadabe, mora oa Rekabe, tsona li phethile litaelo tseo moholo-holo oa tsona a neng a li laele tsona, empa sechaba sena sona ha sea ka sa 'mamela.’
17“Ka baka leo, Morena Molimo oa mabōtho, Molimo oa Iseraele, o bua tjena: ‘Bonang mona, ke tla lihela morabe oa Juda le baahi bohle ba Jerusalema koluoa eo ke ba boleletseng hore ke tla e lihela holim'a bona, hobane ke buile le bona, empa ha baa ka ba mamela; ke ba bitsitse, empa ha baa ka ba arabela.’ ”
18Eaba Jeremia o re ho ba morabe oa Barekabe: “Morena oa mabōtho, Molimo oa Iseraele, o bua tjena: ‘Kahobane le hlomphile molao oa ntat'a lōna moholo Jonadabe, la boloka litaelo tsohle tsa hae, la etsa tsohle ho ea kamoo a le laetseng tsona kateng, 19Jonadabe, mora oa Rekabe, ha a ka ke a hloka setlōhōlō se tla ntšebeletsa,’ ho rialo Morena oa mabōtho, Molimo oa Iseraele.”
