Tumeliso
1'Na Jakobo, mohlanka oa Molimo le oa Morena Jesu Kreste, ke lumelisa ba melōko e leshome le metso e 'meli, e qhalakaneng hohle-hohle.
Tumelo le bohlale
2Bana beso, ikukeng le le ba lehlohonolo, ha le feta har'a liteko tsa mefuta-futa, 3hobane lea tseba hore ho lekoa ha tumelo ea lōna ho tsoala mamello. 4Mamello e ke e hlahise mosebetsi o phethehileng, e le hore le be batho ba phethehileng ka ho tlala, ba sa hlokeng letho. 5Haeba e mong oa lōna a hloka bohlale, a ke a bo kōpe ho Molimo ea fang bohle ka matsoho a mabeli, a sa khanane, 'me o tla bo fuoa. 6Feela a bo kōpe ka tumelo, a sa belaele letho, hobane ea belaelang o tšoana le leqhubu la leoatle le tsokotsoang ke moea. 7Motho ea joalo a se ke a lekanya hore o tla fuoa letho ke Morena, 8hobane ke motho ea sa tsebeng moo a emeng teng, ea sa tsitsang litseleng tsohle tsa hae.
Bofutsana le maruo
9Ngoan'abo rōna ea eisehang a be motlōtlō ha a phahamisetsoa bolumeling. 10Ea ruileng le eena a be motlōtlō ha a eisoa ka ho ba molumeli, hobane o tla fela joaloka palesa ea joang. 11Ha letsatsi le chaba ka lebatama la lona, boa omella, palesa ea bona e oela fatše, 'me botle ba bona boa fela. Le eena morui o tla fela joalo, a ntse a le har'a merero ea hae.
Teko le meleko
12Ho lehlohonolo motho ea mamellang teko, hobane ha a se a amohelehile, o tla fumana mofapahlooho oa bophelo, oo Morena a o tšepisitseng ba mo ratang.
13Ho se be motho, eo ekareng ha a le molekong, a re: “Ke lekoa ke Molimo.” Molimo ha a lekoe ke bobe, 'me le eena ha a leke motho le ea mong. 14Empa e mong le e mong o lekoa ha a huloa, 'me a hoheloa ke litakatso tsa hae. 15Joale ha takatso e mpe e se e emere, e tsoala sebe, 'me ha sebe se se se phethehile, se tsoala lefu.
16Bana beso ba ratehang, le se ke la ithetsa. 17Nèo e 'ngoe le e 'ngoe e molemo, le mpho e 'ngoe le e 'ngoe e phethehileng, li tsoa holimo, li theoha ho Ramaseli, eo ho eena ho seng phetoho leha e le phifalo. 18Ka ho rata ha hae o re tsoetse ka lentsoe la 'nete, re tle re be ho kang matsibolo har'a libōpuoa tsa hae.
Ho utloa le ho phetha lentsoe la Molimo
19Bana beso ba ratehang, tsebang hona: Motho ka mong eka khona a utloe kapele, empa a se ke a potlakela ho bua le ho halefa, 20hobane motho ea halefileng a ke ke a etsa ho lokileng pel'a Molimo. 21Ka baka leo, le lahle tsohle tse manyala le bokhopo bo fetisisang, 'me ka boikokobetso le amohele lentsoe la Molimo le jetsoeng ka lipelong tsa lōna, le nang le matla a ho le pholosa.
22Le be baphethi ba lentsoe leo, e seng bautloi feela, ba ithetsang ka bobona. 23Ha motho e le moutloi oa lentsoe la Molimo, empa e se mophethi oa lona, o tšoana le motho ea shebang tšobotsi ea hae ka seiponeng, 24'me ere hoba a ichebe, a ikele, a lebale hang-hang hore o ne a le joang. 25Ea shebisisang molao o phethehileng oa tokoloho, ea pheellang ho oona, a sa fetohe moutloi ea lebalang, empa e le mophethi oa mosebetsi, motho eo o tla fumana lehlohonolo ho seo a se etsang.
26Ha motho a nahana hore ke morapeli, feela a sa tšoare leleme la hae, oa ithetsa, borapeli boo ba hae ke ba lefeela. 27Borapeli bo hloekileng, bo se nang sekoli mahlong a Molimo Ntat'a rōna, ke bona: Ho chakela likhutsana le bahlolohali matšoenyehong a bona, le ho ipōlōka re sa silafatsoe ke tsa lefatše.
