ESAEA 66

“Leholimo ke terone ea ka,

lefatše ke bonamelo ba maoto a ka.

E kae ntlo eo ba nkhahelang eona?

Se kae sebaka

seo ke tla phomola ho sona?

₂Ntho tsena tsohle li entsoe ke 'na,

ka li etsa, 'me joale li teng,”

“Ea tjena ke eena eo ke mo ratang:

Ea ikokobelitseng,

ea moea o robehileng,

ea thōthōmelang

ha a utloa lentsoe la ka.

₃Empa ea etsang mahlabelo ka poho,

o tšoana le 'molai oa motho;

ea etsang nyehelo ka konyana,

o tšoana le ea robang ntja molala;

ea etsang nyehelo ka lijo,

o tšoana le ea nyehelang

ka mali a kolobe;

ea chesang mokubetso

ho etsa khopotso,

o tšoana le ea khumamelang

molimo oa bohata.

E, ba ikhethetse tsela tsa bona,

meea ea bona

e thabela manyala a bona.

₄Le 'na ke tla ba otla

ka kotlo e bohlōkō,

ke ba tlisetse sona

seo ba se tšabang.

Ha ke ne ke bitsa,

ha ho ea kil'a arabela,

ha ke ne ke bua,

ha baa ka ba mamela.

Ba entse bobe

moo ke ntseng ke ba shebile,

ba ikhethela lintho

tse sa nthabiseng.”

₅Lōna ba thōthōmelang

ha Morena a bua,

mamelang lipolelo tsa hae:

“Bana babo lōna ba le hloileng,

ba le khesang

ka baka la lebitso la ka, ba re:

‘Morena ha a ke a tlotlisoe,

re bone thabo ea lōna!’

Empa bona

ba tla hlajoa ke lihlong.

₆Utloang morusu

o tsoang kahar'a motse!

Utloang lerata

le tsoang ka Tempeleng!

Ke molumo o tsoang ho Morena,

o putsa lira tsa hae

ho ea ka mesebetsi ea tsona.

₇“Mosali o belehile

a e-s'o utloe mahlaba a pelehi,

a beleha mora, mahlaba a pelehi

a e-s'o mo fihlele.

₈Ea kil'a utloa ntho e tjee ke mang?

Ea kil'a bona ntho tse tjee ke mang?

Na fatše le ka bōptjoa

ka tsatsi le le leng,

kapa sona sechaba

sa tsoaloa ka motsotsoana?

Eitse ha Sione e utloa

mahlaba a pelehi,

eaba e beleha

bana ba eona hang-hang.

₉Na nka fihlisa mosali

khatheng la ho beleha,

eaba ke thibela

ho tsoaloa ha ngoana oa hae?”

“Na ke ee ke koale

popelo ea mosali,

ke e koale ka nako ea pelehi?”

₁₀“Lōna bohle ba ratang Jerusalema,

thabang le nyakalle 'moho le eona;

lōna bohle ba e llelang,

thabang haholo 'moho le eona.

₁₁Matsoeleng a eona

le tla anya le khotsofale,

le tšelisehe, le mōkōnye haholo,

le thabele ho sisa ha eona.”

“Ke tla e tlisetsa khotso

sa nōka e tletseng,

ke e tlisetse maruo a lichaba

sa nōkana e tletse tsoete!

E tla le anyesa,

e le sike ka matsoho a eona,

lōna le bapalle mangoeleng a eona.

₁₃Joalokaha mosali

a bobisa ngoana oa hae,

le 'na ke tla le tšelisa joalo,

ke le tšelise le le Jerusalema.”

₁₄Ha le bona tsena

pelo tsa lōna li tla nyakalla,

le tlōkōme joaloka joang

ha bo tlōkōma.

Bahlanka ba Morena

ba tla tseba matla a hae,

lira tsa hae tsona

li bone khalefo ea hae.

₁₅Bonang,

Morena o tla a le har'a mollo,

kariki tsa hae tsa ntoa

li ka setsokotsane,

khalefo ea hae e tlōkōmang

o e lihela ka mabifi,

malakabe a mollo

ke eona khalemo ea hae.

₁₆Morena o tla ahlōla bohle

ka mollo le ka sabole,

bao a tla ba bolaea

e tla ba boieane.

₁₇“Ba ikhalaletsang, ba itlhoekisang,

ba itlhoekisetsa

ho khumamela melingoana,

ho e khumamela masimong,

ba emeng kamor'a sefate

se bohareng ba tšimo,

ba jang nama ea likolobe

le ea litoeba, le tse manyala,

bana ba tla timetsoa kaofela,”

₁₈“Ke tseba liketso tsa bona

le mehopolo ea bona;

nako e tla fihla,

ke khōbōkanye lichaba,

le ba lipuo tsohle,

bohle ba tla tla

ba bohe tlōtla ea ka.

₁₉“Ke tla etsa pontšo har'a bona,

ba phonyohileng

ke ba rōmele lichabeng

tsa Tarashishe, le Pule, le Lōde,

e leng tsona tse tummeng

ka ho fula ka metsu.

Ke tla ba rōmela Tubale le Jafane,

le lihlekehlekeng tse hōle,

tse e-s'o utloe botumo ba ka,

tse e-s'o bone le eona tlōtla ea ka;

ba tla phatlalatsa

tlōtla ea ka har'a lichaba.

₂₀Ba tla tlisa bana babo lōna bohle,

ba ba tlise ba e-tsoa lichabeng,

ba ba tlise ho Morena e le nyehelo,

ba ba tlise ba palame lipere,

le kariki tsa ntoa le makoloi,

ba ba tlise

ba palame limmeile le likamele,

ba ba tlise Jerusalema,

thabeng ea ka e halalelang,”

“Ba tla ba tlisa sa bana ba Iseraele,

ba tlisa nyehelo,

ba e tlisa ka Tempeleng ea Morena,

ba e tlisa

e le ka janeng se hloekileng.

₂₁Ba bang ba bona

ke tla ba etsa baprista,

ke ba etse Balevi,”

₂₂“Joalokaha maholimo a macha

le lefatše le lecha,

e leng lintho tseo ke tla li bōpa,

li tla ba kapele ho 'na kamehla,”

“litlōhōlō tsa lōna

li tla hlola joalo,

le lona lebitso la lōna

le hlole joalo.”

₂₃Morena o re:

“Batho bohle ba tla nkhumamela,

ba nkhumamele

ha khoeli ka 'ngoe e thoasa,

ba nkhumamele

ka Sabatha se seng le se seng.

₂₄Ba tla tsamaea, ba e'o bona litōpō,

tōpō tsa ba ileng ba ntšiteloa;

bōkō tse ba jang

ha li ka ke tsa e-shoa,

mollo o ba chesang

ha o ka ke oa tima,

'me batho bohle

ba tla ba nyonya.”