1Tsena ke lipolelo tsa Jeremia, mora oa Hilekiea, e mong oa baprista ba motse oa Anatote, o naheng ea Benjamine: 2Lentsoe la Morena le ne le mo fihlele mehleng ea Josiea, mora oa Amona, khosi ea Juda, ka selemo sa leshome le metso e meraro sa puso ea hae; 3la mo fihlela hape mehleng ea puso ea Jehoeakime, mora oa Josiea, khosi ea Juda; la 'na la mo fihlela joalo ho isa selemong sa leshome le motso o mong sa puso ea Sedekiea, mora oa Josiea, khosi ea Juda, 'me ka khoeli ea bohlano ea sona selemo seo, baahi ba Jerusalema ba thōpuoa.
Pitso ea Jeremia
4Eaba lentsoe la Morena lea mphihlela, le re:
5“Ke u tsebile ke e-s'o u bōpe
ka pōpelong ea 'm'ao,
ka ba ka u hlalaletsa u e-s'o tsoaloe,
ka u khethela
ho ba moporofeta oa lichaba.”
6Eaba 'na ke re: “Oho, Morena Molimo, 'na ha ke tsebe ho bua, hobane ke sa le ngoana.”
7Empa Morena a re ho 'na: “Se ke ua re: ‘Ke sa le ngoana,’ hobane u tla ea ho bohle bao ke tla u rōma ho bona, u ba bolelle tsohle tseo ke tla u laela tsona. 8U se ke ua ba tšaba, hobane ke na le uena, 'me ke tla u pholosa,” ha rialo Morena.
9Eaba Morena o otlolla letsoho la hae, o ama molomo oa ka ka lona, o re: “Bona, ke kentse mantsoe a ka ka molomong oa hao. 10Kajeno lena ke u nea matla holim'a lichaba le holim'a mebuso, hore u motsule u be u heletse, u timetse u be u phethole, u hahe u be u hlome.”
Lipono tse peli
11Lentsoe la Morena la boela la mphihlela, la re: “Jeremia, u bona'ng?”
'Na ka araba, ka re: “Ke bona lekala la sefate se kang sa perekisi.”
12Eaba Morena o re ho 'na: “U bona hantle, hobane ke falimehetse hore lentsoe la ka le phethahatsoe.”
13Lentsoe la Morena la boela la mphihlela khetlo la bobeli, la re: “U bona'ng?”
'Na ka re: “Ke bona pitsa e belang, eo molomo oa eona o furaletseng lebōea.”
14Morena a re ho 'na:
“Koluoa e tla hlaha e e-tsoa lebōea,
baahi bohle ba naha ena
e ba oele holimo.
15Ke khatheng la ho mema lichaba,
chaba tsohle tsa mebuso,
mebuso e ka lebōea,”
ho rialo Morena.
“Khosi tsa bona
li tla emisa terone tsa tsona,
li li emise
kapel'a likhoro tsa Jerusalema;
li tla li emisa
ho pota-pota marako,
li li emise
metseng eohle ea Juda.
16Chaba seo sa ka ke tla se ahlōla,
ke se ahlōlele bokhopo
ba ho mphuralla,
ba ho etsa mahlabelo,
ho a etsetsa melimo esele,
ho khumamela melimo
e entsoeng ka matsoho a sona.
17“Ka baka leo, uena itlame letheka,
u eme, u bue le chaba seo,
u se bolelle tsohle
tseo ke u laelang tsona.
U se ke ua tšaba ha u se bona,
esere ka u tšosa u le kapel'a sona.
18Bona,
kajeno ke u etsa qhobosheane,
tšiea ea tšepe
le lerako la lethose,
hore u eme senna
kapel'a naha eohle,
kapel'a likhosi le khosana tsa Juda,
kapel'a baprista le baahi ba Juda.
19Ba tla u tsohela matla,
ba u loantše,
empa ho u hlōla
ba ke ke be ba u hlōla,
hobane ke na le uena
ho u namolela,”
ho rialo Morena.
