Lichaba tse ileng tsa sala naheng ea Kanana
1Tsena ke lichaba tseo Morena a ileng a li tlohela tsa sala hore a leke Baiseraele ka tsona, e leng ba bangata ba sa kang ba tseba lintoa tsohle tsa Kanana. 2E ne e le hore melōko ea bana ba Iseraele e ithute ntoa, haholo-holo melōko e neng e sa ka ea tseba ntoa. 3Lichaba tseo ke tsa marena a mahlano a Bafilesita, le Bakanana bohle, le Basidone, le Bahife, e leng baahi ba thaba ea Lebanone, ho tloha Baale-Heremone, ho ea fihla lekhalong la Hamate. 4Ba ile ba siuoa hore ho lekoe Baiseraele ka bona, ho tsejoe hore na ba tla mamela melao ea Morena, eo a e laetseng bontat'a bona ka Moshe.
5Bana ba Iseraele ba aha har'a Bakanana, le Bahete, le Baamore, le Baperise, le Bahife, le Bajebuse. 6Ba nyallana le lichaba tseo, 'me ba sebeletsa melimo ea tsona.
Oteniele
7Bana ba Iseraele ba siteloa Morena, ba lebala Morena Molimo oa bona, ba sebeletsa bo-Baale le litšoantšo tsa Ashera. 8Bohale ba Morena ba tlōkōmela Baiseraele, 'me a neelana ka bona matsohong a Kushane-Rashataime, khosi ea Arame-Naharaime, 'me bana ba Iseraele ba sebeletsa Kushane-Rashataime ka lilemo tse robeli. 9Ha bana ba Iseraele ba ipiletsa ho Morena, Morena a ba hlahisetsa mopholosi ea ileng a ba namolela. Ke Oteniele, mora oa Kenase, moena oa Kalebe. 10Moea oa Morena oa theohela holim'a hae, ea e-ba moahlōli oa Baiseraele. A futuha, 'me Morena a neelana ka Kushane-Rashataime, khosi ea Arame, matsohong a hae. Oteniele a hlōla Kushane-Rashataime. 11Naha ea e-ba le khotso ka lilemo tse mashome a mane. Eaba Oteniele, mora oa Kenase, oa shoa.
Ehude
12Bana ba Iseraele ba boela ba siteloa Morena. Morena a matlafatsa Egelone, khosi ea Moabe, hore a hlōle Baiseraele, hobane ba ne ba sitetsoe Morena. 13Egelone a kopanya mabotho a hae le a Baamone le a Baamaleke, eaba oa futuha, o hlōla Baiseraele, o hapa motse oa Jeriko. 14Bana ba Iseraele ba sebeletsa Egelone, khosi ea Moabe, ka lilemo tse leshome le metso e robeli.
15Empa ha bana ba Iseraele ba ipiletsa ho Morena, Morena a ba hlahisetsa mopholosi. Ke Ehude, mora oa Gera oa Mobenjamine, monna ea leqèlè. Bana ba Iseraele ba mo rōma ho isetsa Egelone, khosi ea Moabe, nyehelo. 16Ehude o ne a iketselitse sabole e hlathang ka mahohle, bolelele ba eona e le lisenthimethara tse mashome a mahlano. O ne a e tlama tlas'a seaparo sa hae, holim'a qhōlō ea letsoho la hae le letona. 17Eaba o nea Egelone, khosi ea Moabe, nyehelo eo. Egelone e ne e le pesolahali ea monna. 18Ha Ehude a se a neelane ka nyehelo, a re ho batho ba neng ba nkile nyehelo eo, ba tsamaee. 19Empa eena a khutla ha a le pel'a melimo e betliloeng ka majoe, e pel'a Gilegale; a fihla, a re: “Motlotlehi khosi, ke u tliselitse thōmo ea lekunutu.”
Khosi ea re: “Khutsang!” Bohle ba neng ba eme pel'a khosi ba tsoela kantle.
20Ehude a tla ho khosi, e lutse kamoreng e mapholi, e kaholimo, eo e neng e le ea eona e inotši. Ehude a re: “Ke na le molaetsa oa hao, o tsoang ho Molimo.” Egelone a phahama setulong. 21Ehude a ntša letsoho la leqèlè, a hula sabole e qhōlōng ea letsoho la hae le letona, a mo phehlèla ka eona mpeng. 22Mofeng oa kena le sabole, eaba mafura a koahela sabole, hobane ha aa ka a hula sabole ka mpeng, ea phunyeletsa, ea ea hlaha kamorao. 23Joale Ehude a tsoela lethuleng, a koalla khosi ka kamoreng e kaholimo, a ba a notlela mamati.
24Ha a se a tsoile, bahlanka ba khosi ba tla. Ba bona hore mamati a kamore e kaholimo a notletsoe, 'me ba re: “O sa ntsane a ithōma ka ntloaneng ea kamore e mapholi.” 25Ba lebella ho fihlela ba be ba belaela. Ha ba bona a sa bule mamati a kamore e kaholimo, ba nka senotlolo ba notlolla. Ba bona khosi ea bona e tjapaletse fatše, e shoele.
26Ka nako eo ba neng ba ntse ba lebeletse, Ehude eena a ipha limenyane, a ba a fetela ka nq'ane ho melimo e betliloeng ka majoe, a tšabela Seira. 27Ha a fihla naheng e maralla ea Efraime a letsa lenaka. Bana ba Iseraele ba tloha naheng e maralla, ba theoha, eena a ba eteletse pele.
28Eaba o re ho bona: “Ntateleng, hobane Morena o neelane ka lira tsa lōna, e leng Bamoabe, matsohong a lōna.” Ba theoha ba mo latetse, ba hapa maliboho a Jorodane ao Bamoabe ba tšelang ho 'ona, 'me ba se ke ba lumella le ea mong ho tšela. 29Ka eona nako eo ba bolaea banna ba Moabe ba ka bang kete tse leshome, bohle e le banna ba likoankoetla, le banna ba bahlabani, 'me ha se ke ha phonyoha le ea mong. 30Ka lona letsatsi leo, Bamoabe ba hlōloa, ba ba katlas'a Baiseraele. Naha ea e-ba le khotso ka lilemo tse mashome a robeli.
Shamegare
31Kamora' Ehude moahlōli ea Shamegare, mora oa Anate, ea neng a bolaee Bafilesita ba makholo o tšeletseng ka tsenene e potlakisang lipholo, 'me le eena a namolela Baiseraele.
