Jeremia o reka tšimo
1Ka selemo sa leshome sa puso ea Sedekiea, khosi ea Juda, e leng selemo sa leshome le metso e robeli sa puso ea Nebukadenesare, lentsoe la Morena la fihla ho Jeremia. 2Ka nako eo mabōtho a khosi ea Babilona a ne a etselitse Jerusalema thibella, 'me moporofeta Jeremia o n'a koaletsoe ka lebaleng la chankana e neng e le ka tlung ea khosi ea Juda.
3Sedekiea, khosi ea Juda, o n'a mo koaletse, a re: “Ke ka baka la'ng ha u porofeta, u re: ‘Morena o bua tjena: Bona, ke tla neelana ka motse ona matsohong a khosi ea Babilona, 'me e tla o hapa? 4Sedekiea, khosi ea Juda, a ke ke a phonyoha matsohong a Bakalatiea, empa ho tla neelanoa ka eena matsohong a khosi ea Babilona. O tla buisana le eona ba talimane. 5E tla isa Sedekiea koana Babilona, 'me o tla hlola moo ho fihlela ke mo etela,’ ho rialo Morena. ‘Leha u ka loana le Bakalatiea ha u ka ke ua atleha.’ ”
6Jeremia a re: “Lentsoe la Morena le ile la fihla ho 'na, la re: 7‘Bona, Hanamele, mora oa rangoan'ao Shalōme, o tla fihla ho uena, a re: Ithèkèlè tšimo ea ka e Anatote, hobane u na le tokelo ea ho ithèkèla eona.’
8“Eaba Hanamele, mora oa rangoane, o fihla ho 'na ka lebaleng la chankana, ho ea ka polelo ea Morena, o re ho 'na: ‘Ak'u rèkè tšimo ea ka e Anatote, naheng ea Benjamine hle, hobane u na le tokelo ea bojalefa le ea ho lopolla. Ithèkèlè eona.’
“Eaba kea tseba, he, hore lena ke lona lentsoe la Morena. 9Ka rèka tšimo ea Hanamele, mora oa rangoane, e neng e le Anatote, 'me ka mo lefa ka silefera e etsang boima ba likeramo tse makholo a mabeli. 10Ka ngola lengolo la thèko, ka le tiisa, ka bitsa le lipaki, eaba ke bea chelete sekaleng. 11Eaba ke nka lengolo leo la thèko, le neng le tiisitsoe ho ea ka molao le ka moetlo, hammoho le lengolo le neng le sa koaloa. 12Ka nea Baruke, mora oa Neriea, setlōhōlō sa Maasiea, lengolo la thèko moo mora oa rangoane, Hanamele, a leng teng, le moo lipaki tse ingotseng mabitso a tsona lengolong la thèko li leng teng, le moo Bajuda bohle ba neng ba lutse ka lebaleng la chankana ba ntseng ba bona.
13“Eaba ke laela Baruke moo ba ntseng ba utloa, ke re: 14‘Morena oa mabōtho, Molimo oa Iseraele, o bua tjena: Nka mangolo ana a mabeli a thèko, e leng le tiisitsoeng le le sa koaloang, u a boloke ka nkhong ea letsopa, hore a tle a bolokehe nako e telele. 15Morena oa mabōtho, Molimo oa Iseraele, o bua tjena: Matlo le masimo le lirapa tsa morara, tsena li tla boela li rèkoa naheng ena.’
Thapelo ea Jeremia
16“Eare hoba ke neelane ka lengolo la thèko matsohong a Baruke, mora oa Neriea, ka rapela Morena, ka re:
17“Oho, Morena Molimo, u entse leholimo le lefatše ka matla a hao a maholo, le ka letsoho la hao le otlolohileng, 'me ha ho letho le ka u sitang. 18U bontšitse lerato ho batho ba likete-kete, empa u otla bana ka baka la bokhopo ba bo-ntat'a bona. U Molimo e moholo, ea matla, Morena oa mabōtho; leo ke lona lebitso la hao. 19Merero ea hao e meholo, liketso tsa hao li matla. Mahlo a hao a bona liketso tsohle tsa batho, 'me u putsa e mong le e mong ho ea ka liketso tsa hae, le ho ea ka litholoana tsa mesebetsi ea hae. 20U entse lipontšo le mehlolo naheng ea Egepeta, le kajeno tsena u ntse u li etsa naheng ea Iseraele le har'a lichaba tse ling, 'me u tumisitse lebitso la hao ho fihlela kajeno. 21U ile ua ntša sechaba sa hao sa Iseraele naheng ea Egepeta ka lipontšo le ka mehlolo, le ka letsoho le matla le otlolohileng, le ka ho tšabeha ho hoholo, 22ua se nea naha ena, eo u neng u hlapanyetse bo-ntat'a sona hore u tla ba nea eona, e leng naha e phallang lebese le mahe a linotši. 23Ba ile ba fihla naheng ena, ba e hapa, empa ha baa ka ba hlompha lentsoe la hao, leha e le ho tsamaea ho ea ka molao oa hao. Ha baa ka ba etsa letho la tsohle tseo u neng u ba laetse hore ba li etse; ka baka lena, u entse hore bobe bona bohle bo ba oele holimo.
