ESAEA 65

₁“Ke ne nka araba

ba sa reng letho ka 'na;

ke ne nka fumanoa

ke ba sa kang ba mpatla.

Ho chaba se neng se sa nthapele

ka re:

‘Ke 'na enoa! Ke 'na enoa!’

₂Ke qetile letsatsi lohle

ke otlolotse matsoho a ka,

ke a otlolletse sechaba,

chaba se melala e thata,

se itsamaelang

ka tsela ea sona e khopo,

se latelang mehopolo ea sona feela.

₃Ke chaba se mphephetsang kamehla

ke se shebile,

se etsetsang mahlabelo ka lirapeng,

se chesetsang mokubetso

holim'a aletare ea litene.

₄Ke chaba se itulelang har'a mabitla,

se qetang masiu

se entse tebelo ea sephiri;

se itjellang le nama ea likolobe,

seo pitsa tsa sona

li nang le moro oa tse manyala.

₅Ke chaba se reng:

‘Emella thōkoana,

u se atamele ho rōna,

hobane rōna re halalela haholo,

re halalela ho u feta!’

Batho ba joalo

ba nkha sa mosi nkong tsa ka,

ba ka mollo

o qetang tsatsi lohle o tuka.

₆“Tsohle li se li ngotsoe,

li kapele ho 'na,

ha nka ke ka khutla,

ke busetsa molamu sefateng,

ke o busetsa sefateng

ka sefutho se le seholo,

₇ka baka la libe tsa lōna

le tsa baholo-holo ba lōna,”

“Ba ne ba chesetse mokubetso

holim'a lithaba,

ba 'nyefola

ha ba le holim'a maralla,

ka baka leo,

ke tla ba lekanyetsa moputso,

ketso tsa bona tsa pele

ke li putse ka ho tlala.”

“Ha morara o lesihleng

o sa na le lero,

batho ba ee ba re:

‘Le se ke la o lahla,

hobane o sa na le molemo.’

Ka baka la bahlanka ba ka

le 'na ke tla etsa joalo,

ha nka ke ka ba timetsa,

ka ba timetsa bohle.

₉Ke tla sitsa Jakobo ka litlōhōlo,

tsa Juda tsona e be majalefa,

majalefa a thaba tsa ka;

thaba tseo e tla ba lefa

la bakhethoa ba ka,

'me bahlanka ba ka

ba tla aha ho tsona.

₁₀Metebo ea likhutšoane

e tla hlongoa Sharone,

khohlong ea Akore

makhomo a bothe teng,

e le mehlape ea chaba sa ka,

chaba se mpatlang.

₁₁“Empa ha e le lōna

ba furallang Morena,

ba lebalang thaba ea ka,

thaba e halalelang,

ba batlang leseho

ka ho nyehella Tosa ka lijo,

ba nyehellang Sefalabohoho

ka joala bo bohale;

₁₂lōna ke tla le abela sabole,

bohle le tla khumama

ba le bolaee,

hobane ha ke bitsa

ha lea ka la arabela,

ka bua le lōna

la se ke la mamela.

Le entse bokhopo

moo ke ntseng ke le bona,

la ikhethela lintho

tse sa nthabiseng.”

“Bahlanka ba ka ba tla khōra,

empa lōna le tla lapa;

bahlanka ba ka ba tla noa,

empa lōna le tla nyoroa;

bahlanka ba ka ba tla thaba,

empa lōna le tla soaba.

₁₄Bahlanka ba ka ba tla bina,

ba bine hobane pelo li nyakaletse;

empa lōna le tla lla,

le llisoe ke pelo tse bohloko,

le bokollisoe

ke ho tubeha ha meea ea lōna.

₁₅Le tla siela bakhethoa ba ka

bitso la lōna,

bona ba tla le sebelisa

ha ba etsa thōhako;

lōna, Morena Molimo

o tla le bolaea,

bahlanka ba hae

a ba bitse ka lebitso lesele.

₁₆Ea kōpang tlhohonolofatso

mona lefatšeng,

o tla kōpa ho hlohonolofatsoa

ke Molimo oa 'nete;

ea hlapanyang mona lefatšeng,

o tla hlapanya

ka Molimo oa 'nete,

hobane tsietsi tsa pele

li tla be li lebetsoe,

le mahlong a ka

li se li patehile.”

₁₇“Bonang,

ke bōpa maholimo a macha

le fatše le lecha,

lintho tsa khale

ha li sa tla hopoloa,

ha li ka ke tsa hlola

li sa nahanoa.

₁₈Lōna thabang, le nyakalle kamehla,

le nyakallele tseo ke li bōpang.

Ke tla bōpa Jerusalema

e nyakaletseng,

baahi ba eona

e be ba tletseng thabo.

₁₉Ke tla nyakallela Jerusalema,

chaba sa ka le sona ke se thabele.

Ha ho sa tla utloahala

lillo Jerusalema,

leha e le mehoo ea ba litsietsing.

₂₀“Ha ho sa tla ba ngoana

ea shoang e le lesea,

ha ho motho ea sa tl'o qeta

lemo tsa hae tsa pallo,

ea shoang

lemo tsa hae li le lekholo

ho tla thoe o shoele

e sa le mohlankana;

ea sa qeteng

lemo tse lekholo a phela,

eena ke moetsalibe, o rōhakehile.

₂₁Ba tla haha matlo,

'me ba phele ho 'ona;

ba tla lema morara,

ba je tholoana tsa oona.

₂₂Ha ba sa tla haha matlo,

ebe ho 'ona ho phela basele;

ha ba sa tla hlola ba lema,

ebe joale ho ja basele;

chaba sa ka se tla phela halelele,

se phele halelele

joalokaha sefate se phela,

bakhethoa ba ka ba je litholoana,

ba je tholoana tsa matsoho a bona.

₂₃Ha ba ka ke ba sebeletsa lelea,

kapa ba tsoalla bana ba bona,

ba ba tsoalla litsietsi,

ke peō ea ba hlohonolofalitsoeng,

ba hlohonolofalitsoeng ke Morena,

bona 'moho le litlōhōlō tsa bona.

₂₄Ke tla arabela

ba e-s'o ka ba ipiletsa,

ke be ke ba utloe

e le hona ba ntseng ba rapela.

₂₅Phiri le konyana

li tla fula li le 'moho,

tau e je joang

joalokaha pohoana e bo ja,

sehahabi sona se phele

ka ho ja lehlabathe.

Ha li ka ke tsa ntša kotsi

leha e le ho bolaea,

hohle-hohle thabeng ea ka,

thabeng e halalelang,”