Temoso ho barui
1Mamelang, lōna barui, bokollang, le llele bosōtō bo tlang ho le oela holimo. 2Maruo a lōna a se a bolile, le liaparo tsa lōna li jeloe ke tšoèlè. 3Khauta le silefera tsa lōna li mafōōme, 'me mafōōme a tsona e tla ba bopaki bo le ahlōlang, a le je linama joaloka mollo. Le ipōkelletse matlotlo mehleng ena ea bofelo. 4Bonang moputso oa basebetsi ba kotutseng masimo a lōna, oo le sa kang la ba lefa oona, oa bua, 'me lillo tsa bakotuli li fihlile litsebeng tsa Morena oa mabōtho. 5Le phetse menateng le menyakeng mona lefatšeng, la inontšetsa letsatsi leo ka lona le tla hlajoa joaloka linku. 6Le ahlōtse ea lokileng, le 'molaile, 'me ha aa ka a itoanela.
Mamello le thapelo
7Bana beso, mamellang ho fihlela Morena a khutla. Bonang kamoo molemi a emelang ho fumana kotulo e ntle tšimong ea hae kateng. O lebella ka mamello ho fihlela ho e-na pula ea selemo le ea hoetla. 8Le lōna le mamelle, le tiee lipelo, hobane ho khutla ha Morena ho haufi. 9Bana beso, e mong a se ke a lla ka e mong, hore le tle le se ke la ahlōloa. Moahlōli ke eo o se a le monyako.
10Bana beso, inkeleng mohlala oa ho tiisetsa mathata le ho mamella ho baporofeta, ba neng ba bua lebitsong la Morena. 11Bonang, ba mameletseng re re ba lehlohonolo. Le utloile tsa mamello ea Jobo, 'me le lemohile sepheo sa Morena, hobane Morena o tletse mohau le kutloelo-bohlōkō.
12Ho feta tsohle, bana beso, le se ke la hlapanya leha e le ka leholimo kapa ka lefatše, leha e le ka mokhoa ofe kapa ofe. Ha le re “e”, le re “e”; ha le re “che”, le re “che”; e le hore le se ke la oeloa ke kahlōlo.
13Na har'a lōna ho teng motho ea mathateng? A ke a rapele. Na ho teng ea thabileng? A ke a bine lifela. 14Na har'a lōna ho teng ea kulang? A ke a bitse baholo ba kereke, hore ba tle ba mo tlotse ka ole ba ntse ba mo rapella ka lebitso la Morena. 15Thapelo e etsoang ka tumelo e tla folisa mobabi, 'me o tla tsosoa liphateng ke Morena. Ha a entse libe, o tla li tšoareloa. 16Motho ka mong a ipolele libe ho ba bang, 'me le rapellane, hore le tle le fole. Thapelo ea motho ea lokileng e matla haholo.
17Elia e ne e le motho joaloka rōna. Empa o kile a rapela ka matla hore pula e se ke ea na, 'me ea se ke ea na lefatšeng leo ka lilemo tse tharo le likhoeli tse tšeletseng. 18A boela a rapela, eaba leholimo le nesa pula, 'me lefatše la melisa lijalo.
19Bana beso, ha e mong oa lōna a fapohile 'neteng, 'me e mong a mo khutlisetsa ho eona, 20tsebang hore eo ea khutlisitseng moetsalibe tseleng ea hae e fapohileng, o tla mo pholosa lefung, a be a etse hore libe tse ngata-ngata li tšoareloe.
