Lengolo le ngoletsoeng bathōpuoa
1Ana ke mantsoe a lengolo leo moporofeta Jeremia a neng a le ngole a le Jerusalema, a le ngolla masalla a baholo ba sechaba ba ileng ba thōpuoa, le baprista le baporofeta le sechaba sohle seo Nebukadenesare a neng a ile a se thōpa Jerusalema, a se isa Babilona. 2Le ile la ngoloa hoba batho bana ba tlohe Jerusalema, e leng khosi Koniea, le mofumahali, le matona, le mahosana a Juda le a Jerusalema, le litsebi tsa mesebetsi ea matsoho le malala. 3Lengolo le ne le rōmetsoe ka Elasa, mora oa Shafane, le Gemareea, mora oa Hilekiea, bao Sedekiea, khosi ea Juda, a neng a ba rōmme ho Nebukadenesare, khosi ea Babilona. Lengolo leo le ne le re:
4“Morena oa mabōtho, Molimo oa Iseraele, o bua tjena ho bohle ba ileng ba thōpuoa, bao ke ileng ka etsa hore ba tlosoe Jerusalema, ba isoe Babilona: 5‘Ikhaheleng matlo, le itulele ho 'ona; itemeleng lirapa, le itjelle tse melang ho tsona. 6Inyalleng basali, le itsoalle bara le barali; nyalisang bara ba lōna, le barali ba lōna ba inyalloe, ba tle ba itsoalle bara le barali, e le hore le anafale, palo ea lōna e se ke ea fokotseha. 7Motse oo ke entseng hore le isoe ho oona le le bathōpuoa le ke le o batlele khotso, le o rapelle ho Morena, hobane ke ha feela motse oo o e-na le khotso le lōna le tlang ho ba le khotso.’
8“Morena oa mabōtho, Molimo oa Iseraele, o bua tjena: ‘Se lumeleng ho thetsoa ke baporofeta ba lōna le linōhe tse phelang har'a lōna; le se ke la kholoa litoro tsa lōna, tseo le reng mathuela a li lore. 9Batho bana ba porofeta leshano ka lebitso la ka. Ha kea ba rōma,’ ho rialo Morena.
10“Morena o bua tjena: ‘Ha lilemo tse mashome a supileng tse baletsoeng Babilona li fela, ke tla le hopola, ke phethahatse tšepiso ea ka ea ho le hauhela ke le khutlisetsa sebakeng sena. 11Ke tseba merero eo ke le reretseng eona,’ ho rialo Morena, ‘merero e metle e seng e mebe, merero ea ho le nea tšepo le bophelo ba kamoso. 12Ka nako eo le tla ipiletsa ho 'na, le nthapele, 'me 'na ke tla le mamela. 13Le tla mpatla, 'me le mphumane, haeba le mpatla ka lipelo tsa lōna tsohle. 14Le tla mphumana,’ ho rialo Morena, ‘'me ke tla le khutlisa bothōpuoeng. Ke tla le phutha lichabeng tsohle le linaheng tsohle tseo ke le leleketseng ho tsona,’ ho rialo Morena, ‘ke le khutlisetse sebakeng seo ke neng ke le nke ho sona, ka le isa bothōpuoeng.’
15“Mohlomong le ka re: ‘Morena o re hlahiselitse baporofeta mona Babilona,’ 16empa Morena o bua tjena ka khosi e lutseng teroneng ea Davida le ka sechaba sohle se setseng motseng ona, e leng bang ka lōna ba sa kang ba ea le lōna bothōpuoeng, 17e, Morena oa mabōtho o bua tjena: ‘Ke tla ba bolaea ka sabole, le ka sekoboto, le ka lefu la seoa, ke etse hore ba tšoane le feiee e bolileng hoo e ke keng ea jeoa. 18Ke tla ba bolaea ka sabole, le ka sekoboto, le ka lefu la seoa, ke etse hore mebuso eohle ea lefatše e ba nyonye, hore ba tle ba rōhakoe, e be setsoto, le sekhobo, ba nyelisoe lichabeng tseo ke ba leleketseng ho tsona. 19Ke hobane ha baa ka ba mamela mantsoe a ka, ao ke 'nileng ka ba rōmela 'ona ka makhetlo-khetlo, ka bahlanka ba ka, e leng baporofeta. Empa le lōna ha lea ka la mamela,’ ho rialo Morena.
20“Ka baka leo, lōna bohle ba bothōpuoeng, bao ke ileng ka ba tlosa Jerusalema ka ba isa Babilona, mamelang matsoe a Morena. 21Morena oa mabōtho, Molimo oa Iseraele, o bua tjena malebana le Akabe, mora oa Kolaea, le Sedekiea, mora oa Maasiea, ba le porofetelang leshano ka lebitso la Morena, o re: ‘Bonang, ke tla neelana ka bona matsohong a Nebukadenesare, khosi ea Babilona; eena o tla ba bolaea moo le ntseng le bona. 22Bathōpuoa bohle ba tsoang naheng ea Juda, ba isitsoeng Babilona, ha ba rōhaka motho, ba tla re: Morena a ke a le etse seo a neng a se etse Sedekiea le Akabe, bao khosi ea Babilona e neng e ba chese ka mollo, 23hobane ba ne ba entse manyala naheng ea Iseraele. Ba etsa bohlola le basali ba ba ahelaneng le bona, ba bua leshano ka lebitso la ka, empa ke sa ba laela ho bua joalo. Le 'na kea tseba, 'me ke paki,’ ho rialo Morena.
Molaetsa o ngoletsoeng Shemaea
24“Ho Shemaea ea tsoang Nehelame le tle le bue tjena, le re: 25‘Morena oa mabōtho, Molimo oa Iseraele, o bua tjena, o re: Kaha u ngoletse sechaba sohle sa Jerusalema, ua ngolla le moprista Sofonea, mora oa Maasiea, ua ngolla le baprista bohle, ua re: 26Morena o u entse moprista bakeng sa moprista Jehoeada, hore u be molebeli oa Tempele ea Morena, e le hore motho e mong le e mong ea itlhantšang ka ho iketsa moporofeta, u mo kenye chankaneng, u mo tlame ka mahlaahlela maotong le molaleng. 27Joale ke ka baka la'ng u sa kang ua khalemela Jeremia oa Anatote ea ikentseng moporofeta oa lōna? 28O rōmetse molaetsa ho rōna, Babilona, a re: Le tla nka nako e telele le ntse le thōpiloe. Ikhaheleng matlo, le itulele ho 'ona; itemeleng lirapa, le itjelle tse melang ho tsona.’ ”
29Moprista Sofonea a bala lengolo lena moo moporofeta Jeremia a ntseng a utloa. 30Joale lentsoe la Morena la fihla ho Jeremia, la re: 31“Rōmela molaetsa ho bathōpuoa bohle, u re: ‘Malebana le Shemaea ea tsoang Nehelame, Morena o bua tjena: Kaha Shemaea a le porofetetse, empa ke ne ke sa mo rōma, 'me a etsa hore le tšepe leshano, 32ka baka leo, Morena o re: Bonang, ke tla otla Shemaea ea tsoang Nehelame le litlōhōlō tsa hae. Ha ho le ea mong oa bana ba hae ea tla sala; le eena Shemaea ha a ka ke a bona tse molemo, tseo ke tla li etsetsa sechaba sa ka, hobane o rutile sechaba sa ka ho mphetohela,’ ” ho rialo Morena.
