Ho haptjoa ha Adoni-Beseke
1Hoba Joshua a shoe, bana ba Iseraele ba botsa Morena, ba re: “Ke mang ho rōna ea tla futuhela Bakanana pele, a ba loantše?”
2Morena a re: “Ke ba morabe oa Juda ba tla futuha pele. Bonang, ke neelane ka naha ena matsohong a bona.”
3Ba morabe oa Juda ba re ho bana babo bona, e leng ba morabe oa Simeone: “Nyolohelang le rōna naheng eo re e abetsoeng, re tle re loantšeng Bakanana, 'me le rōna re tla ea le lōna naheng eo le e abetsoeng.” Ba morabe oa Simeone ba tsamaea le bona.
4Ba morabe oa Juda ba nyoloha, 'me Morena a neelana ka Bakanana le Baperise matsohong a bona. Ba bolaea banna ba bona ba likete tse leshome motseng oa Beseke. 5Ba fumana Adoni-Beseke a le Beseke, ba mo loantša, ba hlōla Bakanana le Baperise. 6Empa Adoni-Beseke a baleha. Ba mo phalalisa, ba mo tšoara, ba mo khaola menoana e metona ea matsoho le ea maoto.
7Eaba Adoni-Beseke o re: “Likhosi tse mashome a supileng, tseo ke neng ke li khaole menoana e metona ea matsoho le ea maoto, li ne li ee li thonake makumane tlas'a tafole ea ka. Joalokaha le 'na ke ile ka etsa, Molimo o nketsa joalo.” Ba mo isa Jerusalema, 'me a shoela hona teng.
Ba morabe oa Juda ba hlōla Jerusalema le Heborone
8Bana ba Juda ba futuhela Jerusalema, ba e hapa, ba bolaea baahi ba eona ka sabole, ba chesa motse ka mollo.
9Kamora' moo, bana ba Juda ba theoha ho ea loantša Bakanana, e leng baahi ba naha e maralla, le ea Negebe, le e liphuleng. 10Joale ba morabe oa Juda ba futuhela Bakanana ba neng ba ahile Heborone. Pele ho mona, lebitso la Heborone e ne e le Motse oa Areba. Ba hlōla Shesai, le Ahimane, le Talamai.
Oteniele o hapa motse oa Debiri
11Ho tloha moo ba futuhela baahi ba Debiri. Pele ho mona lebitso la Debiri e ne e le Kiriate-Sefere. 12Eaba Kalebe o re: “Ea ka futuhelang Kiriate-Sefere, a e hapa, ke tla mo nea morali oa ka Akasa, hore e be mosali oa hae.” 13Joale Oteniele, mora oa Kenase, moen'a Kalebe, a e hapa, 'me Kalebe a mo nea morali oa hae Akasa, hore e be mosali oa hae. 14Eare ha Akasa a fihla ho Oteniele, a mo pheella hore a kōpe mohoe oa hae, a ke a mo qōthele naha. Ha Akasa a thōlōha tonki ea hae, Kalebe a re ho eena: “U batla'ng?”
15Akasa a re ho eena: “Ak'u mphe mpho e 'ngoe hape. Erekaha u 'neile naha ea Negebe, ak'u 'nee le liliba.” Kalebe a mo nea liliba tse holimo le liliba tse tlase.
Morabe oa Juda le oa Benjamine o hapa naha
16Bana ba mohoe oa Moshe, eo e leng Mokene, ba nyoloha le banna ba Juda ho tloha motseng oa lipalema, ho ea lefeelleng la Juda le ka boroa ho Arada. Ba ea, ba aha le sechaba seo.
17Ba morabe oa Juda ba tsamaea le bana babo bona, e leng ba morabe oa Simeone, ba hlōla Bakanana, e leng baahi ba Sefate, ba ba timetsa ho hang. Motse oo ba o rea lebitso la Horema. 18Ba morabe oa Juda ba hapa le motse oa Gasa 'moho le naha ea oona, le motse oa Ashekelone 'moho le naha ea oona, le motse oa Ekerone 'moho le naha ea oona.
19Morena a 'na a ba le ba morabe oa Juda, ba leleka baahi ba naha e maralla, empa ba se ke ba leleka baahi ba ka khohlong, hobane ba ne ba e-na le likariki tsa ntoa tse entsoeng ka tšepe. 20Ba nea Kalebe motse oa Heborone, joalokaha Moshe a ne a buile, 'me eena a leleka bara ba bararo ba Anake.
21Bana ba Benjamine ba se ke ba leleka Bajebuse bao e neng e le baahi ba Jerusalema, empa Bajebuse ba aha har'a bana ba Benjamine ho fihlela kajeno-ea-bokajeno.
Ba ntlo ea Josefa ba hapa motse oa Bethele
22Ba ntlo ea Josefa le bona ba futuhela motse oa Bethele, 'me Morena a 'na a ba le bona. 23Ba ntlo ea Josefa ba rōmela lihloela ho ea hloela motse oa Bethele. Pele lebitso la motse ona e ne e le Lōse. 24Lihloela tsa bona monna a e-tsoa motseng, 'me tsa re ho eena: “Ak'u re bontše tsela e kenang ka motseng, re tla u hauhela.” 25Monna eo a li bontša tsela e kenang ka motseng, tsa kena, tsa bolaea baahi ba motse oo ka sabole, empa ha e le monna eo le ba lelapa la hae tsa mo tlohela a ikela. 26Monna eo a ea naheng ea Bahete, a haha motse, a o bitsa Lōse, 'me leo ke lebitso la oona ho fihlela kajeno-ea-bokajeno.
Morabe oa Manase le oa Efraime o hapa naha
27Ba morabe oa Manase ba se ke ba leleka baahi ba Bete-Sheane le ba metsana ea eona, le ba Taanake le ba metsana ea eona, le ba Dore le ba metsana ea eona, le ba Jibeleame le ba metsana ea eona, le ba Megido le ba metsana ea eona. Bakanana ba tsitlella ho aha naheng eo. 28Empa eare ha Baiseraele ba se ba matlafetse, ba fetola Bakanana makhoba, feela ba se ke ba ba leleka ho hang. 29Ba morabe oa Efraime le bona ba se ke ba leleka Bakanana ba neng ba ahile Gesere, 'me Bakanana bao ba 'na ba aha har'a bona, Gesere.
Linaha tsa merabe e meng tse hapiloeng
30Ba morabe oa Sebulone ba se ke ba leleka baahi ba Kiterone, le baahi ba Nahalole. Bakanana ba aha har'a bona, 'me ea e-ba makhoba. 31Ba morabe oa Ashere le bona ba se ke ba leleka baahi ba Ako, le baahi ba Sidone, le ba Ahalaba, le ba Akasibe, le ba Heleba, le ba Afike, le ba Rehobe. 32Baashere ba aha har'a Bakanana, e leng baahi ba naha, hobane ha baa ka ba ba leleka. 33Ba morabe oa Nafthali le bona ba se ke ba leleka baahi ba Bete-Shemeshe le baahi ba Bete-Anate; ba aha har'a Bakanana, e leng baahi ba naha. Baahi ba Bete-Shemeshe le baahi ba Bete-Anate ea e-ba makhoba a bona. 34Baamore ba sutuletsa bana ba Dane naheng e maralla, ba ba hanela ho theohela khohlong. 35Baamore ba tsitlella ho aha thabeng ea Herese, le Aiealone, le Shaalebime, empa ba ntlo ea Josefa ba ba hlōla, 'me ea e-ba makhoba a bona.
36Moeli oa Baamore o ne o tloha moepeng oa Akarabime, o tloha Sela, o nyolosa.
