Morena o hlōla lichaba tsohle
1Eo ea tsoang Edomo
ekaba ke mang,
ea tsoang Bosera
aparo tsa hae li le khubelu?
Eo ea apereng tse ntle-ntle
ekaba ke mang,
ea hoantang
ka bonatla bo boholo ba hae?
“Ke 'na ea buang ka tsa ho loka,
ke 'na ea nang le matla,
matla a ho pholosa!”
2Ke hobane'ng ha aparo tsa hao
li le khubelu,
e ka tsa ea tlabikelang
tlhōtlelo sa veine?
3“Ke tlabiketse tlhōtlelo sa veine
ke le inotši,
har'a balichaba
ha ho ea kileng a ba le 'na.
Ke ile ka ba hatakela ke halefile,
ka ba tlabikela
ke lōlōma ke khalefo;
mali a bona
a qaphaletsa aparo tsa ka,
kobo tsohle tsa ka
tsa silafatsoa ke mali ao.
4Ke hopotse tsatsi
leo ke tla iphetetsa ka lona,
lemo sa topollo le sona
se se se fihlile.
5Ka qamaka kahohle,
empa ka hloka mothusi,
ka makala haholo
ha ke bona ho se motšehetsi;
eaba tsa pholoho
ke li sebetsa ka letsoho la ka,
khalefo ea ka
ea e-ba eona motšehetsi oa ka.
6Ke ile ka hatakela lichaba
ke halefile,
ka li tšerehanya
ke lōlōma ke khalefo,
mali a tsona ka a tšollela fatše.”
Molemo oa Morena ho Baiseraele
7Ke tla bolela
tsa rato la Morena le sa feleng,
le ketso
tseo a lokelang ho li rorisetsoa,
ho ea ka tsohle
tseo a re etselitseng tsona,
melemo e meholo
ho ba ntlo ea Iseraele,
eo a ba abetseng eona
ho ea ka mehauhelo ea hae,
le ho ea ka ketso tsa hae
tsa lerato, tse ngata.
8“Ruri ke chaba sa ka,”
ho rialo Morena,
“bana ba ka
ba ke keng ba bua leshano;”
kahoo ea e-ba eena Mopholosi,
Mopholosi oa bona,
9matšoenyeho 'ohle a bona
le eena a mo tšoenya.
hase lengeloi le ba pholositseng,
ba pholositsoe ke Morena ka seqō,
ka lerato le ka mohau oa hae
a ba lopolla;
ho tloha khale a ba nka
a ba a ba jara.
10Empa ba fetohela Morena,
Moea o Halalelang ba o soabisa,
ka baka leo,
eena a fetoha sera sa bona,
a ba loantša e le eena ka seqō;
11ke ha ba hopola matsatsi a fetileng,
ba hopola Moshe le chaba sa habo,
ba re: “O kae
ea neng a tšelise molisa,
a mo tšelisa
le mohlape oa hae leoatleng?
O kae ea neng a theole
Moea o Halalelang oa hae,
a o theolela holim'a Moshe?
12O kae ea neng a tataise
tsoho le letona la Moshe,
a le tataisa
ka tsoho le tlōtlehang la hae;
ea neng a arohanye metsi
kapele ho bona,
a etsa hore bitso la hae
le tume kamehla eohle?
13O kae ea neng a ba tšelise,
a ba tšelisa har'a maliba?”
Joaloka pere e sa khōptjoeng
har'a lehoatata,
le bona ha ba tšela
ha baa ka ba khōptjoa.
14Joaloka likhomo tse theohelang
kahar'a khohlo,
Moea oa Molimo
o ile oa ba phomotsa.
Chaba sa hao u se tataisitse tjena,
hore u iketsetse lebitso le tlōtlehang.
Thapelo e kōpang mohau le thuso
15Uena ea leahong la hao
le halalelang, le tlotlehang,
talima fatše,
u le leholimong, u bone!
E kae cheseho ea hao,
a kae matla a hao?
E kae kutloelo-bohloko ea hao,
o kae mohau oa hao?
Oho, Morena,
o re hanetse ka tsona!
16Uena Morena, ke uena ntat'a rōna,
le hoja Aborahama a sa re tsebe,
le Iseraele a sa re letho ka rōna,
oho, uena Morena,
ke uena ntat'a rōna,
Molopolli oa rōna:
Ke bitso la hao la kamehla eohle.
17U re tloheletse'ng, Morena,
ho kheloha tsela tsa hao?
U thatafalelitse'ng pelo tsa rōna,
hore re se ke ra u tšaba?
Khutla ka baka la rōna
bahlanka ba hao,
rōna merabe eo e leng lefa la hao.
18Ke hobane'ng ha ba khopo
ba futuhetse Sehalalelo sa hao,
lira tsa rōna li hataketse
baka se halalelang se hao?
19Re tšoana le bao u e-s'o ba buse
ho tloha khale,
ba e-s'o ka ba bitsoa
ka lebitso la hao.
