Mora oa Esaea ke sesupo ho sechaba
1Morena a re ho 'na: “Nka letlapa le leholo, u ngole holim'a lona ka tlhaku tse hlakileng: ‘Potlakela khapo! Potlakela lelobelo!’ ”
2Eaba ke bitsa lipaki tse tšepahalang, e leng moprista Uriea le Sekariea, mora oa Jerebekiea, ho tla mpakela.
3Ka kena likobong tsa mosali oa ka, a emōla, a tsoala mora. Eaba Morena o re ho 'na: “Mo ree lebitso la ‘Potlakela khapo! Potlakela lelobelo’! 4Etlare moshanyana enoa a e-s'o tsebe ho re 'ntate' kapa ‘'mè’, maruo a Damaseka le khapo ea Samaria li nkoe ke khosi ea Asiria.”
Khosi ea Asiria ea tla
5Morena a boela a bua ho 'na, a re:
6“Kaha chaba sena
se se se nyatsitse metsi a Shilōoa
a phallang a khutsitse,
se thabela Resine
le mor'a Remaleea,
7ka baka lena,
Morena o tla se tlisetsa
khōhōleli e kholo,
e matla, ea Nōka,
khosi ea Asiria
le mabōtho 'ohle a eona.
Nōka e tla thibela
melatsoana ea eona,
metsi a phutsalle
holim'a mabōpo a eona.
8Metsi a tla feta
har'a naha ea Juda,
a phutsalle, a aparele hohle,
a kōkōmōhe, a fihle molaleng.
Nōka e tla thathalatsa
mapheo a eona,
a koahele naha ea hao
ka bophara ba eona,
uena Emanuele!”
9Hlabang mokhosi, lōna machaba,
le tla robokeloa!
Mamelang, lōna ba naha tse hole!
Hlomellang ntoa,
le tsoe le robokeloa!
Hlomellang ntoa,
le tsoe le robokeloa!
10Le ka rala merero ea lōna,
empa e tla nyōpa;
le ka bua haholo,
ho ke ke ha phethahala letho,
hobane Molimo o na le rōna.
Molimo o eletsa moporofeta
11Morena a bua le 'na letsoho la hae le matla le le holim'a ka, a nkeletsa hore ke se ke ka latela mekhoa ea sechaba sena, 'me a re:
12“Sohle seo chaba sena
se reng ke bohlabaphieo,
uena se k'a re ke bohlabaphieo;
se k'a tšaba
se tšajoang ke chaba sena,
u se k'a tšosoa ke se se tšosang.
13Hopola hore Moren'a mabōtho
oa halalela,
e be eena eo u mo tšabang,
e be eena eo u mo tšohang.
14Ke eena eo e tla ba sehalalelo;
empa ho matlo a mabeli a Iseraele,
ke eena lejoe le tla ba khōpa,
ke eena lefika le tla ba thula,
ho baahi ba Jerusalema e be sefi,
e be leraba.
15Ba bangata ba bona
ba tla khothometseha,
ba bangata ba bona
ba oe, ba robehe,
ba bangata ba bona
ba oele lerabeng, ba tšoasoe.”
Ho se ke ha buisanoa le bafu
16Molaetsa ona oa ka le o boloke,
thuto ea ka e manehoe lipelong,
pelong tsa barutuoa ba ka.
17Ha e le 'na ke tšepile Morena,
eena ea patileng fahleho sa hae,
a se patela ntlo ea Jakobo;
ke eena eo ke tla mo lebella.
18Ke 'na enoa le bana bao Morena a 'neileng bona. Naheng ea Iseraele re lipontšo le litšupo tse tsoang ho Morena oa mabōtho, ea ahileng Thabeng ea Sione.
19Ha batho ba re le e'o botsa ho ba buisanang le bafu le ho baloi ba hoeshetsang, ba bèra-bèrang, na batho ha ba tšoanele ho botsa Molimo oa bona, ho e-na le hore ba phelang ba botse bafu? 20Hlahlobang molao le bopaki ba ka! Haeba ba sa bue ho ea ka lipolelo tsena, ke hobane ha ho na leseli le ba chabelang.
Nako ea litsietsi
21Batho ba tla lelera lefatšeng ba tsielehile, ba lapile, 'me etlare ha ba lapile ba pōte, ba talime holimo, ba rōhake khosi ea bona le Molimo oa bona. 22Joale ba tla talima fatše, ba bone litsietsi le lefifi, lefifi le hlomolang, 'me ba akheloe lefifing.
