HOSEA 7

₁“Ha ke re ke folisa Iseraele,

libe tsa Efraime lia pepeseha,

bokhopo ba Samaria bo senolehe:

Bobeli ba etsetsana bolotsana,

masholu aa thua,

a kene ka matlung,

literateng

linokoane li hape tsa batho.

₂Kelellong tsa bona ha ba hlokomele

hore ke hopola bokhopo ba bona.

Kahohle libe tsa bona li ba likile,

'me li pontšeng ea ka kamehla.”

₃“Ka bokhopo ba bona

ba thabisa khosi,

ba thabise le mahosana

ka mashano a bona.

₄Kaofela ha bona ba etsa bofèbè,

ba tuka sa sebōpi se beselelitsoe,

mophehi a sa hloke ho se roteletsa,

ho tloha ha a qala ho luba hlama,

ho fihlela hlama eo e ba e bela.

₅Mohl'a mokete oa khosi ea rōna,

ba tahisa mahosana, ba a noesa veine,

khosi e etsise basomi ka ho noa.

₆Lipelo tsa bona li chesa sa sebōpi,

ha ba qachame, ba laletse khosi.

Khalefo ea bona bosiu ea kèkèla,

ere bo e-sa e tuke sa malakabe.

₇Kaofela ha bona ba chesa sa sebōpi,

ba fenethile babusi ba bona.

Likhosi tsa bona li oele mofela,

ha ho e kil'a ipiletsa ho 'na.”

₈“Efraime o ikopantse le balichaba;

Efraime ke senkhoa se fubisitsoeng.

₉Matla a hae a jeloe ke balichaba,

empa hoo eena ha a ho lemohe.

Hlooho e s'e le marasi a ho taba,

empa le hoo ha a ho lemohe.

₁₀Baiseraele ba ahlōloa

ke boikhantšo ba bona,

empa ha ba khutlele ho Morena,

Morena Molimo oa bona,

kapa ho 'matla,

leha tsena li etsahetse.

₁₁“Efraime ke leebana-khōroana,

leebana-khōroana le sethoto,

o ipiletsa ho Egepeta,

a nt'o ea ho Asiria.

₁₂Hohle moo ba eang teng

ke tla ba tšoasa,

ke akhele tlōoa la ka holim'a bona;

ke ba theole sa nonyana tse fōfang,

ke ba tšoase

ha ba khōbōkana 'moho.

₁₃Bomalimabe bo ba oele holimo,

hobane ba balehile pel'a ka!

Kotlo e ba oele holimo,

hobane ke mona ba ntšitetsoe!

Ke ne ke re kea ba lopolla,

empa ba 'netile ka leshano!

₁₄Ha ba ipiletse ho 'na

ka lipelo tsa bona,

ba bokollela phateng tsa bona feela.

Ha ba llela koro le veine

baa itšehaka,

empa 'na baa mphetohela.

₁₅Le hoja ke ba ōtlile,

ke ba matlafalitse,

empa bona ba ntherela tse khopo.

₁₆Ba ka seqha se khoele e hlephileng,

ha ba khutlele ho Ea Holimo-limo.

Mahosana a bona

a tla bolaoa ka sabole,

a bolaeloe boikakaso

ba lipuo tsa 'ona,

a jeoe tlepane naheng ea Egepeta.”