ESAEA 10

₁Ho malimabe ba etsang

melao e sa lokang,

le bangoli ba ngolang

melao e hatellang,

₂hore ba amohe mafutsana

tokelo tsa 'ona,

ba hateletsoeng

ba ba hlokise toka,

ba ikhapele ntho tsa bahlolohali,

ba tlatlape le tsona likhutsana.

₃Le tla etsa'ng

mohl'a tsatsi la kahlōlō,

le la timelo

e tla tla e e-tsoa hōle?

Thuso le tla ea e kōpa ho mang?

Maruo a lōna le a siee hokae?

₄Ruri le tla bōra-bōra

har'a batšoaruoa,

kapa le oele har'a babolauoa;

leha ho le joalo

khalefo ea hae ha ea kokobela,

tsoho la hae o nts'a le phahamisitse.

₅U malimabe uena Asiria,

u leng molamu oa khalefo ea ka!

Kotjane ea khalefo ea ka

e tsohong la hao!

₆Ke tla mo rōmela

chabeng sa baetsalibe,

ke mo rōmele

chabeng se nkhalefisang;

ke tla mo laela hore a hape khapo,

ke mo laele hore a lobele lelobelo,

le ho ba hatakela

sa seretse sa literata.

₇Empa hona hase hoo a ho rerang,

le ka pelong ea hae

ha a ho nahane,

hoba sepheo sa hae

ke ho timetsa,

ke ho felisa lichaba tse ngata.

₈Eena o re:

“Na balaoli ba ka bohle

hase likhosi?

₉Na Kalene

ha e tšoane le Karakemishe?

Na Hamate

ha e tšoane le Arepade?

Na Samaria

ha e tšoane le Damaseka?

₁₀Joalokaha ke hapile mebuso

ea melimo ea bohata,

eo tšoantšo tsa eona li fetang,

tsa Jerusalema le Samaria,

₁₁Jerusalema

le melimo ea eona ea litšoantšo

ke tla e etsa sa Samaria,

le melimo ea eona ea litšoantšo.”

“Hona ke ho entse

ka matla a matsoho a ka,

le ka bohlale ba ka,

hobane ke na le kutloisiso;

ke ile ka suthisa meeli ea lichaba,

ka hapa le matlotlo a tsona;

joaloka ea matla

ka kokobetsa baahi ba tsona.

₁₄Tsoho la ka le fumane

matlotlo a lichaba,

la a fumana sa hlaha sa nonyana,

ka bokella naha tsohle 'moho

sa mahe a setse lepalapaleng,

ha se be le e 'ngoe e sisinyehang,

kapa e ahlamisang molomo

ho hlaba mokhosi.”

₁₅Na selepe se ka ithorisetsa,

ea rathang ka sona,

kapa eona sakha ea ithorisetsa,

ea sakhang ka eona?

Na molamu o ka nonya

ea o phahamisang,

kapa kotjane

ea tsokotsa motho e se lehong?

₁₆Ka baka leo, Morena,

Moren'a mabōtho,

o tla etsa hore

koankoetla tsa khosi li tsètè,

bakeng sa tlōtla ea eona

ho hotetsoe mollo

o tukang malakabe.

₁₇Seli la Iseraele

le tla fetoha mollo,

Ea Halalelang oa hae

a fetohe lelakabe

le tla chesa meutloa

le hlabahlabane,

le li chese ka tsatsi le le leng.

₁₈Mokhabo oa meru ea eona

le oa masimo a nonneng,

Morena o tla o timetsa

ho hang ka malakabe,

sa ha mokuli a fella likobong.

₁₉Fate tsa meru ea eona

li tla sala li le 'maloana,

hoo le ngoana

a ka tsebang ho li bala.

₂₀Mohl'a tsatsi leo,

masalla a Iseraele,

ba ntlo ea Jakobo

ba ileng ba phonyoha,

ha a sa tla hlola a tšepa

ea il'a a otla,

empa a tla tšepa Morena ka 'nete,

eena Ea Halalelang oa Iseraele.

₂₁Masalla a tla boela a khutla,

masalla a Jakobo

a khutlele ho Molimo ea matla.

₂₂Leha chaba sa hao, uena Iseraele,

se ka hlabathe la leoatle,

ke masalla feela

a tla boela a khutla.

Morena o se a laotse timetso,

e tla se oela holimo e le ka toka.

₂₃Morena, Moren'a mabōtho,

o tla phethahatsa timetso

e laoletsoeng naha eohle.

₂₄Ka baka leo, Morena,

Moren'a mabōtho, o re:

“Lōna chaba sa ka

se phelang Sione,

le se ke la tšaba Baasiria,

bona ba le otlang ka molamu,

ba le phahamisetsang koto

joalokaha Egepeta e ile ea etsa.

₂₅Haufinyane ho le halefela ha ka

ho tla fela,

khalefo ea ka

e tobane le ho timetsoa ha bona.”

₂₆Moren'a mabōtho

o tla ba hoèba ka phafa,

joaloka mohla a otlang Bamediane

fikeng la Orebe.

Molamu oa hae o tla o phahamisa

holim'a leoatle,

joalokaha a n'a o phahamise

holim'a Egepeta.

₂₇Mohl'a tsatsi leo,

u tla hlōhlōlloa mojaro oa bona,

joko ea bona

e tlosoe molaleng oa hao.

₂₈Sera se hapile Aiata,

sa phōlletsa har'a Migerone,

sa boloka thōtō ea sona Mikemase.

₂₉Ha se e-tsoa lekhalong sa re:

“Bosiung bona

ke tla ea emisa Gobe.”

Rama e tetemisa lirope,

ea thōthōmela,

Gibea ea Saule eona ea baleha.

₃₀Bokolla, uena morali oa Galeme!

Thèa tsèbè le uena Laesha!

Uena Anatote u malimabe!

₃₁Baahi ba Madamene baa baleha;

baahi ba Gebime

ba batla setšabelo.

₃₂Ka tsatsi lena ba tla emise Nobe,

ba supe morali oa Sione

ka setebele,

mane leralleng la Jerusalema.

₃₃Bonang Morena,

Moren'a mabotho,

O tla roba makala ao

ka matla a hae a maholo,

makala a malelele a tla rengoa,

a phahameng 'ona a tla khethuloa.

₃₄Meru e teteaneng

o tla e rema ka selepe,

fate tsa Lebanone

li oele kapele ho Ea Matla 'ohle.