Baiseraele ba itokisetsa ntoa
1Bana bohle ba Iseraele, ho tloha Dane ho ea fihla Beeresheba, le naheng ea Gileade, ba tsamaea. Sechaba sa phuthehela Misepa ho Morena, sa iketsa khokanyan'a phiri. 2Baetapele bohle ba sechaba le ba merabe eohle ea Iseraele ba ba teng phuthehong ea sechaba sa Molimo; e le banna ba litaaso ba likete tse makholo a mane, ba hlometseng ka lisabole. 3Joale ba morabe oa Benjamine ba utloela hore bana ba Iseraele ba nyolohetse Misepa. Bana ba Iseraele ba re: “Re bolelleng hore na bokhopo bona bo etsahetse joang?”
4Eaba Molevi eo e leng monna oa mosali ea ileng a bolaoa, oa araba, o re: “Ke ile ka fihla Gibea, naheng ea morabe oa Benjamine, ke e-na le mosali oa ka oa lefielo, hore re robaletse teng. 5Banna ba Gibea ba ntsohela matla, bosiu ba etsetsa ntlo eo ke robetseng ka ho eona sakana-la nkōpe. Ba ne ba rerile ho mpolaea, empa ba beta mosali oa ka oa lefielo, 'me a shoa. 6Ka nka setōpō sa mosali eo oa ka oa lefielo, ka se khaola likotoana, ka li rōmela naheng eohle eo Baiseraele ba e jeleng lefa, hobane Bagibea bao ba entse bohlola le manyala naheng ea Iseraele. 7Bonang, lōna bana ba Iseraele, le mona bohle; rerisanang, le eletsane hona mona.”
8Sechaba sohle sa ba ntsoeleng, sa re: “Ha ho le ea mong oa rōna ea tla ea lapeng la hae, 'me ha ho le ea mong oa rōna ea tla khutlela ha hae. 9Seo re tla se etsa Gibea ke sena: Ba tla e futuhela ba tla ntšoa ka lōtho. 10Merabeng eohle ea Iseraele re tla nka banna ba leshome ho ba lekholo, ba lekholo ho ba sekete, le ba sekete ho ba likete tse leshome, ho ea batlela bahlabani lijo, e le hore ha ba fihla Gibea e naheng ea Benjamine, ba tle ba pheteletse manyala 'ohle ao banna ba Gibea ba a entseng naheng ea Iseraele.” 11Kahoo banna bohle ba Iseraele ba futuhela motse oo ba ikentse khokanyan'a phiri.
12Merabe ea bana ba Iseraele ea rōmela banna morabeng oohle oa Benjamine, ea re: “Ke bokhopo bofe boo, bo etsahetseng har'a lōna? 13Ka baka leo, re neeng banna bao ba litšila, ba Gibea, re tle re ba bolaee, 'me re felise bokhopo bona naheng ea Iseraele.”
Empa ba morabe oa Benjamine ba se ke ba natsa polelo ea bana babo bona, e leng bana ba Iseraele. 14Ba morabe oa Benjamine ba tsoa metseng ea bona, ba phuthehela Gibea, ho ea loantša bana ba Iseraele. 15Ka tsatsi leo, palo ea ba morabe oa Benjamine, ba neng ba hlometse ka lisabole, e ne e le banna ba likete tse mashome a mabeli a metso e tšeletseng, ntle ho banna ba motse oa Gibea, ba khethiloeng. 16Banna bana bohle, ba khethiloeng, ba makholo a supileng, e ne e le ba maqele. E mong le e mong oa bona o ne a ka betsa qōba ea moriri ka letjeketjane, 'me a se ke a e fosa.
17Ntle ho ba morabe oa Benjamine, banna ba Baiseraele, ba neng ba hlometse ka lisabole, e ne e le likete tse makholo a mane. Banna bana bohle e ne e le bahlabani.
Morabe oa Benjamine oa futuheloa
18Sechaba sa Iseraele sa nyolohela Bethele, ho fumana keletso ea Molimo, 'me sa re: “Ke bafe ho rōna ba tla futuhela bana ba Benjamine pele?”
Morena a re: “Ho tla futuha Juda pele.”
19Bana ba Iseraele ba tsoha e sa le hoseng, ba fihla ba hloma pel'a Gibea. 20Banna ba Iseraele ba futuhela ba morabe oa Benjamine. Banna ba Iseraele ba theela ba morabe oa Benjamine thekō ea ntoa Gibea. 21Ba morabe oa Benjamine ba tsoa motseng oa Gibea. Ka lona letsatsi leo ba bolaea banna ba likete tse mashome a mabeli a metso e 'meli tsa bana ba Iseraele. 22Empa banna ba Iseraele ba tsoha molōta, ba boela ba thea thekō ea ntoa moo ba neng ba e theile teng ka letsatsi la pele. 23Bana ba Iseraele ba nyoloha, ba lla ba le kapele ho Morena, ho fihlela ka phirimana. Ba botsa Morena, ba re: “Na re ka boela ra futuhela bana babo rōna, ba morabe oa Benjamine?”
Morena a re: “Nyolohang le ba futuhele.”
24Ka letsatsi la bobeli bana ba Iseraele ba boela ba futuhela ba morabe oa Benjamine. 25Ka lona letsatsi leo la bobeli, ba morabe oa Benjamine ba tsoa Gibea, ba boela ba bolaea banna ba Iseraele ba likete tse leshome le metso a robeli. Banna bana bohle e ne e le ba hlometseng ka lisabole.
