Tšepiso ea hore Baiseraele ba tla khutlisoa
1Lentsoe la Morena la boela la fihla ho Jeremia khetlo la bobeli, ha a ntse a koaletsoe ka lebaleng la chankana, la re: 2“Morena ea entseng lefatše, ea le bōpileng a ba a le tsitsisa, eo lebitso la hae e leng Morena, o bua tjena: 3‘Ipiletse ho 'na, 'me ke tla u araba, ke u bolelle lintho tse kholo, tse matla, tseo uena u sa li tsebeng.’ 4Molimo oa Iseraele o bua tjena ka matlo a motse ona, le ka matlo a likhosi tsa Juda, a tla heletsoa hore ho hahoe lerako le thibelang ba futuhetseng motse ona ka lisabole, 5e leng Bakalatiea. Empa matlo ao a tla tlala litōpō tsa banna, bao ke tla ba bolaea ha khalefo ea ka e tlōkōma, ke lōlōma ke bohale, hobane motse ona ke o patetse sefahleho sa ka, ka baka la bokhopo ba bona bohle.
6“Leha ho le joalo ke tla tlisetsa motse ona bophelo le pheko. Ke tla folisa sechaba sa ka, ke etse hore se phele ka khotso le ka boiketlo. 7Ke tla etsa hore bathōpuoa ba Juda le bathōpuoa ba Jerusalema ba khutle, ke ba tsitsise joaloka pele. 8Ke tla hlakola makhopo 'ohle a bona, ao ba ntšitetsoeng ka 'ona, ke ba tšoarele libe tsohle tseo ba li entseng, 'me ba ntšiteloa ka tsona. 9Lebitso la motse ona le tla nthabisa, e be thoriso le tlōtla ho lichaba tsohle tsa lefatše, tse tlang ho utloela tsohle tse molemo, tseo ke li etselitseng motse ona. Lichaba tseo li tla tšaba, li thōthōmele ka baka la tsohle tse molemo, le ka baka la nala eohle, e leng tseo ke li etselitseng motse ona.
10“Morena o bua tjena: Naheng ena eo lōna le reng: ‘Ke nanaola, ha ho na batho, ha ho na liphoofolo ho eona,’ le metseng ea Juda le literateng tsa Jerusalema, tseo e leng lithako, moo ho seng batho kapa baahi, leha e le tsona liphoofolo, 11ho tla boela ho utloahala mehoo ea thabo le ea nyakallo, le lentsoe la monyali le lentsoe la monyaluoa, le mantsoe a binang, ha ba tlisa nyehelo tsa teboho ka Tempeleng ea Morena, ba re:
“ ‘Lebohang Morena oa mabōtho,
hobane Morena o lokile,
mohau oa hae
ke oa kamehla eohle,’
“hobane ke tla khutlisa bathōpuoa ba naha ena, 'me ba tla ba joaloka pele, ho rialo Morena.
12“Morena oa mabōtho o bua tjena: Naheng ena eo e leng nanaola, e se nang batho leha e le liphoofolo, le metseng eohle ea eona, ho tla boela ho e-ba le metebo, moo balisa ba tla bothisa mehlape ea bona teng. 13Metseng e lithabeng le metseng e likhohlong, le metseng e ka Boroa, le naheng ea Benjamine, le metseng e mathokong a Jerusalema, le metseng ea Juda, balisa ba sa tla boela ba bala mehlape ea bona,” ho rialo Morena.
14“Bonang, matsatsi aa tla, ao ka 'ona ke tla phethahatsa litšepiso tse molemo, tseo ke li etselitseng ba ntlo ea Iseraele le ba ntlo ea Juda,” ho rialo Morena.
15“Matsatsing ao le nakong eo, ke tla etsa hore Lekala la ho loka le hlōme mothapong oa Davida, 'me lekala leo le tla ahlōla ka toka le ka nepo lefatšeng. 16Matsatsing ao sechaba sa Juda se tla pholosoa, Jerusalema le eona e phele ka khotso. Lena ke lona lebitso leo Jerusalema e tlang ho bitsoa ka lona: Morena ke toka ea ōna.
17“Morena o bua tjena: Davida a ke ke a hloka ea tla mo hlahlama bokhosing ba Iseraele, 18le baprista ba Balevi ba ke ke ba hloka ea tla ntšebeletsa ka ho nketsetsa nyehelo ea secheso le nyehelo ea lijo, le ho nketsetsa mahlabelo kamehla.”
19Lentsoe la Morena la fihla ho Jeremia, la re: 20“Morena o bua tjena: Ha u ka ua senya selekane seo ke se entseng le letsatsi, kapa ua senya selekane seo ke se entseng le bosiu, hore letsatsi le bosiu li se hlole li e-ba teng ka nako ea tsona, 21le selekane seo ke se entseng le Davida, mohlanka oa ka, le selekane seo ke se entseng le baprista ba Balevi ba ntšebeletsang, se ka senngoa, le Davida a ka hloka mohlahlami setulong sa hae sa bokhosi. 22Joalokaha linaleli tsa leholimo li ke ke tsa baloa, le lehlabathe la leoatle le ke ke la baloa, ka mokhoa o joalo ke tla atisa litlōhōlō tsa Davida, mohlanka oa ka, ke atise le palo ea Balevi ba ntšebeletsang.”
23Lentsoe la Morena la boela la fihla ho Jeremia, la re: 24“Na ha u e-s'o lemohe seo batho baa ba se buileng, ba re: ‘Morena o boetse o lahlile malapa a mabeli ao a neng a a khethile e leng Iseraele le Juda?’ Ka baka leo, ba nyelisitse sechaba sa ka, hore ba se hlole ba se talima e le sechaba. 25Morena o bua tjena: Haeba ke ne ke sa etsa selekane le letsatsi, ke sa etsa selekane le bosiu, eba ke ne ke sa etsa melao e busang leholimo le lefatše, 26ke ne ke tla lahla litlōhōlō tsa Jakobo le tsa Davida, mohlanka oa ka, 'me ke ne ke sa tl'o khetha e mong oa bara ba hae ho busa litlōhōlō tsa Aborahama le tsa Isaka le tsa Jakobo. Ke tla khutlisa bathōpuoa bothōpuoeng ba bona, ke boele ke ba hauhele.”
