Sebe sa Iseraele
1Morena o bua tjena:
“Le kae lengolo
leo ke hlalileng 'm'ao ka lona,
leo ke neng ke mo leleke ka lona?
Ke u rekisitse ho mang,
ho lefa molato oa ka?
Le ile la rekisoa
ka baka la bokhopo ba lōna,
'm'a lōna a lelekoa
ka baka la litšito tsa lona.
2“Ke hobane'ng ha ke fihla
ke fumaneng ho se na motho?
Eare ha ke bitsa
ka hloka ea nkarabang?
Na tsoho la ka le fokola
hoo nke keng ka le lopolla?
Na ke hloka matla a ho le namolela?
Bonang! ha ke khalema
ke pshesa metsi a leoatle,
linōka tsona ke li fetole lehoatata;
thlapi tse phelang nōkeng tseo
li nkhe, li re phu!
li hloke metsi,
li be li shoe ke lenyora.
3Maholimo ke a apesa tsa bofifi,
ke a koahele ka aparo se mahoashe.”
Mohlanka oa Morena oa ikokobetsa
4Morena Molimo o 'neile
leleme la barutehi,
ke tle ke tsebe
ho khothatsa ba tepeletseng.
Hoseng ho hong le ho hong
oa ntsosa,
a etse hore ke hloaee tsèbè,
ke mamele joaloka morutuoa.
5Morena Molimo
o nthibolotse litsèbè,
ha kea ka ka hanyetsa,
kapa ka checha ka santhao.
6Ke ile ka hlōbōla hore bashapi
ba nchape mokokotlong,
marama ka a retelletsa
ho ba ntlhōthang litelu;
ba ntšomang ba ntšoela ka mathe
ha kea ka ka ba patela
fahleho sa ka.
7Morena Molimo o tla nthusa,
kahoo ha nka ke ka tlontloloha.
Ke thatafalitse fahleho sa ka
joaloka moralla,
'me kea tseba
ha nka ke ka hlajoa ke lihlong.
8Ea reng ha ke na molato
o haufi le 'na;
ebe joale ea ka nqōsang ke mang?
A re hle re thulane re talimane!
Moqōsi oa ka eena ke mang?
Ha a hle a tle a nqōse!
9Bonang, Morena Molimo
ke eena ea nthusang!
Ke mang ea ka mphumanang
ke le molato?
Baqōsi bohle ba ka ba tla thōchōha,
ba thōchōhe joaloka seaparo,
tšoèlè e ba je, e be e ba felise!
10Ke mang oa lōna
ea tšabang Morena,
ea mamelang lentsoe
la mohlanka oa hae?
Ea tsamaeang lefifing a se na leseli?
Ha a ke a tšepe lebitso la Morena,
a itšetlehe ka Molimo oa hae.
11Lōna bohle ba besang mollo,
le pota-potoe ke litlhase tsa oona,
tsamaeang leseling
la mollo oo oa lōna,
har'a tlase tsa mollo
o besitsoeng ke lōna.
Seo le tla se amohela
tsohong la ka, ke sena:
Le tla paqama fatše
har'a litlokotsi.
