Hosea o phatlalatsa kotlo ea Iseraele
1Se k'a nyakalla, uena Iseraele!
Se k'a thaba
joaloka lichaba tse ling!
U entse bootsoa
ka ho furalla Molimo oa hao,
u hlōma eka
moputso oa bootsoa ba hao
ke mabele a pōloang,
a pōloang seotlong ka seng.
2Seotlo le setlhotlelo
li ke ke tsa fepa sechaba,
veine e ncha le eona e tla se haella.
3Se ke ke sa aha naheng ea Morena,
Efraime eena o tla khutlela Egepeta,
chaba se je lijo tse sesila,
se li jele Asiria.
4Ha se ka ke sa etsetsa Morena
nyehelo tsa veine,
mahlabelo a sona
ha a amohelehe ho eena,
ho sona a tla ka lijo tsa bofifi,
bohle ba li jang ba tla silafala.
Lijo tsa bona
li tla itjelloa ke bona feela,
li ke ke tsa kenngoa
ka Tempeleng ea Morena.
5Le tla etsa'ng
mohl'a tsatsi le halalelang,
mohl'a letsatsi
la mokete oa Morena?
6Ha ba phasa-phasa,
ba baleha timelo,
Egepeta e tla ba khobokanya,
e ba khobokanye 'moho,
Memefise eona ebe ea ba epela.
Matlotlo a silefera
a tla melella bobatsi,
meutloa e ririellane
ka litenteng tsa bona.
7A s'a fihlile matsatsi a kahlōlo!
A s'a fihlile matsatsi a phetetso!
Sena Iseraele o tla se tseba!
Le re:
“Moporofeta enoa ke sethoto!
Ea susumetsoang ke moea
eena ke lehlanya!”
Hoba bokhopo ba lōna bo totile,
le bora ba lōna bo totile hakaalo!
8Moporofeta ke molebeli oa Efraime,
Efraime, chaba sa Molimo oa ka;
empa o chehetsoe maraba,
a a cheheloa tseleng tsohle,
ka Tempeleng ea Molimo oa hae
bora bo mo emetse.
9Ba tetebetse
har'a qhafutso ea bokhopo,
ba tetebetse sa mehleng ea Gibea.
Morena o tla hopola
bokhopo ba bona,
ebe o ba otlela libe tsa bona.
Sebe sa Iseraele le litholoana tsa sona
10“Ha ke ne ke qala
ho fumana Iseraele,
o n'a ka morara
o metseng har'a lehoatata;
ha ke qala ho bona
baholo-holo ba lōna,
ba ne ba ka feiee ea lilopotsiea.
Empa hoba ba fihle Baale-Peore,
ba ineella molingoana
o hlabisang lihlong,
ba nyonyeha
sa manyala ao ba a ratang!
11Tlōtla ea Efraime
eona e tla nyamela,
e nyamele sa nonyana e fōfela hōle,
ho se be pelehi, kemaro, kemōlo.
12Leha ba ka hōlisa bana ba bona,
ke tla ba timetsa,
ba hloke le thokoloana.
Ba tla ba malimabe
ha ke ba furalla!
13Kamoo ke boneng Efraime kateng,
o n'a lutse monateng
sa motse oa Tire;
empa Efraime
o tla tsoala bana ba hae,
a ba tsoalle ho bolaoa,
ho bolaoa ke 'molai.”
14Oho, Morena, ak'u ba nee!
Ekaba u tla ba nea eng, Morena?
Ba nee lipōpelo,
lipōpelo tse senyeheloang!
Ba nee matsoele,
matsoele a sa tsoeng lebese!
Morena o tla ahlōla Iseraele
15“Bokhopo bohle ba bona
bo qalile Gilegale,
ka qala ho ba hloea ha ba le moo.
Ka baka la bokhopo bona ba bona,
ke tla ba leleka Tempeleng ea ka.
Nke ke ka hlola ke sa ba rata,
mahosan'a bona 'ohle ke bafetoheli.
16Efraime ke fate se seng se rathiloe,
motso oa hae o s'o omeletse,
a ke ke a hlola a beha litholoana.
Esita leha a ka tsoala bana
ke tla bolaea bana ba pōpelo ea hae,
bana bao a ba ratang haholo.”
17Molimo oa ka o tla ba furalla,
hobane ha baa ka ba mo mamela;
ba tla fetoha baleleri har'a balichaba.
