JEREMIA 10

“Se ithuteng mekhoa ea balichaba,

se tšosoeng ke lipontšo,

pontšo tsa leholimo,

le hoja balichaba

ba tšosoa ke tsona.

₃Meetlo ea balichaba ke ea lefeela,

balichaba ba rema sefate morung,

ebe sebetli ka selepe sea se betla.

₄Ba se khabisa ka silefera

le ka khauta,

ba se khokhothele ka noto

le ka lipekere,

hore se se ke sa sisinyeha.

₅Melingoana ena e ka setšosa,

e ka setšosa se hlonngoe

tšimong ea mahapu,

empa ha e le ho bua hona

ha e ho tsebe;

eka khona ba e jare,

hobane ha e tsebe ho tsamaea.

Lōna le se e tšabe,

e ke ke ea le ntša kotsi,

ho etsa molemo le hona

ha e ho tsebe.”

₆Ha ho ea tšoanang le uena Morena,

uena u moholo,

bitso la hao le leholo, le matla.

₇Ke mang ea ke keng a u tšaba,

uena Khosi ea lichaba?

E hlile ho tšajoa,

uena hoa u lokela.

Har'a banna bohle

ba bahlalefi lichabeng,

banna ba bahlalefi

ba mebusong ea bona,

ha ho le ea mong

ea tšoanang le uena.

₈Bohle ba hloka kelello,

ba thotofetse,

thuto tsa melimo ea lehong

ke tsa lefeela.

₉Silefera e bateletsoeng

e tsoa Tarashishe,

khauta eona

ke e tsoang koana Ufase,

ke mosebetsi oa setei,

o entsoeng ke lelala;

melingoana e apesoa tse putsoa

le tse perese:

Tsohle li entsoe

ke litsebi tsa mesebetsi.

₁₀Empa Morena

ke Molimo oa 'nete,

ke Molimo ea phelang,

Khosi ea kamehla eohle.

Ha a halefile

fatše lohle lea reketla,

chaba li sitoa

ho mamella khalefo ea hae.

₁₂Ka matla a hae

Molimo o entse lefatše,

ka bohlale ba hae

a le tsitsisa tulong tsa lona,

ka kelello ea hae a ala le maholimo.

₁₃Ha a thoathoaretsa

metsi a leholimo aa hoasa,

o nyolla maru pheletsong tsa lefatše,

ha pula e e-na o tsekemisa lehalima,

a bulele lifefo,

li tsoe moo li koaletsoeng.

₁₄Batho bohle ha ba na tsebo,

ba thotofetse,

malala a khauta

a hlabisoa lihlong,

a hlabisoa lihlong

ke melingoana ea 'ona.

Melingoana ena ea 'ona

ke ea leshano,

melingoana ena ea 'ona

ha e phefumolohe.

₁₅Ke mafeela-feelane,

ke ntho tsa ho nyelisoa,

ha tsatsi la kahlōlo ea eona le fihla

e tla timela!

₁₆Molimo oa Jakobo eena

ha a tšoane le eona,

hobane ke eena 'Mōpi oa tsohle;

o khethile Iseraele

hore e be chaba sa hae,

Morena oa mabōtho

ke lona lebitso la hae.

₁₇Lōna ba thibeletsoeng

tlamang thōtō ea lōna,

le e tlame,

le be le tsoe kahar'a naha ena.

₁₈Morena o bua tjena:

“Ke tla tjekeletsa

baahi ba naha ena, kantle ho eona,

ke ba sotle,

ke ba bakele mahlomola!”

₁₉Ke malimabe

hobane ke tsoile kotsi!

Leqeba la ka ha le ka ke la fola!

Empa ka pelong ka ikhothatsa,

ka re: “Ena ke tsietsi ea ka,

ke tlameha ho e mamella.”

₂₀Tente ea ka e senyehile,

khoèlè tsa eona tsohle

li khaohile;

bana ba ka bohle ba ntšiile,

ha ho ea setseng

ho hloma tente ea ka,

kapa hona ho phutholla

masira a eona.

₂₁Balisa ba hloka kelello,

thuso ea Morena ha ba e batle,

kahoo ba ke ke ba fumana katleho,

mehlape ea bona eohle e qhalakane.

₂₂Mamela! Molaetsa ke ona oa tla!

Morusu o moholo

o hlaha naheng e ka lebōea!

Metse ea Juda

e tla fetoloa nanaola,

e fetohe lilao tsa liphokojoe.

₂₃Morena, sena kea se tseba,

motho ha a ikhethele tsela ea hae,

hase eena ea laolang mehato ea hae.

₂₄Oho, Morena,

ak'u nkhalemele ka toka,

u se ke ua nkhalemela u halefile,

esere ua mphetola lefeela-feelane.

₂₅Halefela chaba tsena

tse sa u tsebeng,

u halefele batho

ba sa ipiletseng ho uena.

Chaba tsena li metsitse Jakobo,

tsa mo metsa bokoilitane,

tsa mo timetsa,

metse ea hae tsa e fetola nanaola.