24“Bonang, ho se ho hahiloe marako a etsetsang motse ona thibella, hore o tle o haptjoe. Ho se ho neelanoe ka motse ona matsohong a Bakalatiea ba o futuhetseng, 'me ka baka la sabole, sekoboto le lefu la seoa, o tla oela matsohong a bona. Seo u ileng ua se bolela se phethatse, 'me le uena ua se bona. 25Empa uena Morena Molimo, u itse ho 'na: ‘Ithèkèlè tšimo ena ka chelete, u bitse le lipaki,’ feela ke mona ho neelanoe ka motse ona matsohong a Bakalatiea.”
26Joale lentsoe le Morena la fihla ho Jeremia, la re: 27“Bona mona, ke 'na Morena Molimo oa batho bohle; na ho teng se ka ntšitang? 28Ka lebaka lena, Morena o bua tjena: Ke tla neelana ka motse ona matsohong a Bakalatiea, le matsohong a Nebukadenesare, khosi ea Babilona, 'me o tla o hapa. 29Bakalatiea ba futuhetseng motse ona, ba tla fihla ba o chese ka mollo, hammoho le matlo ao beng ba 'ona ba nkhalefisitseng ka ho chesetsa Baale mokubetso holim'a marulelo a matlo ao a bona, le ka ho etsetsa melimo esele nyehelo ea lino.
30“Bana ba Iseraele le bana ba Juda ba entse bobe feela mahlong a ka ho tloha bocheng ba bona. Bana ba Iseraele ba nkhalefisitse ka mosebetsi oa matsoho a bona,” ho rialo Morena. 31“Ho tloha mohla ba hahang motse ona ho fihlela kajeno, haesale motse ona o mphephetsa hore ke halefe, ke lōlōme ke bohale, 'me joale ke rerile ho o timetsa; 32ka baka la bokhopo ba bana ba Iseraele le ba bana ba Juda, boo ba bo entseng hore ba nkhalefise, bona le likhosi tsa bona, le babusi ba bona, le baprista ba bona, le baporofeta ba bona, le banna ba Juda le baahi ba Jerusalema. 33Ba mphuraletse, fahleho tsa bona ha lia sheba ka ho 'na. Le hoja ke 'nile ka ba ruta ka makhetlo-khetlo, ha baa ka ba mamela litaelo tsa ka. 34Ba ile ba bea melimo ea bona e nyonyehang ka Tempeleng e bitsoang ka lebitso la ka, 'me ba e silafatsa. 35Hape ba ile ba hahela Baale libaka tsa borapeli ka Khohlong ea Mora oa Hinome, moo ba tla etsetsa Moloke sehlabelo sa secheso ka bara le barali ba bona, e leng ntho eo ke sa kang ka ba laela eona, kapa hona ho e nahana, ea ho etsa manyala ana, hore Bajuda ba etse sebe.
Baiseraele ba tšepisoa tse molemo
36“Ka baka lena, Morena Molimo oa Iseraele, o bua tjena ka motse ona, oo ha u bua ka oona u reng: ‘Motse ona o tla neoa khosi ea Babilona ka sabole, le ka sekoboto, le ka lefu la seoa.’ 37Empa bona, ke tla phutha sechaba sena linaheng tsohle tseo ke neng ke se lelekele ho tsona, ha ke ne ke halefile, ke lōlōma ke bohale, khalefo ea ka e tlōkōma. Ke tla se khutlisetsa hape sebakeng sena, ke etse hore se phele ho sona ka khotso. 38E tla ba sechaba sa ka, 'na ke be Molimo oa sona. 39Ke tla se nea pelo e le 'ngoe le sepheo se le seng, hore se tle se ntšabe kamehla eohle, 'me sona, 'moho le litlōhōlō tsa sona, se fumane tse molemo. 40Ke tla etsa selekane sa kamehla eohle le sechaba sena, e leng selekane sa hore ha nka ke ka khaotsa ho se etsetsa tse molemo. Ke tla etsa hore se ntšabe ka lipelo tsa sona tsohle, e le hore se se hlole se mphuralla. 41Ke tla thabisoa ke ho se etsetsa tse molemo. Ke tla se tsitsisa naheng ena ka pelo ea ka eohle le ka moea oa ka oohle.
42“Morena o bua tjena: Joalokaha ke ile ka lihela sechaba sena koluoa ena eohle, ka mokhoa o joalo ke tla se tlisetsa tsohle tse molemo, tseo ke se tšepisitseng tsona. 43Naheng ena eo lōna le reng: ‘Ke nanaola, ha ho na batho kapa liphoofolo, ho se ho neelanoe ka eona matsohong a Bakalatiea,’ ho tla rekoa masimo. 44Batho ba tla rèka masimo ka chelete, ho ngoloe ho be ho tiisoe mangolo a thèko, ho bitsoe lipaki tse tsoang naheng ea Benjamine le libakeng tse haufi le Jerusalema, le metseng ea Juda, le metseng e lithabeng, le metseng e ka likhohlong, le metseng e ka Boroa. Ke tla etsa hore bathōpuoa ba khutle, ho rialo Morena.”
