Selekane se senyehile
1Lentsoe la Morena la fihla ho Jeremia, la re:
2“Mamela mantsoe a selekane sena, 'me u a bolelle sechaba sa Juda, le baahi ba Jerusalema. 3Ba bolelle hore Morena Molimo oa Iseraele o bua tjena: ‘Motho ea sa mameleng mantsoe a selekane sena a rōhakehe; 4e leng mantsoe ao ke neng ke a boelle bo-ntat'a lōna moholo, ha ke ne ke ba ntša Egepeta, seboping sa mollo se entsoeng ka tšepe.’ Ka na ka re: Mameleng, le phethe tsohle tseo ke le laetseng tsona, 'me le tla ba sechaba sa ka, 'na ke be Molimo oa lōna. 5Ke tla phetha kano eo ke neng ke e etsetse bo-ntat'a lōna, ea hore ke tla ba nea naha e phallang lebese le mahe a linotši, e leng naha ena eo e leng ea lōna kajeno.”
'Na ka araba, ka re: “A ho be joalo, Morena!”
6Eaba Morena o re ho 'na: “Phatlalatsa mantsoe ana 'ohle metseng ea Juda le literateng tsa Jerusalema, u re: ‘Mamelang mantsoe a selekane sena, le phethe seo a se bolelang. 7Ho tloha mohla ke neng ke ntša bo-ntat'a lōna naheng ea Egepeta, ho fihlela kajeno, haesale ke ba eletsa, ke re: “Ikokobeletseng 'na!” 8Ha baa ka ba mamela, leha e le ho sekèha tsèbè, empa motho ka mong o ile a latela litakatso tsa pelo ea hae e mpe, e manganga. Ka baka leo, ke ba otla ho ea ka lipallo tsa selekane sena seo ba neng ba itlame ka sona, empa seo ba sa kang ba se boloka.’ ”
9Eaba Morena o re ho 'na: “Har'a banna ba Juda le baahi ba Jerusalema ho na le mahlabaphieo. 10Ba khutletse libeng tsa bo-ntat'a bona moholo, ba neng ba hane ho mamela lipolelo tsa ka. Ba latetse melimo esele, ba e sebeletsa. Ba ntlo ea Iseraele le ba ntlo ea Juda ba sentse selekane seo ke neng ke se etse le bo-ntat'a bona.” 11Ka baka lena, Morena o bua tjena: “Ke tla ba lihela koluoa eo ba ke keng ba e phema. Leha ba ka ipiletsa ho 'na ha nka ke ka ba mamela. 12Ba metse ea Juda le baahi ba Jerusalema ba tla ea ba ipiletse ho melimo ea bona, eo ba e chesetsang mekubetso, empa melimo eo e ke ke ea ba pholosa ho hang, ha koluoa e ba oela holimo. 13Palo ea melimo ea lōna baahi ba Juda, e kaalo ka palo ea metse ea lōna; le palo ea lialetare tseo le li hahetseng ntho e hlabisang lihlong ena, e kaalo ka palo ea literata tsa Jerusalema, e leng lialetare tseo ho tsona le chesetsang Baale mokubetso.
14“Ka baka lena, u se ke ua rapella sechaba sena, kapa ua se etsetsa thapeli, hobane ha ke na ho mamela ha se ipiletsa ho 'na nakong ea litsietsi tsa sona.
15“Moratuoa o etsa'ng
ka Tempeleng ea ka,
ha e le moo
a rera merero ea bolotsana?
Ebe nama tsa mahlabelo
li ka u phemisa kotlo ea hao?
Ha u etsa bokhopo
eba joale ua thaba!”
16Morena o ile a u rea lebitso,
a re u fate sa mohloaare
se setalana, se khahlehang,
se behang tholoana li le monate.
Empa ka molumo,
molumo o thoathoaretsang,
o il'a hotetsa mollo holim'a sona,
makala a sona a e-cha, a re lore!
17Morena oa mabōtho, eena ea ileng a u etsa, o se a u lokiselitse koluoa, hobane ba ntlo ea Iseraele le ba ntlo ea Juda ba entse bobe ka ho chesetsa Baale mokubetso, 'me ba mphephetsa hore ke halefe.
Morero oa ho bolaea Jeremia
18Morena o ile a mpolella, 'me ka tseba, a ntšenolela merero ea bona. 19Empa ke ne ke tšoana le konyana e isoang moo e tla hlabeloa teng. Ke ne ke sa tsebe hore ba ntherile, ba re:
“A re timetseng sefate
le tholoana tsa sona;
a re mo tloseng lefatšeng,
fatšeng la ba phelang,
hore bitso la hae
le se hlole le sa hopoloa.”
20Empa uena Moren'a mabōtho,
uena ea ahlōlang ka toka,
uena ea lekolang pelo le kelello,
a nke ke bone phetetso ea hao
holim'a bona,
'na ke beile nyeoe ea ka
kapele ho uena.
21Ka baka lena, Morena o bua ka banna ba Anatote ba batlang ho u bolaea, ba reng: “U se ke ua porofeta ka lebitso la Morena, re tle re se ke ra u bolaea.” 22Kahoo Morena oa mabōtho o bua tjena: “Ke tla ba otla. Bahlankana ba bona ba tla bolaoa ka sabole, bara le barali ba bona ba bolaoe ke sekoboto. 23Ha ho na ho ba le masalla a bona, hobane ke tla lihela banna ba Anatote koluoa ka selemo seo ke tla ba otla ka sona.”
