Lebitso le lecha la Sione
1Ka baka la Sione
ha nka ke ka khutsa,
ka baka la Jerusalema
ha nka ke ka phomola,
ho fihlela
ho loka ha eona ho khanya
ho khanya sa mafube a meso,
topollo ea eona
e tšoana le lebone le tukang.
2Balichaba ba tla bona
ho loka ha hao,
likhosi tsohle li bone
tlōtla ea hao;
uena u tla bitsoa
ka lebitso le lecha,
leo u tla le reoa
ke Morena ka seqō.
3Matsohong a Morena
u tla ba mofapahlooho oa tlōtla,
matsohong a Morena
u be moqhaka oa bokhosi.
4Ha u ka ke ua hlola
u bitsoa Molahluoa,
kapa naha ea hao e bitsoe Nanaola;
empa u tla bitsoa Monnyakalatsi,
naha ea hao e bitsoe Monyaluoa,
hobane Morena o thabisoa ke uena,
naha ea hao
e tla ba mohats'a Morena.
5Joalokaha mohlankana
a nyala moroetsana,
bara ba hao le bona
ba tla u nyala;
joalokaha monyali
a thabela monyaluoa,
Molimo oa hao le eena
o tla u thabela.
6“Ke beile balebeli
holim'a marako a hao,
uena Jerusalema,
ba ke keng ba khutsa
motšeare le bosiu:
Lōna ba rapelang Morena
le se ke be la khutsa,
7Morena le se ke be la mo fa phomolo,
ho fihlela a hlomamisa Jerusalema,
a etsa hore lefatšeng mona
e be Sebabatso!
8“Morena o hlapantse
ka tsoho le letona la hae,
a hlapanya
ka matla a tsoho la hae, a re:
‘Ruri ha nka ke ka hlola
ke fana ka mabele a hao,
ke a nea lira tsa hao
hore e be lijo tsa tsona;
balichaba ha ba ka ke ba hlola,
ba e-noa veine ea hao,
veine eo u e sebelelitseng ka thata.
9Ba kotulang mabele
ke bona ba tla a ja,
ba a je, ebe ba rorisa Morena;
ba khang morara
ke bona ba tla noa veine,
ba e noelle mabaleng,
mabaleng a Sehalalelo sa ka.’ ”
10Tsoang! Tsoang!
ka likhoro tsa motse,
le lokise tsela ea chaba sa ka;
batalatsang, batalatsang 'mila,
le suthise majoe,
le phahamisetse
lichaba tsohle mokhele.
11Morena o entse phatlalatso,
a e etsa ho ea fihla lipheletsong,
pheletsong tsa lefatše:
“Bolellang morali oa Sione,
le re: ‘Mopholosi oa hao
o s'a le tseleng,
o tla a nkile moputso oa hae,
phetetso ea hae
e mo eteletse pele.’ ”
12Ba tla bitsoa chaba se halalelang,
ba bitsoe balopolloa ba Morena;
uena u tla bitsoa Mpatloane,
u bitsoe motse o sa furalloang.