26Joale bana bohle ba Iseraele, le sechaba sohle, ba nyolohela Bethele. Ba lla, 'me ba lula kapele ho Morena. Ka letsatsi leo ba itima lijo ho fihlela ka phirimana. Ba nyehella Morena ka linyehelo tsa secheso le ka linyehelo tsa teboho. 27Eaba bana ba Iseraele ba botsa Morena, hobane areka ea selekane sa Molimo e ne e sa le teng mehleng eo. 28Ka matsatsi 'ona ao, Finease, mora oa Eleasare, mora oa Arone, e ne e le eena ea sebeletsang kapele ho eona. Joale a re: “Na re ka boela ra futuhela bana babo rōna, ba morabe oa Benjamine, kapa re khaotse?”
Morena a re: “Nyolohang, hobane hosasane ke tla neelana ka bona matsohong a lōna.”
29Baiseraele ba lalla motse oa Gibea ba o pota-potile. 30Ka letsatsi la boraro Baiseraele ba nyoloha, ba futuhela ba morabe oa Benjamine. Ba itokisetsa ho futuhela Gibea joaloka makhetlong a mang a pele. 31Ba morabe oa Benjamine ba tsoa ho futuhela sechaba sa bana ba Iseraele. Ba ba hulela thōkoana le motse, ba qala ho bolaea sechaba, ba se etsa mofela, joaloka makhetlong a pele. Ba ba bolaela mebileng e meholo e eang Bethele, le 'mileng o eang Gibea, le har'a masimo, e batlile e e-ba banna ba mashome a mararo ba Baiseraele. 32Ba morabe oa Benjamine ba re: “Re ba hlōtse joaloka lekhetlo la pele.”
Empa bana ba Iseraele ba re: “A re baleheng, re ba hulele thōkoana le motse, ho ea mebileng e meholo.”
33Banna bohle ba Iseraele ba phahama moo ba neng ba le teng, ba thea thekō ea ntoa, ba le Baale-Tamare. Banna ba Iseraele ba neng ba laletse ba tsoa moo ba neng ba le teng, ka bophirimela ho Geba. 34Joale bahlabani ba mokhetho oa Iseraele, ba likete tse leshome, ba futuhela Gibea, ntoa ea e-ba e mahlo-mafubelu. Empa ba morabe oa Benjamine ba ne ba sa tsebe hore koluoa e haufi ho ba oela holimo. 35Morena a etsa hore Baiseraele ba hlōle ba morabe oa Benjamine. Ka lona letsatsi leo Baiseraele ba bolaea banna ba morabe oa Benjamine ba likete tse mashome a mabeli a metso e mehlano le lekholo. Banna bana bohle e ne e le ba hlometseng ka lisabole.
36Ba morabe oa Benjamine ba bona hore ba hlōtsoe. Banna ba Iseraele ba checha kapele ho ba morabe oa Benjamine, hobane ba ne ba tšepile banna ba neng ba laletse ho pota-pota Gibea. 37Ba laletseng ba potlakela ho futuhela Gibea. Bao ba laletseng ba rōpōha, ba bolaea bohle ba motseng oo ka sabole. 38Ho ne ho e-na le tumellano ea pontšo pakeng tsa banna ba Iseraele le ba neng ba laletse, ea hore ha mosi o fōqōha motseng, 39banna ba Iseraele ba boee sekoele.
Ba morabe oa Benjamine ba bolaea banna ba Iseraele ba mashome a mararo, hobane ba ne ba re: “Ruri re ba hlōtse joaloka ntoeng ea pele.”
40Mosi oa fōqōha motseng o entse leru le lopaletseng. Ha ba morabe oa Benjamine ba hetla, ba bona motseng ho fōqōha mosi o lebang holimo. 41Joale banna ba Iseraele ba boea sekole, ba morabe oa Benjamine ba khathala matla, hobane ba ile ba bona hore koluoa e ba oetse holimo. 42Ba morabe oa Benjamine ba baleha banna ba Baiseraele, ba nka tsela e lebang lehoatateng, empa lira tsa ba bea merebele, 'me ba neng ba e-tsoa motseng ba kena har'a bona, ba ba fekefa. 43Ba etsetsa ba morabe oa Benjamine sakana-la-nkōpe ba ntse ba ba phalalisa. Ba ba etsa mofela ho ea fihla ka bochabela ho Gibea. 44Ho bolaoa banna ba morabe oa Benjamine ba likete tse leshome le metso e robeli. Banna bana bohle e ne e le bahale. 45Ba morabe oa Benjamine ba balehela nq'a lehoatateng, ho ea fihla lefikeng la Rimone. Ba likete tse hlano Baiseraele ba ba bolaela 'mileng o moholo. Ba ba bea merebele ho ea fihla Gidome, 'me ho bao ba boela ba bolaea ba likete tse peli.
46Ka letsatsi leo ba bolaea ba morabe oa Benjamine ba likete tse mashome a mabeli a metso e mehlano, ba hlometseng ka lisabole. Banna bana bohle e ne le bahale.
47Eaba banna ba makholo a tšeletseng ba ileng ba phekhoha, ba balehela nq'a lehoatateng, lefikeng la Rimone, ba lula teng ka likhoeli tse 'ne. 48Baiseraele ba boela ba khutlela ho ba morabe oa Benjamine, ba ba bolaea ka sabole, ba bolaea le bohle ba motseng, le liphoofolo, le tsohle tseo ba ileng ba li fumana. Metse eohle eo ba ileng ba fihla ho eona ba e chesa ka mollo.
