Baiseraele ba tla khutlela naheng ea bona
1Lena ke lentsoe la Morena le ileng la tla ho Jeremia, le re: 2“Morena Molimo oa Iseraele, o bua tjena: ‘Ngola mantsoe 'ohle ao ke u boleletseng 'ona bukeng.’ 3Bonang, matsatsi aa tla, ho rialo Morena, ao ka 'ona sechaba sa ka sa Iseraele le sa Juda se bothōpuoeng, ke tla se khutlisetsa naheng eo ke neng ke e nee bo-ntat'a sona, hore e be ea bona,” ho rialo Morena.
4Ana ke mantsoe ao Morena a neng a a bue malebana le sechaba sa Iseraele le sa Juda.
5Morena o bua tjena:
“Re utloile seboko
se bakoang ke tšabo,
seboko sa tšabo e seng sa khotso.
6Inahaneng ke hona,
le be le botse:
Na monna a ka beleha ngoana?
Ke hobane'ng ha banna
ba itšoere matheka,
ba itšoere sa mosali a kena tlung?
Ke hobane'ng
ha fahleho tsohle li pulufetse?
7Jo, tsatsi leo le leholo haholo!
Ha ho na le ka tšoanang le lona:
Ke tsatsi la tlokotsi ea chaba sa ka,
empa chaba seo
se tla phonyoha ho eona.
8“Ka tsatsi leo,
ho rialo Moren'a mabōtho,
ke tla roba joko e molaleng oa sona,
marapo a se tlammeng ke a khaole,
se se hlole se sebeletsa balichaba.
9Se tla sebeletsa Morena,
Molimo oa sona,
se sebeletse Davida, khosi ea sona,
eena eo ke tla 'mea
ho ba khosi ea sona.
10“Ka baka leo, se tšabe letho,
uena mohlanka oa ka Jakobo,”
ho rialo Morena.
“Se tsielehe, uena Iseraele,
ke tla u pholosa
u le bakeng se hōle,
ke lopolle tlōhōlō tsa hao
naheng ea bothōpuoa;
chaba sa ka se tla khutla,
se phele ka khotso,
se phele ka boiketlo,
ho se ea se tšosang.
11Ke na le uena, ke tla u pholosa,”
ho rialo Morena.
“Le hoja ke tla timetsa
lichaba tsohle,
chaba tseo le tletsa-tletseng
har'a tsona,
uena ha nke ke ka u timeletsa ruri.
Leha ke u khalemela
e tla ba ka toka,
nke ke ka u tlohela ke sa u otla.”
12Morena o bua tjena:
“Maqeba a hao ke a sa foleng,
kotsi tsa hao ke tse sa phekoleheng.
13Ha ho ea u buellang nyeoeng,
liso tsa hao ha li na pheko,
ha ho na tšepo ea hore u tla fola.
14Bohle ba u ratang ba u lebetse,
ha ba sa re letho ke uena;
ke u otlile sa sera se u otla,
ka u tuba sa ea sehlōhō a u tuba,
ka baka la bongata
ba makhopo a hao,
hoba libe tsa hao
li ile tsa eketseha.
15U llisetsoa'ng
ke matšoenyeho a hao?
Bohlōkō ba hao
ke bo sa phekoleheng!
Ka baka la bongata
ba makhopo a hao,
le ka baka la bongata
ba libe tsa hao,
tsena ke entse hore li u hlahele.
16Bohle ba u timetsang
le bona ba tla timetsoa,
lira tsa hao tsohle
li tla thōpuoa.
Ba u hanyapetsang
ba tla hanyapetsoa,
ba u hapelang
le bona ba tla hapeloa.
17Ke tla u phekola,
ke folise maqeba a hao,”
ho rialo Morena,
“hoba ba ile ba u bitsa Molahluoa,
ba re: Ena ke Sione
e sa natsoeng ke motho.”
18Morena o bua tjena:
“Ke tla khutlisa chaba sa ka,
ke se khutlisetse naheng ea sona,
lelapa ka leng ke le hauhele.
Masupi a Jerusalema a tla tsosoa,
le eona ntlo ea bokhosi
e be e tsosoe.
19Baahi ba eona
ba tla bina lithoko,
mehoo ea thabo
le eona e utloahale.
Palo ea bona ke tla e eketsa,
'me ha ba ka ke ba fokotseha.
Ke tla be ke ba tlisetse tlōtla,
ba ke ke ba hlola ba nyeliseha.
20Bana ba bona ba tla tšoana
le mehleng ea khale,
chaba sa bona se tsitse
ke ntse ke se bona;
bahatelli ba bona bohle
ke tla ba otla.
21Khosi ea bona
e tla hlaha har'a bona,
khosana ea bona
e be e mong oa bona;
ke tla e atametsa,
e be haufi le 'na.
Ea tla ba le sebete
sa ho nkatamela ke mang?”
ho rialo Morena.
22“Lōna le tla ba sechaba sa ka
'na ke be Molimo oa lōna.”
23Setsokotsane sa Morena
se ferella se halefile,
ke tsokotsane se puputlang
se sa khaotse;
se tla theohela
holim'a hlooho tsa ba khopo.
24Khalefo e tlōkōmang ea Morena
ha e na ho khaotsa
ho fihlela Morena
a phethile morero oa hae;
mehleng e tlang
le tla utloisisa tsena hantle.
